How David Cry to Im Papa
Prayer wey David pray.
86 1 Bend down come hear me, my Papa; answer me, because I be poor and I dey need help.
2 Guard my life, because I don give myself to you; save your servant wey dey trust you—na you be my Papa. 3 Show me grace, my Sovereign Papa, because na you I dey cry to di whole day. 4 Bring joy give your servant soul, because na to you I dey lift up my soul, my Sovereign Papa.
5 Because you, my Sovereign Papa, good and you dey forgive, you get plenty Covenant love wey no dey change give everybody wey dey call you. 6 Hear my prayer, my Papa; listen to as I dey beg for mercy. 7 Wen trouble catch me, I dey call you, and you dey answer me.
8 Nobody dey like you among di gods, my Sovereign Papa, and no work dey like your own. 9 All di nations wey you make go come bow down for your front, my Sovereign Papa, and dem go glorify your name. 10 Because you great and you dey do wonderful things; na only you be my Papa.
11 Teach me your way, my Papa, so dat I go waka for your truth; give me heart wey no divide so I go fear your name. 12 I go praise you, my Sovereign Papa, with all my heart, and I go glorify your name forever. 13 Because your Covenant love wey no dey change big well well for me; you don save my soul from di deep-deep place of di grave. a a v13 Sheol na di Hebrew name for di place of di dead people, wey dem dey picture as di deepest place wey person fit imagine.
14 My Papa, proud people don rise against me; group of wicked people dey find my life, and dem no dey think about you at all. 15 But you, my Sovereign Papa, na Papa wey im belle dey pain am for people and wey full of grace, wey no dey quick vex and wey get plenty Covenant love wey no dey change and faithfulness. 16 Turn come my side and show me grace; give your servant your power, and save di pikin of your woman-servant. 17 Show me sign of your favor, so dat di people wey hate me go see am and shame catch dem, because you, my Papa, don help me and don comfort me.
