Nganasook che po Lawiik
Kigoochin Lawiik nganasook artam ak sisiit kobooto emotinwekwak, che mi muut koek nganasook che po kaboiyet. Kiriip game kobun mwechin rumiindet agoi kolewen tuiyet bwatutik — rumisyet ko tai meet — amu imurwoni korotiik emet ole menyei Kwandanyo kwenekwak.
Ng'alaali Kwandanyo eng' mustarisyek 2–8, 10–34
35 1Ki mwachi Kwandanyo Musa, eng' ole neegitee Jordan eng' Jeriko, eng' warengetap Moab, koleenji,
2“Ng'at piigap Israel kogoochi Lawiik, eng' poroteet ne tinyei, nganasook che kimenyei, ak emotinwek che riiregei nganasook, che po Lawiik. 3Nganasook ko nenywa si komenyei; emotinwek ko po tuukwak, ak kiyagiikwak, ak tuguukwak tugul che saptos.
4“Emotinwegap nganasook che igoochi Lawiik, ko ngeng'eete kong'etee irimeetap nganaseet olo po fiit eliphuut agenge ak pogolwogik muut eng' komosta age tugul. 5Biman saang'utap nganaseet: olo po fiit eliphuusyek somok eng' komosta ne chee asiis, eliphuusyek somok eng' komosta ne tai, eliphuusyek somok eng' komosta ne wendi asiis, eliphuusyek somok eng' komosta ne let, ak nganaseet ko mi kwenut. Ni emotinwegap nganasookwak.
6“Eng' nganasook che igoochi Lawiik, ko nganasook lo che po kaboiyet, nganasook che mwechin rumiindet; kosiir chuuto, igoochi nganasook artam ak aeng'.
7“Nganasook tugul che igoochi Lawiik, ko nganasook artam ak sisiit, kobooto emotinwekyik che kiyagisye. 8Eng' emetap piigap Israel, igoochi Lawiik nganasook—che chaang' eng' ortinwek che eecheen, che ng'ering eng' che mengeechen; kogoito age tugul ko uu chaang'indap poroteet ne kisich.”
Ng'alaali Kwandanyo Kogeny
9Ki mwachi Kwandanyo Musa koleenji,
10“Mwachi piigap Israel ileenji: Ye ilanda Jordan oba emetap Kanaan, 11olewen nganasook che nenywok, nganasook che mwechin rumiindet, ole kimwechin chii age tugul ne parei chiito age amaingen. 12Nganasook ko kaboiyet eng' okweek kong'etee ne yaaktoi korotiik, si ma me rumiindet kot kotonon eng' taitap tuiyet si kirwok. 13Nganasook che igoochi, ko nganasook lo che po kaboiyet eng' okweek. 14Igoochi nganasook somok eng' komoswek alak ne po Jordan ak nganasook somok che mi emetap Kanaan; koegu nganasook che po kaboiyet. 15Nganasook lo ko kaboiyet eng' piigap Israel, ak kipsagarindet, ak punootyot ne menyei kwenunnywa, si komwechi chii age tugul ne parei chiito age ne kalel.
16“Ago ngo pir chii age chiito age eng' kiy ne po karna ak kome, ko ineendet ne parei chii—kebarei chiito ne parei chii. 17Ngo pir ineendet eng' koita ne mi eunnyi ne imuuchi kobar, ak kome, ko ineendet ne parei chii; kebarei chiito ne parei chii. 18Anan ngo pir ineendet eng' kiy ne po keetit ne imuuchi kobar ne mi eunnyi, ak kome, ko ineendet ne parei chii; kebarei chiito ne parei chii. 19Ineendet ne yaaktoi korotiik ko parei rumiindet ineegei; ye tuiyenen ineendet, kobar. 20Ngo toorta ineendet amu weget, anan kowiirchi kiy age eng' ribiseet si kome, 21anan ngo pir ineendet eng' eunnyi amu weget ak kome, ko kebarei ne pirei—ko ineendet ne parei chii. Ko parei ne yaaktoi korotiik rumiindet ye konyoor ineendet.
22“Ago ngo toorta ineendet amanyali ama po puunyoondit, anan kowiirchi kiy age tugul ama ribiseet, 23anan, ama koger ineendet, koluulji koita ne imuuchi kobar, ak kome—ne ma po punyondennyi, ne ma cheeng'ei koyai ineendet kiit ne ya, 24ko irwookyi tuiyet eng' kwenutap rumiindet ak ne yaaktoi korotiik ko uu ng'atuutichu. 25Isaru tuiyet rumiindet eng' eutap ne yaaktoi korotiik ak koweekyi ineendet nganaseet ne po kaboiyet ne kimwei; tebi olooto kot kome tisiindet ne oo ne kigeel eng' mwaetap tiliilindo. a a v25 Chiito ne kisere konyoorunei boinet ye kome tisiindet ne oo kityo — meet ne wolei ne tinyei tengekto. Jeso, tisiinnyo ne oo, ko konech boinennyo eng' meennyi ineegei.
26“Ago ngo manda rumiindet keny irimeetap nganasennyi ne po kaboiyet, ole kimwei, 27ngo konyoor ineendet ne yaaktoi korotiik saang'utap irimeetap nganasennyi ne po kaboiyet ak kobar rumiindet, ko ma tinyei tengektap korotiik. 28Tebi rumiindet nganasennyi ne po kaboiyet kot kome tisiindet ne oo; kong'etee meetap tisiindet ne oo kityo komuuchi koweek emennyi. 29Koegu chuuto ng'atuutyet ne po koigeny eng' okweek agoi ibinwekwok tugul, eng' ole menyei tugul.
30“Chii age tugul ne parei chiito age, kebarei ko uu rumiindet, eng' kutitap paorinik; ma muuchi paorindet agenge koba paoryangei chii si kebar ineendet.
31“Amat inam kagerutyet agobo saboondap rumiindet ne nyoljin meet—kebarei iman. 32Amat inam kagerutyet agobo chiito ne kimwei nganasennyi ne po kaboiyet, si koyai koweek komeny emet kot kome tisiindet.
33“Amat ing'wanit emet ne imenye—ng'wanitu korotiik emet, ak ma muuchi emet konyoor atonone agobo korotiik che kitumda eng' ineendet, kobatee korotiigap ineendet ne katumda. 34Amat iyai emet koegu ne ng'wanit—imenye olooto, ak amenye kwenung'wong'; amu anee, Kwandang'wong', amenye kwenutap piigap Israel.”