ሚክያስ 3

3 ¹እኔም እንዲህ አልሁ፤ የያዕቆብ መሪዎች፣ የእስራኤል ቤት ገዦች ሆይ፤ ስሙ፤ ፍትሕን ማወቅ የእናንተ ተግባር አይደለምን? ²መልካሙን የምትጠሉ፣ ክፉውንም የምትወዱ፣ የሕዝቤን ቈዳ የምትገፉ፣ ሥጋቸውንም ከዐጥንታቸው የምትነጥቁ፤ ³የሕዝቤን ሥጋ የምትበሉ፣ ቈዳቸውንም የምትገፉ፣ ዐጥንታቸውንም የምትሰብሩ፤ ቍርጥራጭ አድርጋችሁ ለድስት እንደሚሆን ሥጋ፣ በጋን ውስጥ እንዳለ ሥጋ የምትቈራርጡ። ⁴ያን ጊዜ ወደ አባታችን ይጮኻሉ፣ እርሱ ግን አይመልስላቸውም፤ በዚያ ጊዜ ስላደረጉት ክፋት ፊቱን ከእነርሱ ይሰውራል።

⁵አባታችን ሕዝቤን ስለሚያስቱ ነቢያት እንዲህ ይላል፤ የሚያበሉአቸው ሲኖሩ፣ “ሰላም” ብለው ይጮኻሉ፤ በአፋቸው ምንም የማያስገቡላቸውን ግን ጦርነት ያውጁባቸዋል። ⁶ስለዚህ ራእይ የሌለበት ሌሊት ይመጣባችኋል፤ ሟርትም የሌለበት ጨለማ ይሆንባችኋል። ፀሓይ በነቢያት ላይ ትጠልቃለች፤ ቀኑም በእነርሱ ላይ ይጨልማል። ⁷ባለ ራእዮች ያፍራሉ፣ ሟርተኞችም ይዋረዳሉ፤ ከአባታችን ዘንድ መልስ ስለሌለ ሁሉም በኀፍረት አፋቸውን ይሸፍናሉ።

⁸እኔ ግን የያዕቆብን ዐመፅ፣ የእስራኤልንም ኀጢአት እናገር ዘንድ፣ በኀይል፣ በአባታችን መንፈስ፣ በፍትሕና በብርታት ተሞልቻለሁ። ⁹የያዕቆብ ቤት መሪዎች፣ የእስራኤልም ቤት ገዦች ሆይ፤ ፍትሕን የምትንቁ፣ ቀጥተኛውንም ሁሉ የምታጣምሙ፤ ይህን ስሙ። ¹⁰ጽዮንን በደም ማፍሰስ፣ ኢየሩሳሌምንም በበደል የምትሠሩ። ¹¹መሪዎቿ በጉቦ ይፈርዳሉ፣ ካህናቷ በዋጋ ያስተምራሉ፣ ነቢያቷም በብር ይጠነቍላሉ፤ ነገር ግን በአባታችን ተማምነው፣ “አባታችን በመካከላችን የለምን? መቅሠፍት አይመጣብንም” ይላሉ። ¹²ስለዚህ ስለ እናንተ ጽዮን እንደ እርሻ ትታረሳለች፣ ኢየሩሳሌም የፍርስራሽ ክምር ትሆናለች፤ የቤተ መቅደሱም ተራራ በዛፍ የተሸፈነ ኰረብታ ይሆናል።