Ndị Ndu Na-eripịa Ndị Nke Ha

Ebubo ahụ na-eji ihe oyiyi nke iri mmadụ: ndị ndu na-agbapụ ndị ha akpụkpọ ahụ ma na-egbutu ha n'ite. Ndị amụma na-ekwusa udo nye onye ọ bụla na-enye ha nri; Nna anyị agaghị aza. N'ihi ndị ikom a, a ga-akọ Zayọn dị ka ubi, ugwu ụlọ nsọ ahụ ga-aghọkwa ọhịa.

Isi 3.

Mgbe ahụ, asịrị m: Geenụ ntị, unu ndị ndu Jekọb, unu ndị na-achị ụlọ Izrel! Ọ bụ na ọ bụghị ọrụ unu ịmara ihe ziri ezi? Unu ndị kpọrọ ihe ọma asị ma hụ ihe ọjọọ nʼanya, ndị na-adọwapụ akpụkpọ ahụ site nʼahụ ndị m na anụ ahụ ha site nʼọkpụkpụ ha; ndị na-eri anụ ahụ ndị m, na-agbapụ akpụkpọ ahụ ha, na-anyajikwa ọkpụkpụ ha ka ọ bụrụ iberibe; ndị na-egbupịa ha dịka anụ maka ite, dịka anụ dị nʼime ite ukwu. Mgbe ahụ, ha ga-etiku Nna anyị mkpu, ma ọ gaghị aza ha; nʼoge ahụ ọ ga-ezonarị ha ihu ya, nʼihi ihe ọjọọ ha mere.

Ihe a bụ ihe Nna anyị kwuru banyere ndị amụma na-eduhie ndị m ụzọ: mgbe e nyere ha nri, ha na-eti mkpu, “Udo,” ma na-ebo onye ọbụla na-etinyeghị ihe nʼọnụ ha agha. Ya mere, abalị ga-abịakwasị unu, nʼenweghị ọhụụ; ọchịchịrị ga-adịrị unu, nʼenweghị ịgba afa. Anyanwụ ga-adara ndị amụma, ụbọchị ga-agbakwa ọchịchịrị nʼelu ha. Ihere ga-eme ndị ọhụ ụzọ, a ga-emenyekwa ndị na-agba afa ihere; ha niile ga-ekpuchi ọnụ ha nʼihere, nʼihi na ọ dịghị ọsịsa sitere nʼaka Nna anyị.

Ma mụ onwe m, ejupụtara m nʼike—nke bụ Mmụọ nke Nna anyị—na ikpe ziri ezi na ịdị ike, iji kwupụta nye Jekọb nnupụisi ya na nye Izrel mmehie ya. Nụrụnụ nke a, unu ndị ndu ụlọ Jekọb na ndị na-achị ụlọ Izrel, ndị na-eleda ikpe ziri ezi anya ma na-agbagọ ihe niile ziri ezi, ndị na-ewu Zayọn site nʼịwụfu ọbara na Jerusalem site nʼajọ omume. Ndị ndu ya na-ekpe ikpe maka ngarị, ndị nchụaja ya na-ezi ihe maka ụgwọ, ndị amụma ya na-agba afa maka ọlaọcha; ma ha na-adabere na Nna anyị na-asị, “Ọ bụ na Nna anyị anọghị nʼetiti anyị? Ọ dịghị ihe ọjọọ ga-adakwasị anyị.” Ya mere, nʼihi unu ka a ga-akọ Zayọn dịka ala ubi, Jerusalem ga-aghọ ebe mkpọmkpọ ebe, ugwu ụlọnsọ ukwu ahụ ga-aghọkwa ugwu ọhịa tojuru.