'Ya'yan Kora
Ga mai bi da waƙa. Zabura ta 'ya'yan Kora.
Ubanmu ya taɓa gafarta wa waɗannan jama'a a dā, suna kuma roƙonsa ya sāke yin haka maimakon ya ci gaba da fushi har tsararraki. Amsar da suka ji ita ce salama, da kuma hoto: ƙauna da aminci suna saduwa, adalci da salama suna sumbatar juna, ƙasa tana ba da girbinta.
85 1Ka nuna alheri ga ƙasarka, ya Ubanmu; ka maido da wadatar Yakubu. 2Ka gafarta laifin mutanenka; ka rufe dukan zunubansu. 3Ka janye dukan hasalarka; ka juya daga zafin fushinka.
4Ka maido da mu, ya Ubanmu, mai cetonmu; ka kawar da hushinka a kanmu. 5Za ka yi fushi da mu har abada? Za ka ja fushinka cikin dukan tsararraki? 6Ba za ka sāke rayar da mu ba, domin mutanenka su yi farin ciki a cikinka? 7Ka nuna mana madawwamiyar ƙaunarka, ya Ubanmu, ka kuma ba mu cetonka.
8Bari in ji abin da Ubanmu zai faɗa, gama zai yi magana ta salama ga mutanensa, ga masu aminci gare shi; amma kada su koma ga hanyoyinsu na wauta. 9Hakika cetonsa yana kusa ga masu tsoronsa, domin ɗaukaka ta zauna a ƙasarmu. 10Madawwamiyar ƙauna da aminci sun haɗu tare; adalci da salama sun yi sumba. 11Aminci yana tsirowa daga ƙasa, adalci kuma yana leƙowa daga sama. 12Hakika, Ubanmu zai ba da abin da yake mai kyau, ƙasarmu kuma za ta ba da amfaninta. 13Adalci zai yi tafiya a gabansa, yă kuma shirya hanya domin takawarsa.