Corahwui naomayarabing
Laa masā ngasenamipawui vang. Corahwui naomayarabingwui laa akha.
Ithumwui Avāna hi mibingli pheomikahai leisai, kala zingkum ngalakta malungvātchingluimakhavai ngalakta pheomilu da kaso. Athumna nganākahai khamathāng chi chingri, kala mangāli: makhangachei leikashi kala ningkatong akha eina akha samphang, khamashung khangarong kala chingri maya̱khui, kala ngaleina awui mahā vaia.
85 1Nana nawui ngaleili ngahānkhangai chitheihaira, O ithumwui Avā; nana Jacobwui lan hankhamihaira. 2Nana nawui mibingwui khayonkhamāng pheomihaira; nana athumwui morei saikora khaluiphinhaowa. 3Nana nawui malungkhavāt saikora khuithuihaira; nana nawui malungkathui ngalanthuihaira.
4Ithumli kakhuisangmiluishitlu, O ithumwui Avā, ithumwui huikhame; ithumwuitungli nawui malungkakang khuithuiulu. 5Nana ithumli katang mavaila malungvātchingra? Nana thot kachida nawui malungkhavāt maraithāluira? 6Nana ithumli mathuk ngasakluishitmarala, chithākha nawui mibingna nali ringphāra? 7Ithumli nawui makhangachei leikashi chitheimilu, O ithumwui Avā, kala ithumli nawui huikhami khamilu.
8Ithumwui Avāna kahāng chi ina nganāra, kaja ana awui mibingli, awui katharabingli chingri kahaiwui tui hāngra; kha athumna athumwui mangkhama̱a apongshong malatungranu. 9Kachangkhat eina awui huikhami chi ali khangacheebingli nganailakhaira, chithākha tekhamatei ithumwui ngaleili pānra. 10Makhangachei leikashi kala ningkatongna akha eina akha samphanghaira; khamashung khangarong kala chingri kahaina akha eina akha maya̱khuihaira. 11Ningkatong chi ngaleiwui eina shokra, kala khamashung khangarong chi kazing eina yangtāra. 12Mha, ithumwui Avāna kaphā chi mira, kala ithumwui ngaleina awui mahā chi vaira. 13Khamashung khangarongna awui mangāli rizatra, kala awui pheikārwui vang apong ngarānra.
