Mika 3 FHB Father's Heart Bible™

3 ¹Sai na ce, Ku saurara, ya ku shugabannin Yakubu, da masu mulkin gidan Isra'ila! Ashe, ba aikinku ne ku san adalci ba? ²Ku da kuke ƙin nagarta kuna kuma ƙaunar mugunta, ku da kuke ɓanɓare fatar mutanena da namansu daga ƙasusuwansu; ³ku da kuke cin naman mutanena, kuna ɓanɓare fatarsu, kuna kuma farfasa ƙasusuwansu kucu-kucu; kuna yayyanka su kamar nama don tukunya, kamar tsoka a cikin babbar tukunya. ⁴Sa'an nan za su yi kuka ga Ubanmu, amma ba zai amsa musu ba; zai ɓoye fuskarsa daga gare su a wannan lokaci, saboda muguntar da suka yi.

⁵Ga abin da Ubanmu ya ce game da annabawan da suke ɓatar da mutanena. Sa'ad da aka ciyar da su, sukan yi shela, “Salama,” amma su yi shelar yaƙi a kan duk wanda bai sa musu kome a baki ba. ⁶Saboda haka dare zai sauko muku, babu wahayi; duhu gare ku, babu duba. Rana za ta faɗi a kan annabawa, yini kuma zai yi duhu a kansu. ⁷Masu gani za su sha kunya masu duba kuma za su ji kunya; dukansu za su rufe bakunansu domin kunya, gama babu amsa daga wurin Ubanmu.

⁸Amma ni dai, an cika ni da iko—da Ruhun Ubanmu—da kuma adalci da ƙarfi, domin in shelanta wa Yakubu laifinsa da kuma wa Isra'ila zunubinsa. ⁹Ku saurari wannan, ya ku shugabannin gidan Yakubu da masu mulkin gidan Isra'ila, ku da kuke rena adalci kuna kuma karkatar da duk abin da yake daidai, ¹⁰ku da kuke gina Sihiyona da zub da jini Urushalima kuma da mugun aiki. ¹¹Shugabanninta suna yin shari'a don cin hanci, firistocinta suna koyarwa don neman kuɗi, annabawanta kuma suna duba don azurfa; duk da haka suna jingina ga Ubanmu suna cewa, “Ashe, Ubanmu ba ya tare da mu ba ne? Babu masifar da za ta same mu.” ¹²Saboda haka saboda ku, za a nome Sihiyona kamar gona, Urushalima za ta zama tarin kango, dutsen haikali kuma zai zama tudun da jeji ya rufe.