മീഖാ 3 FHB Father's Heart Bible™

3 ¹അപ്പോൾ ഞാൻ പറഞ്ഞു: യാക്കോബിന്റെ നേതാക്കളേ, ഇസ്രായേൽഗൃഹത്തിന്റെ ഭരണാധികാരികളേ, കേൾക്കുവിൻ! നീതി അറിയുന്നത് നിങ്ങളുടെ കടമയല്ലയോ? ²നന്മയെ വെറുത്ത് തിന്മയെ സ്നേഹിക്കുന്നവരേ, എന്റെ ജനത്തിന്റെ തൊലി ഉരിച്ചെടുത്ത് അവരുടെ അസ്ഥികളിൽനിന്ന് മാംസവും കീറിയെടുക്കുന്നവരേ; ³എന്റെ ജനത്തിന്റെ മാംസം തിന്ന്, അവരുടെ തൊലി ഉരിച്ച്, അവരുടെ അസ്ഥികൾ തകർത്തുകളയുന്നവരേ; കലത്തിലേക്കുള്ള ഇറച്ചിപോലെയും കുട്ടകത്തിനുള്ളിലെ മാംസംപോലെയും അവരെ അരിഞ്ഞുമുറിക്കുന്നവരേ. ⁴അപ്പോൾ അവർ നമ്മുടെ പിതാവിനോട് നിലവിളിക്കും, എന്നാൽ അവിടുന്ന് അവർക്ക് ഉത്തരം നൽകുകയില്ല; അവർ ചെയ്ത തിന്മനിമിത്തം ആ സമയത്ത് അവിടുന്ന് തന്റെ മുഖം അവരിൽനിന്ന് മറയ്ക്കും.

⁵എന്റെ ജനത്തെ വഴിതെറ്റിക്കുന്ന പ്രവാചകന്മാരെക്കുറിച്ച് നമ്മുടെ പിതാവ് ഇപ്രകാരം അരുളിച്ചെയ്യുന്നു: അവർക്ക് ഭക്ഷണം കിട്ടുമ്പോൾ “സമാധാനം” എന്ന് വിളിച്ചുപറയുന്നു, എന്നാൽ തങ്ങളുടെ വായിൽ ഒന്നും ഇട്ടുകൊടുക്കാത്തവനെതിരേ യുദ്ധം പ്രഖ്യാപിക്കുന്നു. ⁶അതുകൊണ്ട് ദർശനം ഇല്ലാതെ നിങ്ങളുടെമേൽ രാത്രി വരും; ലക്ഷണം പറച്ചിൽ ഇല്ലാതെ നിങ്ങൾക്ക് അന്ധകാരം. പ്രവാചകന്മാരുടെമേൽ സൂര്യൻ അസ്തമിക്കും, അവരുടെമേൽ പകൽ ഇരുണ്ടുപോകും. ⁷ദർശകന്മാർ ലജ്ജിച്ചുപോകും, ലക്ഷണം പറയുന്നവർ അപമാനിതരാകും; നമ്മുടെ പിതാവിൽനിന്ന് ഉത്തരം ഒന്നും ഇല്ലാത്തതിനാൽ അവരെല്ലാവരും ലജ്ജയോടെ തങ്ങളുടെ വായ് മൂടും.

⁸എന്നാൽ ഞാനോ, യാക്കോബിനോട് അവന്റെ മത്സരവും ഇസ്രായേലിനോട് അവന്റെ പാപവും പ്രഖ്യാപിക്കേണ്ടതിന്, ശക്തികൊണ്ടും—നമ്മുടെ പിതാവിന്റെ ആത്മാവുകൊണ്ടും—നീതിയും ബലവുംകൊണ്ടും നിറഞ്ഞിരിക്കുന്നു. ⁹നീതിയെ നിന്ദിക്കുകയും ശരിയായതെല്ലാം വളച്ചൊടിക്കുകയും ചെയ്യുന്ന യാക്കോബുഗൃഹത്തിന്റെ നേതാക്കളേ, ഇസ്രായേൽഗൃഹത്തിന്റെ ഭരണാധികാരികളേ, ഇത് കേൾക്കുവിൻ, ¹⁰രക്തച്ചൊരിച്ചിൽകൊണ്ട് സീയോനെയും അനീതികൊണ്ട് ജറുശലേമിനെയും പണിയുന്നവരേ. ¹¹അവളുടെ നേതാക്കൾ കൈക്കൂലിക്കുവേണ്ടി ന്യായം വിധിക്കുന്നു, അവളുടെ പുരോഹിതന്മാർ കൂലിക്കുവേണ്ടി ഉപദേശിക്കുന്നു, അവളുടെ പ്രവാചകന്മാർ പണത്തിനുവേണ്ടി ലക്ഷണം പറയുന്നു; എന്നിട്ടും അവർ നമ്മുടെ പിതാവിന്മേൽ ചാരിനിന്ന് ഇപ്രകാരം പറയുന്നു: “നമ്മുടെ പിതാവ് നമ്മുടെ ഇടയിൽ ഇല്ലയോ? നമ്മുടെമേൽ ഒരു അനർഥവും വരുകയില്ല.” ¹²അതുകൊണ്ട് നിങ്ങൾനിമിത്തം സീയോൻ വയൽപോലെ ഉഴുതുമറിക്കപ്പെടും, ജറുശലേം ഒരു കൽക്കൂമ്പാരമായിത്തീരും, ആലയത്തിന്റെ മല കാടുമൂടിയ കുന്നുമായിത്തീരും.