ميکاه 4 FHB Father's Heart Bible™

4 ¹په وروستيو ورځو کښې به هغه غرۀ چې د زمونږ پلار کور پرې ولاړ دے، د ټولو غرونو نه اوچت او مضبوط شى، د غونډيو نه به پورته اوچت کړے شى، او قومونه به هغۀ ته راروان شى. ²ډېر قومونه به راشى او ووائى چې، ”راځئ، چې د زمونږ پلار غرۀ ته، د يعقوب د خُدائ پاک کور ته وخېژو، چې هغه مونږ ته خپلې لارې وښيى او مونږ د هغۀ په لارو وګرځو.“ ځکه چې تعليم به د صيون نه راووځى، او د زمونږ پلار کلام به د يروشلم نه. ³هغه به د ډېرو قومونو په مينځ کښې عدالت وکړى او د لرې پرتو زورورو قومونو جګړې به فېصله کړى. هغوئ به خپلې تورې د کروندې په اوزارو بدلې کړى او خپلې نېزې د کاتلو قېنچيو ته، يو قوم به بل قوم باندې توره پورته نۀ کړى، او نۀ به بيا د جنګ تربيت اخلى. ⁴هر سړے به د خپلې انګورو د ونې لاندې او د خپلې انځر د ونې لاندې کښېنى، او هيڅوک به هغوئ ونۀ وېروى، ځکه چې د آسمانى لښکرو پلار پخپله دا فرمائيلى دى. ⁵ځکه چې ټول قومونه د خپل خپل معبود په نامه ګرځى، خو مونږ به د زمونږ پلار په نامه تل تر تله ګرځو.

زمونږ پلار خپل خواره واره بچى راټولوى

⁶په هغه ورځ، زمونږ پلار فرمائى، زۀ به ګوډان راټول کړم او شړل شوى به سره راجمع کړم، هغه کسان چې ما پرې تکليف راوستے دے. ⁷زۀ به ګوډان باقى پاتې قوم کړم، او هغه چې لرې شړل شوى وُو، زورور قوم به يې کړم، او زمونږ پلار به د صيون په غرۀ باندې په هغوئ حکومت وکړى، د اوس نه تر تله.

⁸او اے تۀ د رمې برجه، د صيون د لور غونډۍ، تا ته به راشى — پخوانے اختيار به بيا راستون شى، د يروشلم د لور بادشاهى.

⁹اوس ولې په لوړ اواز ژاړې؟ آيا ستا په مينځ کښې بادشاه نشته؟ آيا ستا مشير هلاک شوے دے، چې درد دې داسې ونيوے لکه د زېږون په درد کښې ښځه؟ ¹⁰اے د صيون لورې، وتاو شه او چغې کوه، لکه د زېږون په درد کښې ښځه، ځکه چې اوس به تۀ د ښار نه ووځې او په ميدان کښې به اوسېږې، تۀ به بابل ته لاړې شې. هلته به تۀ خلاصه کړے شې، هلته به زمونږ پلار تا خلاص کړى د ستا د دښمنانو د لاس نه.

¹¹اوس ډېر قومونه ستا پر ضد راجمع شوى دى، وائى چې، ”دا دې ناپاکه شى، او زمونږ سترګې دې په صيون باندې خوشحالې شى.“ ¹²خو هغوئ د زمونږ پلار په خيالونو نۀ پوهيږى، او د هغۀ منصوبه نۀ درک کوى، چې هغۀ دوئ د دانو د وهلو ځائ ته د بنډلونو په شان راجمع کړى دى. ¹³اے د صيون لورې، پاڅه او دانې ووهه، ځکه چې زۀ به ستا ښکر اوسپنه کړم او ستا سومونه به پيتل کړم، تۀ به ډېر قومونه ماتۀ کړې، او د هغوئ ګټه به د زمونږ پلار دپاره وقف کړې، د هغوئ مال د ټولې زمکې مالِک ته.