ንህዝቦም ዝበልዑ መራሕቲ

እቲ ክሲ ብምስሉ ሰብ በላዒ እዩ፦ መራሕቲ ቘርበት ካብ ህዝቦም ዝገፍፉ፥ ንድስቲ ድማ ዝቘራርስዎም። ነብያት ንዝቕልቦም ሰላም ይሰብኩ፤ ኣቦና ግና ኣይመልሰሎምን። ብሰንኪ እዞም ሰባት እዚኦም፥ ፅዮን ክትሕረስ፥ እምባ ቤተ መቕደስ ከዓ ዱር ዝበቘሎ ኽኸውን እዩ።

ምዕራፍ 3።

ሽዑ ኸምዙይ በልኩ፦ ኣቱም መራሕቲ ያእቆብ፥ ኣቱም ኣሕሉቕ ቤት እስራኤል፥ ስምዑ! ፍርዲ ምፍላጥ ግቡእኩምዶ ኣይኮነን? ኣቱም ሰናይ ዝፀላእኹም፥ ክፉእ ከዓ ዘፍቀርኩም፥ ቘርበት ካብ ህዝበይ እትገፍፉ፥ ስጋኦም ከዓ ካብ ኣዕፅምቶም፤ እቶም ስጋ ህዝበይ እትበልዑ፥ ቘርበቶም እትገፍፉ፥ ኣዕፅምቶም ከዓ እትሰባብሩ፤ ከምቲ ንቍራዕ ዝኸውን ስጋ፥ ከምቲ ኣብ ውሽጢ ድስቲ ዘሎ ስጋ ከዓ ቘራሪስኩምዎም። ሽዑ ናብ ኣቦና ክእውዩ እዮም፥ ንሱ ግና ኣይመልሰሎምን እዩ፤ ስለ እቲ ዝገበርዎ ክፉእ፥ በቲ እዋን እቲ ገፁ ካብኣቶም ክሰውር እዩ።

ኣቦና ብዛዕባ እቶም ንህዝበይ ዘስሕቱ ነቢያት ከምዙይ ይብል ኣሎ፦ ምስ ተቐለቡ “ሰላም” ኢሎም ይእውዩ፥ ኣብ ኣፎም ገለ ዘየንብረሎም ሰብ ግና ውግእ የዳልዉሉ። ስለዙይ ለይቲ ኣብ ልዕሌኹም ክመፅእ እዩ፥ ራእይ ከዓ ኣይክህልወኩምን፤ ፀልማት ንኣኻትኩም ክኸውን እዩ፥ ጥንቍላ ከዓ ኣይክህልወኩምን። ፀሓይ ኣብ ልዕሊ እቶም ነቢያት ክትዓርብ እያ፥ መዓልቲ ኸዓ ኣብ ልዕሊኣቶም ክትፀልም እያ። እቶም ረአይቲ ክሓፍሩ፥ እቶም ጠንቈልቲ ኸዓ ክዋረዱ እዮም፤ ካብ ኣቦና መልሲ የለን እሞ፥ ኵሎም ኣፎም ብሕፍረት ክኽድኑ እዮም።

ኣነ ግና ንያእቆብ ዓመፁ፥ ንእስራኤል ከዓ ሓጢኣቱ ክነግር፥ ብሓይሊ፥ ብመንፈስ ኣቦና፥ ብፍርድን ብብርትዐን መሊአ ኣለኹ። እዙይ ስምዑ፥ ኣቱም መራሕቲ ቤት ያእቆብ፥ ኣቱም ኣሕሉቕ ቤት እስራኤል፥ ንፍርዲ እትንዕቑ፥ ነቲ ቅኑዕ ዘበለ ዅሉ ኸዓ እተቐይኑ፥ ንፅዮን ብደም፥ ንኢየሩሳሌም ከዓ ብዓመፅ እትሃንፁ። ኣሕሉቓ ብጉቦ ይፈርዱ፥ ካህናታ ብዋጋ ይምህሩ፥ ነቢያታ ኸዓ ብብሩር ይጥንቍሉ፤ ኰይኖም ግና ኣብ ኣቦና ይምርኰሱ እሞ “ኣቦናዶ ኣብ ማእኸልና የለን? ጥፍኣት ኣባና ኣይመፅእን እዩ” ይብሉ። ስለዙይ ብሰንክኹም ፅዮን ከም ግራት ክትሕረስ እያ፥ ኢየሩሳሌም ኵምራ ዑና ክትከውን እያ፥ እምባ ቤተ መቕደስ ከዓ ዱር ዝበቘሎ ኮረብታ ክኸውን እዩ።