Laa 86

86 ¹Nāshungda nganāmilu, O iwui Avā; ngahānkāmilu, kaja iya khangazana khavātana.

²Iwui mirin ngākmilu, kaja I nawuili ngatha̱ kahaina; nali shitkasanga narao chi huimilu; Na iwui Avāna. ³Ili lumashanmilu, O iwui Awunga Avā, kaja ina zimiksho tākamli nali ngakaowa. ⁴Naraowui manglāli mathān ngasakmilu, kaja imanglā nali yangkāli, O iwui Awunga Avā.

⁵Kaja Na, O iwui Awunga Avā, kaphā kala pheokhamena, nali kakaobing saikorali makhangachei leikashina pemtinghai. ⁶Iwui seihā kasā kashāmilu, O iwui Avā; iwui kapo khuisangmilu. ⁷Iwui kakhanang atamli ina nali ngakaowa, kala nana ili ngahānkāra.

⁸Varebing alungli Na kathā khipākha maleimana, O iwui Awunga Avā, kala nawui otsak kathā otla maleimana. ⁹Nana sākahai yur saikorana nawui mangāli rākhorumra, O iwui Awunga Avā, kala athumna naming tekmatei ngasakra. ¹⁰Kaja Na reikhamataina kala matakhak kahai ot sai; namāngna iwui Avāna.

¹¹Nawui apong ili tamchitheimilu, O iwui Avā, chieina ina nawui khamashungli zatra; namingli khangachee khavai, ning khani makasā wuklung ili khamilu. ¹²Ina ining tongda nali sochikatra, O iwui Awunga Avā, kala naming ina mashimānda tekmatei ngasakra. ¹³Kaja nawui makhangachei leikashi iwui vang hakmahālaka; nana kathuka chomwui eina imanglā khāngshokmihaira. ^a a v13 Sheol chi Hebrew tuili kathebingwui rampamwui aming, phaning shapkhai apam saikorawui alungli kathukmeikap kaji da phaningkahaina.

¹⁴O iwui Avā, mashitkasangabingna iwuitungli ngakarthuihaira; lukhamashan makathei mibing kaphungtonna iwui mirin khuikhavai phāda lei, kala athumna nali maphaningmana. ¹⁵Kha Na, O iwui Awunga Avā, lumashan leishikatha Avāna, malung mavātzarmana kala makhangachei leikashi kala ningkatongna pemtinghai. ¹⁶Iwuishong ngareirāda ili lumashanmilu; naraoli nawui pangshap khamilu, kala narao sha̱naowui naomayarali huimilu. ¹⁷Nawui mayākhamiwui machut akha ili chitheimilu, chieina ili yangkakharingbingna theida khayakra, kaja Na, O iwui Avā, ili ngachonmi kala ili ringphā ngasakhaira.