መዝሙር 86 FHB Father's Heart Bible™

86 ¹ኦ ኣቦይ፥ ኣድኒንካ ስምዐኒ፤ ኣነ ድኻን ፅጉምን እየ እሞ፥ መልሰለይ።

²ህይወተይ ሓሉ፥ ኣነ ንኣኻ እሙን እየ እሞ፤ ነቲ ብኣኻ ዝተወከለ ባርያኻ ኣድሕን፤ ንስኻ ኣቦይ ኢኻ። ³ኦ ጐይታይ ኣቦይ፥ ምሉእ መዓልቲ ናባኻ እእዊ ኣለኹ እሞ፥ መሓረኒ። ⁴ንነፍሲ ባርያኻ ኣሐጕሳ፤ ነፍሰይ ናባኻ ኣልዕል ኣለኹ እሞ፥ ኦ ጐይታይ ኣቦይ።

⁵ኦ ጐይታይ ኣቦይ፥ ንስኻ ሰናይን ይቕረ በሃልን ኢኻ እሞ፥ ነቶም ዝፅውዑኻ ዅሎም ምሕረትካ ዝበዝሐ እዩ። ⁶ኦ ኣቦይ፥ ፀሎተይ ስማዕ፤ ድምፂ ምህለላይ ድማ ኣቕልብ። ⁷ብጊዜ መከራይ ናባኻ እፅውዕ፤ ንስኻ ድማ ትምልሰለይ።

⁸ኦ ጐይታይ ኣቦይ፥ ኣብ መንጎ ኣማልኽቲ ኸማኻ የለን፤ ከም ግብርኻ ዝበለ ግብሪውን የለን። ⁹ኵሎም እቶም ዝፈጠርካዮም ኣህዛብ፥ ኦ ጐይታይ ኣቦይ፥ መፂኦም ኣብ ቅድሜኻ ክሰግዱ እዮም፤ ንስምካ ድማ ከኽብሩ እዮም። ¹⁰ንስኻ ዓብዪ ኢኻ፥ ተኣምራት ድማ ትገብር ኢኻ እሞ፤ ንስኻ በይንኻ ኣቦይ ኢኻ።

¹¹ኦ ኣቦይ፥ መንገድኻ መሃረኒ፥ ብሓቅኻ ክኸይድ፤ ስምካ ንምፍራሕ ዘይተኸፈለ ልቢ ሃበኒ። ¹²ኦ ጐይታይ ኣቦይ፥ ብምሉእ ልበይ ከመስግነካ እየ፤ ንስምካ ድማ ንዘለኣለም ከኽብሮ እየ። ¹³ምሕረትካ ናባይ ዓብዪ እዩ እሞ፤ ንነፍሰይ ካብ ታሕተዋይ ሲኦል ኣድሓንካያ። ^a a v13 ሲኦል ናይቲ ዓለም ምዉታት ዕብራይስጢ ስም እዩ፥ ከምቲ ኻብ ኵሉ ዝዓመቐ ቦታ ጌርካ ዝሕሰብ።

¹⁴ኦ ኣቦይ፥ ዕቡያት ኣብ ልዕለይ ተንሲኦም፤ ጭፍራ ጨካናት ንነፍሰይ ይደልዩ፤ ንኣኻ ድማ ኣብ ቅድሚኦም ኣየንበሩኻን። ¹⁵ኦ ጐይታይ፥ ንስኻ ግና መሓርን ለጋስን ኣቦ ኢኻ፥ ንቝጥዓ ደንጓዪ፥ ምሕረትን ሓቅን ዝበዝሐ ኢኻ። ¹⁶ናባይ ተመልከት መሓረኒ ድማ፤ ንባርያኻ ሓይልኻ ሃቦ፤ ንወዲ ገረድካ ድማ ኣድሕን። ¹⁷ናይ ሰናይ ምልክት ኣርእየኒ፥ እቶም ዝፀልኡኒ ሪኦም ክሓፍሩ፤ ኦ ኣቦይ፥ ንስኻ ረዲእካንን ኣፀናኒዕካንን ኢኻ እሞ።