சங்கீதம் 85

85 ¹ எங்கள் பிதாவே, தேவரீர் உம்முடைய தேசத்திற்குத் தயவு காண்பித்தீர்; யாக்கோபின் சிறையிருப்பைத் திருப்பினீர். ² உம்முடைய ஜனத்தின் அக்கிரமத்தை மன்னித்தீர்; அவர்களுடைய பாவமெல்லாம் மூடினீர். சேலா. ³ உம்முடைய உக்கிரம் அனைத்தையும் விலக்கினீர்; உம்முடைய கோபாக்கினியைவிட்டுத் திரும்பினீர்.

⁴ எங்கள் பிதாவே, எங்கள் இரட்சிப்பே, எங்களைத் திரும்பச் சீர்படுத்தும்; எங்கள்மேலுள்ள உமது கோபத்தை நீக்கிவிடும். ⁵ என்றென்றைக்கும் எங்கள்மேல் கோபமாயிருப்பீரோ? தலைமுறை தலைமுறையாக உமது கோபத்தை நீடிக்கச் செய்வீரோ? ⁶ எங்களைத் திரும்பவும் உயிர்ப்பிக்கமாட்டீரோ? உம்முடைய ஜனம் உம்மில் மகிழும்படியாக? ⁷ எங்கள் பிதாவே, உம்முடைய உடன்படிக்கையின் அன்பை எங்களுக்குக் காண்பியும், உம்முடைய இரட்சிப்பை எங்களுக்குத் தந்தருளும்.

⁸ எங்கள் பிதா சொல்வதை நான் கேட்பேனாக; அவர் தம்முடைய ஜனத்துக்கும் தம்முடைய பரிசுத்தவான்களுக்கும் சமாதானத்தைப் பேசுவார்; ஆனாலும் அவர்கள் தங்கள் மதிகேட்டான வழிகளுக்குத் திரும்பாதிருப்பார்களாக. ⁹ அவருக்குப் பயந்தவர்களுக்கு அவருடைய இரட்சிப்பு நிச்சயமாய் சமீபமாயிருக்கிறது, நமது தேசத்தில் மகிமை வாசம்பண்ணும்படியே. ¹⁰ உறுதியான அன்பும் உண்மையும் ஒன்றையொன்று சந்தித்தன; நீதியும் சமாதானமும் ஒன்றையொன்று முத்தமிட்டன. ¹¹ உண்மை பூமியிலிருந்து முளைக்கும், நீதி வானத்திலிருந்து கீழே நோக்கிப் பார்க்கும். ¹² ஆம், எங்கள் பிதா நன்மையானதைத் தந்தருளுவார், நமது தேசம் தன் விளைச்சலைத் தரும். ¹³ நீதி அவருக்கு முன்பாகச் செல்லும், அவருடைய அடிச்சுவடுகளுக்கு வழியை ஆயத்தம்பண்ணும்.