Kubokwadila kwa Tavidi kwena Tata wandi
Lombilu lwa Tavidi.
Tavidi wisi lomba hanga mutu wa phutu yi wa mupfunu, wisi samuna mana kazaya ma Tata wandi — wa mboti, wisi lolula, kweku wunkaka wafwana yandi ku, yi khenda zayingi za bulunda. Ku tsi ya lombilu lwosu luna lwenina lombilu lunkaka: mbundu yikonda luhuku, amana kidimbu kisi monika hanga bambeni bandi bamona nani wámusadisa.
86 1Benda amana wungyuka, A Tata wama; wungivutula, mukuma meni yenina phutu yi wa mupfunu.
2Kengila luzingu lwama, mukuma meni yikangama kwena ngeyi; hulula muhika waku wuna wisi kwikila mwena ngeyi—ngeyi wenina Tata wama. 3Wungyukila kyadi, A Pfumu Tata wama, mukuma yibokwadila kwena ngeyi mu kilumbu kyosu. 4Pheka kyesi muna moya wa muhika waku, mukuma yitombula moya wama kwena ngeyi, A Pfumu Tata wama.
5Mukuma ngeyi, A Pfumu Tata wama, wenina wa bukheti yi wisi lolula, wena yi khenda zayingi kwena boosu bana bisi kutela. 6Wungyuka lombilu lwama, A Tata wama; hinikina kubokwadila kwama kwa kyadi. 7Muna tangwa yenina mu kiwayi, yibokwadila kwena ngeyi, amana wungivutula.
8Mu kati dya banzambi, kweku wuna wafwana ngeyi, A Pfumu Tata wama, amana kweku mihangu mina mifwana myaku. 9Makanda moosu mana wáhanga makwísa amana makafúkama ku thwala yaku, A Pfumu Tata wama, amana makakémbisa khumbu yaku. 10Mukuma ngeyi wenina wa mbuta amana wisi hanga mambu ma kuyituka; ngeyi mosi wenina Tata wama.
11Wungilonga nzila yaku, A Tata wama, hanga yadyatila mu kyedika kyaku; wumpheka mbundu yimosi yikonda luhuku hanga yakala yi bweya bwa khumbu yaku. 12Yikazátula ngeyi, A Pfumu Tata wama, yi mbundu yama yosu, amana yikakémbisa khumbu yaku mvula yi mvula. 13Mukuma khenda zaku kwena meni zenina za mbuta; wáhulula moya wama mu dingu dya kalunga. a a v13 Sheol yenina khumbu, mu ndinga ya Kiebeleo, ya homa ya bafwa, hana basongisa hanga homa hakuluta dingu hana mutu kalenda banza.
14A Tata wama, batu bakonda luzitu bátelama mu kunwanisa meni; kanga dya batu ba mbundu za ngolu bisi sanda luzingu lwama, amana babanzaku ngeyi. 15Kaasi ngeyi, A Pfumu Tata wama, wenina Tata wa kyadi yi wa khenda, wa malembi mu kuyuka khabu amana wena yi khenda yi kwikama zayingi. 16Baluka kwena meni amana wungyukila kyadi; pheka ngolu zaku kwena muhika waku, amana hulula mwana wa muhika waku wa nkento. 17Wungisongila kidimbu kya mamboti maku, hanga bana bisi menga meni bamona amana bayuka tsoni, mukuma ngeyi, A Tata wama, wungisadisini amana wumphekiki kikesa.
