Bathwadisi bana bisi vukula batu ba bawu
Mfundu wenina hanga wa kudya batu: bathwadisi bana bisi botula lutu kwena batu bawu amana babazenga-zenga ndangu babatula mu nzungu. Bambikudi bisi samuna ngemba kwena wuna wisi bahana madya; kaasi Tata wetu kakála vutwala. Kikuma kya batu baba, Siyoni kakudimwa hanga kilanga amana mongu wa nzu ya Nzambi wasala wa miti.
Tata wetu kisi zonza mu mavese 5–7
3 1Amana meni nzimbudini: «Hinikinenu, bathwadisi ba Yakobi, yi bapfumu ba nzu ya Kiseledi! Ka kuzaya masonga ku kwenina kisalu kyenu?» 2Benu bana bisi menga mamboti amana bisi zola mambi, bana bisi botula lutu kwena batu bama, amana bisi katula musuni mya bawu ku mifufwa mya bawu; 3bana bisi dya musuni mya batu bama, amana bisi losa lutu lwa bawu, amana bisi tolula mifufwa mya bawu bitini-bitini; bana bisi bazenga-zenga hanga mbisi mu nzungu, hanga musuni mu kati dya nzungu yineni. 4Amana bakála tela Tata wetu, kaasi kabávutwalaku; kakála sweka mbunzu yandi kwena bawu muna tangwa dina, kikuma kya mambi mana bahánga.
5Tala mana Tata wetu kazimbudini kikuma kya bambikudi bana bisi totisa batu bama: tangwa bisi yukuta, bisi zimbula: «Ngemba», kaasi bisi samuna mvita kwena wuna kondi kubaheka kima mu munwa wa bawu. 6Yihana ni phipha yakála kwisa kwena benu, konda mbona mesu; phipha kwena benu, konda kubikula. Tangwa dyakála bwa kwena bambikudi, amana mwini wakála kituka phipha kwena bawu. 7Bana bisi mona mbona mesu bakála kwata tsoni, amana bana bisi bikula bakála yuka tsoni; boosu bakála fidinga munwa mya bawu, mu tsoni, mukuma ka henina mvutu ku kwena Tata wetu.
8Kaasi meni, yibasa yi ngolu, yi Kitembu kya Tata wetu, yi masonga yi kikesa, mu kusamuna kwena Yakobi mvwalangani yandi, yi kwena Kiseledi disumu dyandi. 9Yukenu mama, benu bathwadisi ba nzu ya Yakobi, yi bapfumu ba nzu ya Kiseledi, benu bana bisi lewula masonga amana bisi kulula byosu bina bisungama, 10benu bana bisi tunga Siyoni ni menga, yi Yelusalemi ni kukonda kwa masonga. 11Bathwadisi bandi bisi fundisa kikuma kya mbongu, banganga Nzambi bandi bisi longa kikuma kya thalu, amana bambikudi bandi bisi bikula kikuma kya fwalanga; kaasi bisi dihana kwena Tata wetu amana bisi zimbula: «Ka Tata wetu ku kenina ha kati dya betu? Ka phasi ku yilenda kwisa kwena betu.» 12Yihana ni, kikuma kya benu, bakála bundula Siyoni hanga kilanga, amana Yelusalemi dyakála kituka mulumba-lumba wa matadi mana mábwa, amana mongu wa nzu ya Nzambi wakála kituka mongu wa miti mya khatu.
