സങ്കീർത്തനങ്ങൾ 86 FHB Father's Heart Bible™

86 ¹എന്റെ പിതാവേ, അങ്ങ് ചെവി ചായിച്ച് എന്റെ അപേക്ഷ കേൾക്കണമേ; എനിക്ക് ഉത്തരമരുളണമേ; ഞാൻ ദരിദ്രനും അഗതിയുമാകുന്നു.

²എന്റെ ജീവനെ കാത്തുകൊള്ളണമേ, ഞാൻ അങ്ങേക്കു സമർപ്പിതനാകുന്നു; അങ്ങയിൽ ആശ്രയിക്കുന്ന അങ്ങയുടെ ദാസനെ രക്ഷിക്കണമേ— അങ്ങ് എന്റെ പിതാവാകുന്നു. ³എന്റെ നാഥനായ പിതാവേ, എന്നോടു കൃപയുണ്ടാകണമേ; ദിവസം മുഴുവൻ ഞാൻ അങ്ങയോടു നിലവിളിക്കുന്നു. ⁴എന്റെ നാഥനായ പിതാവേ, അങ്ങയുടെ ദാസന്റെ ആത്മാവിനെ സന്തോഷിപ്പിക്കണമേ; ഞാൻ എന്റെ ആത്മാവിനെ അങ്ങയിലേക്ക് ഉയർത്തുന്നു.

⁵എന്റെ നാഥനായ പിതാവേ, അങ്ങ് നല്ലവനും ക്ഷമിക്കുന്നവനും, അങ്ങയെ വിളിച്ചപേക്ഷിക്കുന്ന എല്ലാവരോടും ഉടമ്പടിസ്നേഹത്താൽ സമൃദ്ധനുമാകുന്നു. ⁶എന്റെ പിതാവേ, എന്റെ പ്രാർഥന കേൾക്കണമേ; കരുണയ്ക്കായുള്ള എന്റെ യാചനകൾ ശ്രദ്ധിക്കണമേ. ⁷കഷ്ടതയിലായിരിക്കുമ്പോൾ ഞാൻ അങ്ങയോടു നിലവിളിക്കുന്നു, അങ്ങ് എനിക്ക് ഉത്തരമരുളുന്നു.

⁸എന്റെ നാഥനായ പിതാവേ, ദേവന്മാരുടെ ഇടയിൽ അങ്ങയെപ്പോലെ ആരുമില്ല, അങ്ങയുടെ പ്രവൃത്തികൾപോലെ ഒന്നുമില്ല. ⁹എന്റെ നാഥനായ പിതാവേ, അങ്ങ് സൃഷ്ടിച്ച സകല ജനതകളും വന്ന് അങ്ങയുടെ മുമ്പിൽ നമസ്കരിക്കും, അങ്ങയുടെ നാമത്തെ മഹത്ത്വപ്പെടുത്തും. ¹⁰അങ്ങ് മഹാനാകുന്നു, അത്ഭുതകാര്യങ്ങൾ പ്രവർത്തിക്കുന്നു; അങ്ങ് മാത്രമാണ് എന്റെ പിതാവ്.

¹¹എന്റെ പിതാവേ, അങ്ങയുടെ വഴി എന്നെ പഠിപ്പിക്കണമേ, ഞാൻ അങ്ങയുടെ സത്യത്തിൽ നടക്കേണ്ടതിന്; അങ്ങയുടെ നാമത്തെ ഭയപ്പെടേണ്ടതിന് അവിഭക്തമായ ഒരു ഹൃദയം എനിക്കു നൽകണമേ. ¹²എന്റെ നാഥനായ പിതാവേ, പൂർണഹൃദയത്തോടെ ഞാൻ അങ്ങയെ സ്തുതിക്കും, അങ്ങയുടെ നാമത്തെ എന്നേക്കും മഹത്ത്വപ്പെടുത്തും. ¹³എന്നോടുള്ള അങ്ങയുടെ ഉടമ്പടിസ്നേഹം വലുതാകുന്നു; പാതാളത്തിന്റെ ആഴങ്ങളിൽനിന്ന് അങ്ങ് എന്റെ ആത്മാവിനെ വിടുവിച്ചിരിക്കുന്നു. ^a a v13 മരിച്ചവരുടെ ലോകത്തിന് എബ്രായഭാഷയിലുള്ള പേരാണ് ഷിയോൾ; സങ്കൽപ്പിക്കാവുന്നതിൽ ഏറ്റവും ആഴമേറിയ സ്ഥലമായി അതിനെ ചിത്രീകരിച്ചിരിക്കുന്നു.

¹⁴എന്റെ പിതാവേ, ധിക്കാരികൾ എനിക്കെതിരേ എഴുന്നേറ്റിരിക്കുന്നു; ക്രൂരന്മാരുടെ ഒരു കൂട്ടം എന്റെ ജീവനെ അന്വേഷിക്കുന്നു, അവർ അങ്ങയെ ഗണ്യമാക്കുന്നതേയില്ല. ¹⁵എന്നാൽ എന്റെ നാഥനായ പിതാവേ, അങ്ങ് കരുണയും കൃപയുമുള്ള പിതാവാകുന്നു, കോപത്തിനു താമസമുള്ളവനും ഉടമ്പടിസ്നേഹത്തിലും വിശ്വസ്തതയിലും സമൃദ്ധനുമാകുന്നു. ¹⁶എന്റെ നേരേ തിരിഞ്ഞ് എന്നോടു കൃപയുണ്ടാകണമേ; അങ്ങയുടെ ദാസന് അങ്ങയുടെ ബലം നൽകണമേ, അങ്ങയുടെ ദാസിയുടെ മകനെ രക്ഷിക്കണമേ. ¹⁷അങ്ങയുടെ പ്രീതിയുടെ ഒരു അടയാളം എനിക്കു കാണിച്ചുതരണമേ, എന്നെ വെറുക്കുന്നവർ അതു കണ്ടു ലജ്ജിക്കേണ്ടതിന്; എന്റെ പിതാവേ, അങ്ങ് എന്നെ സഹായിച്ച് ആശ്വസിപ്പിച്ചിരിക്കുന്നു.