Vatungamiri Vanodya Vanhu Vavo
Kupomera kwacho kune mifananidzo yokudya vanhu: vatungamiri vanobvisa ganda pavanhu vavo vovatema-tema kuti vaiswe muhari. Vaprofita vanoparidza rugare kune ani nani anovapa chokudya; Baba vedu havazovapinduri. Nokuda kwavarume ava, Ziyoni richarimwa somunda uye gomo retemberi richasiyiwa riri sango.
3 1Ipapo ndakati: Teererai, imi vatungamiri vaJakobho, vatongi veimba yaIsraeri! Ko kuziva kururamisira hakusi basa renyu here? 2Imi munovenga zvakanaka muchida zvakaipa, munovhiya ganda ravanhu vangu nenyama yavo pamapfupa avo; 3munodya nyama yavanhu vangu, muchibvisa ganda ravo, muchityora mapfupa avo kuita zvidimbu; munovagura-gura senyama yepoto, senyama iri mukati mehari. 4Ipapo vachachema kuna Baba vedu, asi havangavapinduri ivo; vachavavanzira chiso chavo panguva iyoyo, nokuda kwezvakaipa zvavakaita.
5Izvi ndizvo zvinotaura Baba vedu pamusoro pavaprofita vanotsausa vanhu vangu: kana vachipiwa zvokudya, vanodanidzira kuti, “Rugare,” asi vanorwisa munhu wose asingaisi chinhu mumiromo yavo. 6Naizvozvo usiku huchakuwirai, pasina chiratidzo; rima richava pamusoro penyu, pasina kushopera. Zuva richavirira vaprofita, uye zuva richasviba pamusoro pavo. 7Vaoni vachanyadziswa uye vashoperi vachanyara; vose vachafukidza miromo yavo nenyadzi, nokuti hakuna mhinduro inobva kuna Baba vedu.
8Asi kana ndirini, ndizere nesimba— noMweya waBaba vedu— uye nokururamisira nemasimba, kuti ndizivise Jakobho kumukira kwake naIsraeri chivi chake. 9Inzwai izvi, imi vatungamiri veimba yaJakobho navatongi veimba yaIsraeri, imi munozvidza kururamisira muchiminamisa zvose zvakarurama, 10munovaka Ziyoni nokudeura ropa uye Jerusarema nokusarurama. 11Vatungamiri vayo vanotonga nokuda kwefufuro, vaprista vayo vanodzidzisa nokuda kwemubhadharo, uye vaprofita vayo vanoshopera nokuda kwesirivha; asi vanosendama kuna Baba vedu vachiti, “Ko Baba vedu havazi pakati pedu here? Hapana njodzi ingatiwira.” 12Naizvozvo nokuda kwenyu Ziyoni richarimwa somunda, Jerusarema richava murwi wamatongo, uye gomo retemberi richava chikomo chakafukidzwa nesango.