詩篇 85

85 ¹我哋嘅父啊,你曾經施恩畀你嘅土地;你使雅各復興過嚟。 ²你赦免咗你子民嘅罪過; 你遮蓋咗佢哋一切嘅罪。 ³你收回咗你一切嘅忿怒;你轉離咗你嘅烈怒。

⁴我哋嘅父,我哋嘅拯救啊,求你使我哋復興; 求你除去對我哋嘅惱怒。 ⁵你會唔會永遠向我哋發怒呢? 你嘅怒氣會唔會延續到世世代代呢? ⁶你唔會再一次使我哋甦醒過嚟, 好等你嘅子民可以因你而歡喜咩? ⁷我哋嘅父啊,求你向我哋顯明你嘅約之慈愛,又賜畀我哋你嘅拯救。

⁸我要聽我哋嘅父會講啲乜嘢, 因為佢會向佢嘅子民、向佢嘅忠信之人講平安;只不過,唔好畀佢哋轉返去愚昧嘅路。 ⁹佢嘅拯救實在近敬畏 佢嘅人,好使榮耀可以住喺我哋嘅土地。 ¹⁰慈愛同信實彼此相遇; 公義同平安互相親嘴。 ¹¹信實從地裏發生出嚟, 公義從天上俯視落嚟。 ¹²係㗎,我哋嘅父會賜下美善嘅嘢, 我哋嘅土地都會出產佢嘅收成。 ¹³公義要行喺佢前頭, 為佢嘅腳步預備道路。