Mga Anak ni Kora
Sa direktor sang ambahanon. Isa ka salmo sang mga anak ni Kora.
Ginpatawad na sang aton Amay ini nga katawhan sang una, kag ginapangabay nila sia nga himuon liwat ini sa baylo nga magpabilin sia nga akig sa tunga sang mga kaliwatan. Ang sabat nga ila nabatian amo ang paghidait, kag isa ka laragway: ang gugma kag ang katutom nagasugataay, ang pagkamatarong kag ang paghidait nagahalukay, ang duta nagahatag sang iya ani.
85 1Ginpakitaan mo sing kahamuot ang imo duta, Amay namon; ginpabalik mo ang kapalaran ni Jacob. 2Ginpatawad mo ang kasal-anan sang imo katawohan; gintabunan mo ang tanan nila nga sala. 3Ginbawi mo ang bug-os mo nga kasingkal; ginpalayo mo ang imo nagadabadaba nga kaakig.
4Ibalik mo kami, Amay namon, amon kaluwasan; kuhaa ang imo kaugot sa amon. 5Magapabilin bala ang imo kaakig sa amon sa gihapon? Palawigon mo bala ang imo kasingkal sa tanan nga kaliwatan? 6Indi mo bala kami pagbuhion liwat, agud magkalipay ang imo katawohan sa imo? 7Ipakita mo sa amon ang imo malig-on nga paghigugma, Amay namon, kag ihatag mo sa amon ang imo kaluwasan.
8Pamatian ko kon ano ang igasiling sang aton Amay, kay magahambal sia sing paghidaet sa iya katawohan, sa iya mga matutom; apang indi sila magbalik sa ila binuang nga mga dalanon. 9Sa pagkamatuud malapit ang iya kaluwasan sa mga nagakahadlok sa iya, agud ang himaya magapuyo sa aton duta. 10Ang malig-on nga paghigugma kag ang pagkamatutom nagkitaanay; ang pagkamatarung kag ang paghidaet naghalukanay. 11Ang pagkamatutom nagatubo gikan sa duta, kag ang pagkamatarung nagatan-aw halin sa langit. 12Huo, ang aton Amay magahatag sang maayo, kag ang aton duta magapatubas sang iya ani. 13Ang pagkamatarung magauna sa iya kag magaaman sang dalan para sa iya mga tikang.
