Makanda ma lawu mabwesuka ku mongu wa Tata wetu
Batu ba tsi babwesuka ku mongu wa Tata wetu hanga kabalonga, amana babeta mbedi za bawu bazikhitula bisalu bya kudima, kosu mutu kasíkuka ku tsi ya miti wandi wa vinu konda bweya. Buna mesu mavutuka ku mambu ma bwabu: Siyoni mu matekita ma kubuta, kwenda ku Babiloni, amana kuna kahuludilwa, kaasi ka kuvengwa nzila ku.
Tata wetu kisi zonza mu mavese 6–7
4 1Muna bilumbu bya tsuka, mongu wuna nzu ya Tata wetu yenina, wakála wasingama hanga mongu wumuluti myongu myosu, watombolwa hana thandu ya mina mya khunda, amana batu ba tsi babwesuka kwena wawu. 2Makanda ma lawu makwísa amana mazimbudi: «Luyiza, twenda ku mongu wa Tata wetu, ku nzu ya Nzambi wa Yakobi, hanga katulonga nzila zandi amana twadyata mu mikinda myandi.» Mukuma milongi myátuka ku Siyoni, amana Ndinga ya Tata wetu yatuka ku Yelusalemi. 3Yandi kazenga mambu hana kati dya batu ba tsi za lawu amana kayidika phaka za makanda ma ngolu mana mena kyana. Bakála beta mbedi za bawu, bazikhitula bisalu bya kudima, amana makonga ma bawu, mazikhitula bisalu bya kuzenga miti; kanda dikatombulaku mbedi mu kunwanisa kanda dyakwawu, amana bakálongukaku hika mu mvita. 4Kosu mutu kasíkuka ku tsi ya miti wandi wa vinu amana ku tsi ya mufiki wandi, amana ka mutu ku kabayukisa bweya, mukuma Tata wetu, Mukwa ngolu zoosu, yandi mosi wázonza. 5Mukuma batu ba tsi zoosu badyata mu khumbu ya nzambi wa bawu, kaasi betu, twadyata mu khumbu ya Tata wetu mu mvula yi mvula.
Tata wetu kakútikisa bana bandi bámwangana
6Muna kilumbu kina, kazimbudini Tata wetu, yikútikisa bifwa malu amana yikhundikisa bana balosiwa, bana yábanyokula. 7Yikhitula bifwa malu ndambu yisadini, amana bana bábengwa kyana, yikhitula kanda dya ngolu, amana Tata wetu kayala ha thandu ya bawu ku mongu wa Siyoni tuka buthwena yi mu mvula yi mvula.
8Amana ngeyi, kaleyi kya kibuka kya mikoku, londi dya mwana wa ndumba wa Siyoni, kwena ngeyi lwakwísa—luyalu lwa khulu lwavutuka, Kipfumu kya mwana wa ndumba wa Yelusalemi.
9Buthwena, kikuma kya biki wisi kalunga ni ndinga ya ngolu? Kweku kinga wena hana kati dya ngeyi? Mulongisidi waku wázimbana, hanga misongu mikukwati bwosu mukhetu wisi buta? 10Wunyokuka amana wuhuma, mwana wa ndumba wa Siyoni, hanga mukhetu wisi buta, mukuma buthwena, ngeyi wátuka mu mbanza amana wazinga mu tseki; wenda ku Babiloni. Kuna, ngeyi wahúluka; kuna, Tata wetu kalubula ngeyi mu koku dya bambeni baku.
11Buthwena, makanda ma lawu mákutakana mu kunwanisa ngeyi, mazimbudi: «Kabebiswa, amana mesu metu matala Siyoni ni kyesi.» 12Kaasi bawu bázayaku mabanza ma Tata wetu; bázayaku lukanu lwandi, ni yandi wábakutikisa bawu hanga minkangu mya ngenza ku buala bwa kudimina. 13Telama amana wudima, mwana wa ndumba wa Siyoni, mukuma yikhitula mphoka yaku ni kisengu amana bitambi byaku ni kisengu kya tumba; wafukumuna batu ba tsi za lawu, amana wahana bimvwama bya bawu kwena Tata wetu, kimvwama kya bawu kwena Pfumu wa tsi yosu.
