Phangshuongei Seneibü Bou Shongha Loulabü
Phangshuong shuongei lamnyu lenla seneibü Bou shongh to angtilabü, hoba lulueibü in shuong youlatjin la yeitilabü, müt pendou jembü semlüh long phanga ahatko setlabü. Kheijinei chühshang tat chalou to sepeida: Zion labou aei tegü, Babilon to apyoan hauda, hoba lam ka khümenbü aying lausikei hanei khümenlabü.
4 1Phaikabü chalou shuonga seneibü Bou chem loan kibü shongh kho shongh pendou yoa thükenboutham la yaangko yaülabü, hoba shongh shuong danga thükto angtilabü, hoba phangshuongei kho aeto loulabü. 2Phangshuong juongei loulabü hoba laulabü, “Kaiya, sen seneibü Bou Shongh to, Jakobeibü Mühghaü chem to angkho, haoei sen to haoeibü lamnyu lenlabü lele, hoba sen haoeibü lamnyua pailabü.” Aishanga Ngühkhüm kho Zion ka longlabü, hoba seneibü Bou ngüh Jerusalem ka longlabü. 3Haoei phangshuong juong kanglanga matjemlabü hoba saabüa kibü hau kibü phangshuong shanga ngüh at matjemlabü. Haoenei lulueibü in shuong youlatjin la yeitilabü hoba lulueibü aubu shuong bhek shap la yeitilabü; phang cheei phang che khulimbo in ashinglabü, ayingsi haoenei touje wapyo aditletlabü. 4Müt pendou jembü semlüh long phanga setlabü hoba jembü bhuklong phanga, hoba aoeikei haoen to ahattilabü, aishanga lakjaibü dan Bou lolo joyokei. 5Aishanga phangshuong pendou jembü mühghaü namei paida, lausikei sen seneibü Bou namei ponpen thon akiko pailabü.
Seneibü Bouei Haoeibü Lintibü Shousi Shuong Yoshailabü
6Ho chaloua, dogo seneibü Bouei lauda, ngei lamenbü shuong yoshailabü hoba apyobü shuong yoshailabü, khei ngei khonkutibü shuong. 7Ngei lamenbü shuong joubü la yeitilabü, hoba saabüa apyobü shuong hau kibü phang che la yeitilabü, hoba seneibü Bouei Zion Shongha haoen thüka chobalabü, tou ka jaüan hoba ponpen thon akiko.
8Hoba no, sanlon laangchem, Zion nouyangnyu shongh, no aeto loulabü—shaangbü thüka songdakbü sepeilabü, Jerusalem nouyangnyu Sangle.
9Tou no aila ngüh longko haapda? No yoa choba aki lo? Kaibü songsido kubou mauakei lo, khei na hapbü yaksa tegü no onat khonkukei? 10Zion nouyangnyu, khonkua lühashi hoba ngühyoashi, na hapbü yaksa tegü, aishanga tou no sangnyu ka longlabü hoba atan seka kilabü; no Babilon to haulabü. Khünei no khümenlabü; khünei seneibü Bouei kaibü dangbou shuong ik ka no angngailabü.
11Tou phangshuong juong no khulimbo kamshaian kia, hoba lauda, “Sao leilutikuashi, hoba seneibü nyekei Zion to chühashi.” 12Lausikei haoenei seneibü Bou thounoubü angekei; haoenei haoeibü kümthen aditen, aishanga haoei haoen amshang to youthep tegü yoshaian kia. 13Zion nouyangnyu, meimeiashi hoba seinyinashi, aishanga ngei kaibü teklaang namkaang la yeitilabü hoba kaibü youmang chinam la yeitilabü; nyi phangshuong juong jangnyinkulabü, hoba nyi haoeneibü longbü seneibü Bou to, haoeneibü nyaksinam kaodak pendou Bunyubou to lemjan.
