ደቂ ቆሬ
ንሓለቓ ዘማርያን። መዝሙር ደቂ ቆሬ።
ኣቦና ነዝ ህዝቢ ቅድሚ ሕዚ ይቕረ ኢሉሉ እዩ፥ ንሳቶም ድማ ንውሉድ ወለዶ ኽቍጣዕ ዘይኮነ፥ መሊሱ ይቕረ ክብለሎም ይልምኑ። እቲ ዝሰምዕዎ መልሲ ሰላም እዩ፥ ስእሊውን፦ ምሕረትን ሓቅን ይራኸቡ፥ ፅድቅን ሰላምን ይሳዓዓሙ፥ እታ ሃገር ድማ ፍርያታ ትህብ።
85 1ኦ ኣቦና፥ ንምድርኻ ፀጋ ኣርኣኻያ፤ ንምርኮ ያእቆብ ከዓ መለስካዮ። 2በደል ህዝብኻ ይቕረ በልካ፤ ንዅሉ ሓጢኣቶም ከደንካዮ። 3ንዅሉ ቍጥዓኻ ኣግለስካ፤ ካብ ረስኒ ቍጥዓኻ ተመለስካ።
4ኦ ኣቦና፥ መድሕንና፥ መልሰና፤ ኵራኻ ካባና ኣርሕቕ። 5ንዘለኣለም ክትቍጥዓና ዲኻ? ንቍጥዓኻ ንውሉድ ወለዶ ኸተንውሖ ዲኻ? 6ህዝብኻ ብኣኻ ምእንቲ ኽሕጐስ፥ መሊስካ ህያው ኣይትገብረናን ዲኻ? 7ኦ ኣቦና፥ ምሕረትካ ኣርኣየና፤ ምድሓንካ ድማ ሃበና።
8ኣቦና እንታይ ከም ዝብል ክሰምዕ እየ፤ ንሱ ንህዝቡን ንቕዱሳኑን ሰላም ክዛረቦም እዩ እሞ፤ ናብ ዕሽነቶም ግና ከይምለሱ። 9ብሓቂ ምድሓኑ ነቶም ዝፈርሕዎ ቐረባ እዩ፤ ክብሪ ኣብ ሃገርና ምእንቲ ኽነብር። 10ምሕረትን ሓቅን ተራኸቡ፤ ፅድቅን ሰላምን ተሳዓዓሙ። 11ሓቂ ካብ ምድሪ ትበቍል፤ ፅድቂ ኸዓ ካብ ሰማይ ይጥምት። 12እወ፥ ኣቦና ሰናይ ክህብ እዩ፤ ሃገርናውን ፍርያታ ክትህብ እያ። 13ፅድቂ ኣብ ቅድሚኡ ኽትከይድ፥ ንስጕምቱ ድማ መንገዲ ከተዳሉ እያ።
