కోరహు కుమారులు
సంగీత నిర్దేశకుని కొరకు. కోరహు కుమారుల కీర్తన.
మన తండ్రి ఇంతకుముందు ఈ ప్రజలను క్షమించాడు. తరతరాలు కోపంగా ఉండకుండా మళ్ళీ అలా చేయమని వారు ఆయనను అడుగుతారు. వారికి వినబడే జవాబు సమాధానం, ఇంకా ఒక చిత్రం: ప్రేమ, నమ్మకత్వం కలుసుకుంటాయి, నీతి, సమాధానం ముద్దుపెట్టుకుంటాయి, భూమి తన పంటను ఇస్తుంది.
85 1మన తండ్రి, నీవు నీ దేశముపై దయ చూపించావు; యాకోబు క్షేమమును నీవు పునరుద్ధరించావు. 2నీ ప్రజల దోషమును నీవు క్షమించావు; వారి పాపమంతటిని నీవు కప్పివేశావు. 3నీ ఉగ్రత అంతటిని నీవు ఉపసంహరించావు; నీ మండుతున్న కోపమునుండి నీవు మళ్ళిపోయావు.
4మన తండ్రి, మా రక్షణా, మమ్మును పునరుద్ధరించుము; మాపై నీ ఆగ్రహమును తొలగించుము. 5నీవు మాపై నిత్యము కోపగించి ఉంటావా? తరతరములన్నిటిలో నీ కోపమును కొనసాగిస్తావా? 6నీ ప్రజలు నీలో ఆనందించునట్లు, నీవు మమ్మును మరల బ్రతికించవా? 7మన తండ్రి, నీ నిబంధనా కృపను మాకు చూపించుము, నీ రక్షణను మాకు అనుగ్రహించుము.
8మన తండ్రి చెప్పేది నేను వినెదను గాక, ఏలయనగా ఆయన తన ప్రజలతో, తన భక్తులతో సమాధానము పలుకును; అయితే వారు తమ మూర్ఖమార్గములకు తిరిగి మళ్ళకుందురు గాక. 9నిశ్చయముగా ఆయనకు భయపడువారికి ఆయన రక్షణ సమీపముగా ఉన్నది, తద్వారా మహిమ మన దేశములో నివసించును. 10నిబంధనా కృపయు విశ్వాస్యతయు కలిసికొనెను; నీతియు సమాధానమును ముద్దుపెట్టుకొనెను. 11విశ్వాస్యత భూమిలోనుండి మొలచును, నీతి ఆకాశమునుండి క్రిందికి చూచును. 12అవును, మన తండ్రి మేలైనదానిని అనుగ్రహించును, మన దేశము తన పంటను ఇచ్చును. 13నీతి ఆయనకు ముందుగా నడచును, ఆయన అడుగులకు మార్గమును సిద్ధపరచును.
