Ilmaan Qoraa
Hooggantuu faarfannaatiif. Faarfannaa ilmaan Qoraa.
Abbaan keenya duraanis sabni kana araareera, amma immoo dhaloota hunda aaruu irra deebi'ee akka araaru isa kadhatu. Deebiin isaan dhaggeeffatan nagaa dha, fakkeenyi: jaalalli fi amanamummaan wal argu, qajeelummaa fi nagaan wal dhungatu, lafti firii ishee kenniti.
85 1Yaa Abbaa keenya, ati biyya keetiif fudhatama argisiifte; badhaadhummaa Yaaqoob deebifte. 2Yakka saba kee ati dhiifte; cubbuu isaanii hundumaa dhoksite. 3Dheekkamsa kee hundumaa balleessite; aarii kee isa boba'u irraa deebite.
4Yaa Abbaa keenya, fayyina keenya, nu deebisi; dheekkamsa kee nurratti qabdu dhiisi. 5Bara baraan nutti in aartaa? Dhaloota hundumaa keessa aarii kee in dheeressitaa? 6Ati ammas nu hin jiraachisuu, akka saba kee si keessatti gammaduuf? 7Yaa Abbaa keenya, gaarummaa kakuu kee nuuf argisiisi, fayyina kees nuuf kenni.
8Abbaan keenya waan jedhu ani haa dhaga'u; inni saba isaatiif, warra amanamoo isaatiif nagaa in dubbata; isaan garuu gara gowwummaa isaaniitti hin deebi'in. 9Dhugumatti fayyinni isaa warra isa sodaatan bira jira, akka ulfinni biyya keenya keessa jiraatuuf. 10Gaarummaan kakuu fi amanamummaan wal argan; qajeelummaa fi nagaan wal dhungatan. 11Amanamummaan lafa keessaa biqila, qajeelummaan immoo waaqa irraa gad ilaala. 12Eeyyee, Abbaan keenya waan gaarii in kenna, biyyi keenyas firii ishee in kenniti. 13Qajeelummaan isa dura in deema, karaa miila isaatiifis in qopheessa.
