Zaburi 86

86 ¹ Utege sikio lako unisikie, Baba yangu; unijibu kwa maana mimi ni maskini na mhitaji.

² Ulinde nafsi yangu, kwa maana nimejitoa kwako; mwokoe mtumishi wako anayekutumaini—wewe ndiwe Baba yangu. ³ Unifadhili, Baba yangu mwenye enzi, kwa maana nakulilia mchana kutwa. ⁴ Uifurahishe nafsi ya mtumishi wako, kwa maana nakuinulia nafsi yangu, Baba yangu mwenye enzi.

⁵ Kwa maana wewe, Baba yangu mwenye enzi, u mwema na mwenye kusamehe, umejaa upendo wa agano kwa wote wakuitao. ⁶ Sikia maombi yangu, Baba yangu; usikilize kusihi kwangu kwa huruma. ⁷ Siku ya taabu yangu ninakuita, nawe wanijibu.

⁸ Hakuna aliye kama wewe miongoni mwa miungu, Baba yangu mwenye enzi, wala hakuna matendo kama yako. ⁹ Mataifa yote uliyoyafanya yatakuja na kusujudu mbele zako, Baba yangu mwenye enzi, nao watalitukuza jina lako. ¹⁰ Kwa maana wewe u mkuu, na kutenda maajabu; wewe peke yako ndiwe Baba yangu.

¹¹ Nifundishe njia yako, Baba yangu, nipate kuenenda katika kweli yako; unipe moyo usiogawanyika ili niliche jina lako. ¹² Nitakusifu, Baba yangu mwenye enzi, kwa moyo wangu wote, nami nitalitukuza jina lako milele. ¹³ Kwa maana upendo wako wa agano ni mkuu juu yangu; umeiokoa nafsi yangu kutoka vilindi vya kuzimu. ^a a v13 Kuzimu ni jina la Kiebrania la makao ya wafu, linalowaziwa kuwa mahali pa ndani zaidi kuliko mahali popote paweza kuwaziwa.

¹⁴ Baba yangu, watu wenye kiburi wameinuka juu yangu; kundi la watu wakatili wanaitafuta nafsi yangu, wala hawakukuweka wewe mbele yao. ¹⁵ Bali wewe, Baba yangu mwenye enzi, u Baba mwenye huruma na neema, si mwepesi wa hasira, umejaa upendo wa agano na uaminifu. ¹⁶ Unigeukie, unifadhili; umpe mtumishi wako nguvu zako, umwokoe mwana wa mjakazi wako. ¹⁷ Nionyeshe ishara ya wema wako, ili wanaonichukia wapate kuona na kutahayari, kwa maana wewe, Baba yangu, umenisaidia na kunifariji.