ميکاه 3 FHB Father's Heart Bible™

3 ¹نو ما ووئيل چې، اے د يعقوب مشرانو، د اِسرائيل د کور حاکمانو، واورئ! آيا د انصاف پېژندل ستاسو کار نۀ دے؟ ²تاسو چې له نيکئ نه کرکه کوئ او له بدئ سره مينه لرئ، چې زما د خلقو نه څرمن شکوئ او د هغوئ د هډوکو نه غوښه؛ ³چې زما د خلقو غوښه خورئ، د هغوئ څرمن شکوئ، او د هغوئ هډوکى ټوټه ټوټه ماتوئ؛ تاسو هغوئ د ديګ دپاره د غوښې په شان ټوټه ټوټه کوئ، لکه د لوئ ديګ دننه غوښه. ⁴بيا به هغوئ زمونږ پلار ته چغې ووهى، خو هغه به ورته جواب ورنۀ کړى؛ هغه به په هغه وخت کښې خپل مخ ترې پټ کړى، د هغه بدئ په سبب چې هغوئ کړې ده.

⁵زمونږ پلار د هغو نبيانو په حقله چې زما خلق بې لارې کوى داسې فرمائى: کله چې هغوئ ته خوراک ورکولے شى، نو ”سلامتى“ وائى، خو چې څوک د هغوئ په خوله کښې څۀ نۀ اچوى، په هغۀ باندې د جنګ اعلان کوى. ⁶نو ځکه به په تاسو باندې شپه راشى، بې له رويا نه؛ تياره به ستاسو دپاره وى، بې له غيبګوئى نه. لمر به په نبيانو باندې پرېوځى، او ورځ به په هغوئ باندې تياره شى. ⁷غيب ليدونکى به شرمنده شى او فالبينان به رسوا شى؛ هغوئ به ټول خپلې خولې د شرم نه پټې کړى، ځکه چې د زمونږ پلار له لورې جواب نشته.

⁸خو څۀ چې زۀ يم، زۀ په قوت، د زمونږ پلار په روح، او په انصاف او طاقت ډک يم، دې دپاره چې يعقوب ته د هغۀ سرکشى او اِسرائيل ته د هغۀ ګناه اعلان کړم. ⁹دا واورئ، اے د يعقوب د کور مشرانو او د اِسرائيل د کور حاکمانو، چې له انصاف نه کرکه کوئ او هر هغه څۀ چې سم وى بګړوئ، ¹⁰چې صيون په وينو تويولو جوړوئ او يروشلم په ناانصافۍ. ¹¹د هغې مشران د رشوت دپاره فيصله کوى، د هغې امامان د قيمت دپاره ښوونه کوى، او د هغې نبيان د چاندئ دپاره غيب وائى؛ خو بيا هم هغوئ په زمونږ پلار باندې تکيه کوى او وائى چې، ”آيا زمونږ پلار په مونږ کښې نۀ دے؟ په مونږ باندې به هيڅ آفت رانۀ شى.“ ¹²نو ځکه ستاسو په سبب به صيون د پټى په شان قلبه کړے شى، يروشلم به د کنډوالو ډېرے شى، او د هيکل غونډۍ به د ونو نه ډکه لوړه شى.