Mika 3

3 ¹Nígbà náà ni mo wí pé: Ẹ gbọ́, ẹ̀yin olórí Jakọbu, ẹ̀yin alákòóso ilé Israẹli! Ǹjẹ́ kì í ṣe ojúṣe yín láti mọ ìdájọ́ òtítọ́? ²Ẹ̀yin tí ẹ kórìíra rere tí ẹ sì fẹ́ràn ibi, tí ẹ ya awọ ara àwọn ènìyàn mi àti ẹran-ara wọn kúrò ní egungun wọn; ³tí ẹ jẹ ẹran-ara àwọn ènìyàn mi, tí ẹ bọ́ awọ ara wọn, tí ẹ sì fọ́ egungun wọn wẹ́wẹ́; tí ẹ gé wọn sí wẹ́wẹ́ bí ẹran fún ìkòkò, bí ẹran inú ìkòkò ńlá. ⁴Nígbà náà ni wọn yóò ké pe Baba wa, ṣùgbọ́n òun kì yóò dá wọn lóhùn; yóò fi ojú rẹ̀ pa mọ́ fún wọn ní àkókò náà, nítorí ibi tí wọ́n ti ṣe.

⁵Èyí ni ohun tí Baba wa wí nípa àwọn wòlíì tí ń ṣi àwọn ènìyàn mi lọ́nà: nígbà tí a bá bọ́ wọn, wọ́n a kígbe pé, “Àlàáfíà,” ṣùgbọ́n wọ́n a kéde ogun sí ẹnikẹ́ni tí kò bá fi nǹkan sí wọn lẹ́nu. ⁶Nítorí náà, òru yóò dé bò yín, láìsí ìran; òkùnkùn fún yín, láìsí àfọ̀ṣẹ. Oòrùn yóò wọ̀ sórí àwọn wòlíì, ọjọ́ yóò sì ṣú lórí wọn. ⁷Ojú yóò ti àwọn aríran, ìtìjú yóò sì bo àwọn aláfọ̀ṣẹ; gbogbo wọn yóò sì bo ẹnu wọn nítorí ìtìjú, nítorí kò sí ìdáhùn láti ọ̀dọ̀ Baba wa.

⁸Ṣùgbọ́n ní tèmi, agbára kún inú mi—pẹ̀lú Ẹ̀mí Baba wa—àti pẹ̀lú ìdájọ́ òtítọ́ àti ipá, láti kéde fún Jakọbu ìṣọ̀tẹ̀ rẹ̀ àti fún Israẹli ẹ̀ṣẹ̀ rẹ̀. ⁹Ẹ gbọ́ èyí, ẹ̀yin olórí ilé Jakọbu àti ẹ̀yin alákòóso ilé Israẹli, tí ẹ kẹ́gàn ìdájọ́ òtítọ́ tí ẹ sì ń yí ohun gbogbo tí ó tọ́ po, ¹⁰tí ẹ fi ìtàjẹ̀sílẹ̀ kọ́ Síónì tí ẹ sì fi àìṣòdodo kọ́ Jerusalemu. ¹¹Àwọn olórí rẹ̀ ń ṣe ìdájọ́ fún àbẹ̀tẹ́lẹ̀, àwọn àlùfáà rẹ̀ ń kọ́ni fún owó, àwọn wòlíì rẹ̀ sì ń fọ àfọ̀ṣẹ fún fàdákà; síbẹ̀ wọ́n fẹ̀yìn tì Baba wa, wọ́n sì wí pé, “Ǹjẹ́ Baba wa kò ha wà láàrín wa? Ibi kankan kì yóò lè dé bá wa.” ¹²Nítorí náà, nítorí yín ni a ó tu Síónì nílẹ̀ bí oko, Jerusalemu yóò di àkójọ ahoro, òkè tẹmpili yóò sì di orí òkè tí igbó bò.