Haoeneibü Mütli Suibü Leiyeibü Shuong

Ngühmai kho müt shaubü tegü ki: leiyeibü shuong haoeneibü mütli ka khon wetan leida hoba thamchaka jinla phe tegü jemnyinda. Thuseibü shuongei haoen samtibü to sangmai songlenda; seneibü Bouei ajongailabü. Habü müt shuong shanga, Zion sek tegü lilalabü hoba lembüchem shongh yamlam tegü yeilabü.

Chapter 3.

Kheijinei ngei laukei, Ditashi, Jakob leiyeibü shuong, Israel chung songdakbü shuong! Ngühmai ngela kho kaneibü kümsilei aying lo? Kan maibü mangsenko amaibü sanoubü, kanei kü mütli ka khon wetan leida, hoba haoeneibü lo ka phe wetan leida; Aoei kü mütli phe shauda, haoeneibü khon sungenda, hoba haoeneibü lo netla yeiko leiluda; aoei haoen thamchaka jinla phe tegü jemnyinda, khaüchak maanga kibü phe tegü. Kheijinei haoenei Bou to ngeklabü, lausikei Haoei haoen to ajongailabü; kho jihsiphaia haoenei kümbü amaibü shanga Haoei haoen ka Haoeibü thenyek hulabü.

Kü mütli amaiko yeibü thuseibü shuong shanga Bouei hai lauda: ladang haoen to shaulaje, haoenei, “Sangmai,” dogo ngekda, lausikei haoeneibü sembunga aikei ajinkubü müt to haoenei wapyo khangda. Khoei mangsang akiko kan to khüyou loulabü; tetenbü akiko kan la nakthüh kilabü. Thuseibü shuong khulimbo chanyu neplabü, hoba chalou haoen khulimbo nakthüh yeitilabü. Mangsang hapbü shuong himouko kilabü, hoba seibüyaübü shuong the alenenko kilabü; haoen pendouei haoeneibü sembung küplepkulabü, himoubüei, aishanga Bou ka jongaibü aying.

Lausikei ngo kho, hau yoa, seneibü Bou Soushou yoa, hoba ngühmai hoba hau yoa shenan kia, Jakob to haoeibü meimeibü hoba Israel to haoeibü shabü lenla shanga. Ho ditashi, kan Jakob chung leiyeibü shuong hoba Israel chung songdakbü shuong, kanei ngühmai mangsenda hoba tükdebü pendou khüpeilangeida, Kanei siiei Zion dangda, hoba amaibüei Jerusalem dangda. Haoeibü leiyeibü shuongei besa shanga matjemda, haoeibü ungshedbou shuongei nam shanga lenda, hoba haoeibü thuseibü shuongei chandinam shanga seibü yaüda; aieilausi haoenei Bou to maanglemda hoba lauda, “Sen junga Bou aki aying lo? Sen to khonsak aloulabü.” Khoei kan shanga Zion sek tegü kao laütilabü, Jerusalem leilubü shaang che la yeitilabü, hoba lemshang shongh buhek longbü shongh khu tegü yeitilabü.