Ndũũrĩrĩ Igũtherera Kĩrĩmainĩ kĩa Ithe Witũ
Ndũrĩrĩ nĩciambata kĩrĩma-inĩ kĩa Ithe witũ nĩguo irutwo, igacũra hiũ ciao cia njora ituĩke icuuri cia kũrĩma, o mũndũ agaikara rungu rwa mũthabibũ wake atekũmaka. Ningĩ mawoni magacooka ihinda-inĩ rĩu: Zayuni arĩ ruo-inĩ rwa gũciara, akiuma agathiĩ Babuloni, na akahonokerio kuo handũ ha kwehererio rũgendo rũu.
4 1Matukũinĩ ma kũrigĩrĩria, kĩrĩma kĩrĩa nyũmba ya Ithe witũ ĩrũgamĩte nĩgĩkahaandwo kĩrũmu gĩtuĩke kĩrĩa kĩraihĩĩte mũno gatagatĩinĩ ka irĩma, gĩkambatĩrĩrio igũrũ wa tũrĩma, nao andũ nĩmakaroora kũu. 2Ndũũrĩrĩ nyingĩ nĩigooka ciuge atĩrĩ, “Ũkai, tũhaice kĩrĩmainĩ kĩa Ithe witũ, tũthiĩ nyũmbainĩ ya Ngai wa Jakubu, nĩguo atũrute njĩra ciake na tũthiĩre tũcĩrainĩ twake.” Nĩgũkorwo ũrutani nĩũkoima Zayuni, nakĩo kiugo kĩa Ithe witũ kiume Jerusalemu. 3Nĩagatuithania andũ aingĩ ciira, na atue maciira ma ndũũrĩrĩ irĩ hinya iria irĩ kũraya. Nacio nĩikaturĩra hiũ ciao cia njora ituĩke mĩraũ, namo matimũ mao matuĩke hiũ cia gũceeha mĩtĩ; rũrĩrĩ rũtikooya rũhiũ rwa njora gũũkĩrĩra rũrĩrĩ rũngĩ, kana merute mbaara rĩngĩ. 4O mũndũ nĩagaikara rungu rwa mũthabibũ wake mwene na rungu rwa mũkũyũ wake mwene, na gũtirĩ mũndũ ũkaamamakia, nĩgũkorwo Ithe wa mbũtũ cia ita we mwene nĩarĩtie. 5Nĩgũkorwo ndũũrĩrĩ ciothe ithiiaga na rĩĩtwa rĩa ngai yacio nyene, no ithuĩ tũgaathiiaga na rĩĩtwa rĩa Ithe witũ tene na tene.
Ithe Witũ Acookanĩrĩria Ciana Ciake Iria Ciahurunjĩtwo
6Mũthenya ũcio, ũguo nĩguo Ithe witũ ekuuga, nĩngacookanĩrĩria arĩa ithua na njookererie hamwe arĩa maingatĩtwo, o acio ndanyariirĩte. 7Nĩngatua arĩa ithua matigari, na arĩa maingatĩirwo kũraya ndue rũrĩrĩ rũrĩ hinya, nake Ithe witũ nĩagaathana igũrũ rĩao kĩrĩmainĩ gĩa Zayuni kuuma rĩu nginya tene na tene.
8Nawe, mũthiringo wa rũũru, kĩrĩma gĩa mwarĩ wa Zayuni, kũrĩ we nĩgũgeeka—wathani wa tene nĩũgacooka, ũthamaki wa mwarĩ wa Jerusalemu.
9Rĩu nĩkĩĩ ũranĩrĩra na mũgambo mũnene? Kaĩ gũtarĩ mũthamaki thĩinĩ waku? Kana mũtaari waku nĩakuĩte, nĩ ũndũ ũcio ruo rũgakũnyiita ta mũtumia ũrĩ na mũheri? 10Thĩĩna na ũcaaye, wee mwarĩ wa Zayuni, ta mũtumia ũrĩ na mũheri, nĩgũkorwo rĩu nĩũkoima itũũrainĩ inene na ũtũũre werũinĩ; nĩũgathiĩ Babuloni. Kũu nĩũgahonokio; kũu Ithe witũ nĩagagũkũũra kuuma mookoinĩ ma thũ ciaku.
11Rĩu ndũũrĩrĩ nyingĩ nĩciũnganĩte igũũkĩrĩre, ikiugaga atĩrĩ, “Nĩathũkio, namo maitho maitũ merorere Zayuni makenete.” 12No matiũĩ meciiria ma Ithe witũ; na matitaũkĩrwo nĩ mũbango wake, atĩ nĩamacookanĩrĩirie ta itĩĩa cia ngano kĩhuhĩroinĩ. 13Ũkĩra ũhũũre ngano, wee mwarĩ wa Zayuni, nĩgũkorwo nĩngatua rũhĩa rwaku rwa kĩgera namo mahũngũ maku matuĩke ma gĩcango; nĩũkahehenja ndũũrĩrĩ nyingĩ, na nĩũkamũrĩra uumithio wao kũrĩ Ithe witũ, naguo ũtonga wao kũrĩ Mwathani wa thĩ yothe.