ዘሑልቍ 35 FHB Father's Heart Bible™

35 ¹ኣቦና ኣብ ጐላጕል ሞኣብ፥ ኣብ ዮርዳኖስ መንፅር ኢያሪኮ፥ ንሙሴ ኸምዙይ በሎ፦

²“ንደቂ እስራኤል፥ ካብ ርስቶም ንሌዋውያን ዝነብሩለን ከተማታት፥ ኣብ ዙርያአን ዘሎ መዋፈሪአን ድማ ክህብዎም ኣዝዞም። ³እተን ከተማታት ዝነብሩለን ናታቶም ይኹና፤ እቲ መዋፈሪ ኸዓ ንእንስሳኦምን ንከብቶምን ንዅሎም ህይወት ዘለዎም ፍጡራቶምን እዩ።

⁴“እቲ ንሌዋውያን እትህብዎ መዋፈሪ ኸተማታት፥ ካብ መንደቕ እታ ኸተማ ናብ ወፃኢ፥ ብዅሉ ወገን ኣስታት ሽሕን ሓሙሽተ ሚእትን ጫማ ይበፅሕ። ⁵ኣብ ወፃኢ እታ ኸተማ ዕቀኑ፦ በቲ ምብራቕ ወገን ኣስታት ሰለስተ ሽሕ ጫማ፥ በቲ ደቡብ ወገን ሰለስተ ሽሕ፥ በቲ ምዕራብ ወገን ሰለስተ ሽሕ፥ በቲ ሰሜን ወገን ድማ ሰለስተ ሽሕ፤ እታ ኸተማ ኸዓ ኣብ ማእኸል ትኹን። እዙይ ንኸተማታቶም ዝኸውን መዋፈሪ እዩ።

⁶“ካብተን ንሌዋውያን እትህብወን ከተማታት፥ ሽዱሽተ ሰብ ዝቐተለ ዝሃድመለን መዕቘቢ ከተማታት ይኹና፤ ብዘይ እዚኣተን ከዓ ኣርብዓን ክልተን ከተማ ሃቡ።

⁷“ኵለን እተን ንሌዋውያን እትህብወን ከተማታት፥ ምስ መዋፈሪአን፥ ኣርብዓን ሸሞንተን ከተማ ይኹና። ⁸ካብ ርስቲ ደቂ እስራኤል ንሌዋውያን ከተማታት ክትህቡ እንተለኹም፥ ካብቲ ዓብዪ ነገድ ብዙሕ፥ ካብቲ ንእሽተይ ነገድ ድማ ውሑድ ሃቡ፤ ነፍሲ ወከፍ ከከም መጠን እቲ ዝወረሶ ርስቲ ካብ ከተማታቱ ንሌዋውያን ይሃብ።”

ኣቦና መሊሱ ተዛረበ

⁹ኣቦና ንሙሴ ኸምዙይ በሎ፦

¹⁰“ንደቂ እስራኤል ተዛረቦም እሞ ከምዙይ ኢልካ ንገሮም፦ ንስኻትኩም ንዮርዳኖስ ተሳጊርኩም ናብ ምድሪ ከንኣን ምስ ኣተኹም፥ ¹¹ገለ ኸተማታት ንርእስኹም ምረፁ፤ እተን ኸተማታት መዕቘቢ ይኹናኹም፤ እቲ እንተይፈለጠ ሰብ ዝቐተለ ዅሉ ኸዓ ናብተን ይሃድም። ¹²እዘን ከተማታት ካብ ፈዳዪ ደም መዕቘቢ ይኹናኹም፤ እቲ ቐታሊ ኣብ ቅድሚ መጋባእያ ንፍርዲ ደው ክሳዕ ዝብል ከይመውት እዩ። ¹³እተን እትህብወን ከተማታት፥ ሽዱሽተ መዕቘቢ ከተማታት ይኹናኹም። ¹⁴ሰለስተ ኸተማታት ኣብ ስግር ዮርዳኖስ፥ ሰለስተ ኸተማታት ድማ ኣብ ምድሪ ከንኣን ሃቡ፤ መዕቘቢ ከተማታት ይኹና። ¹⁵እዘን ሽዱሽተ ኸተማታት ንደቂ እስራኤልን ነቲ ጓናን ኣብ ማእኸሎም ንዝነብር ስደተኛን መዕቘቢ ይኹና፤ እቲ ብዘይ ምፍላጥ ሰብ ዝቐተለ ዅሉ ኸዓ ናብተን ይሃድም።

¹⁶“ሓደ ሰብ ንኻልእ ብኣቕሓ ሓፂን እንተ ወቕዖ እሞ እቲ ዝተወቕዐ እንተ ሞተ ግና፥ እቲ ወቓዒ ቐታሊ ነፍሲ እዩ፤ እቲ ቐታሊ ነፍሲ ኸዓ ፈፂሙ ይቀተል። ¹⁷ኣብ ኢዱ ብዝሓዞ ዝቐትል እምኒ እንተ ወቕዖ እሞ እንተ ሞተ፥ ቐታሊ ነፍሲ እዩ፤ እቲ ቐታሊ ነፍሲ ይቀተል። ¹⁸ወይ ድማ ኣብ ኢዱ ብዝሓዞ ዝቐትል ብዕንፀይቲ ዝተሰርሐ ኣቕሓ እንተ ወቕዖ እሞ እንተ ሞተ፥ ቐታሊ ነፍሲ እዩ፤ እቲ ቐታሊ ነፍሲ ይቀተል። ¹⁹እቲ ፈዳዪ ደም ባዕሉ ነቲ ቐታሊ ነፍሲ ይቀትሎ፤ ምስ ረኸቦ ይቀትሎ። ²⁰ብፅልኢ እንተ ደፍኦ፥ ወይ ተሓቢኡ ገለ ነገር እንተ ደርበየሉ እሞ እንተ ሞተ፥ ²¹ወይ ብፅልኢ ብኢዱ እንተ ወቕዖ እሞ እንተ ሞተ፥ እቲ ወቓዒ ቐታሊ ነፍሲ እዩ እሞ ይቀተል፤ እቲ ፈዳዪ ደም ነቲ ቐታሊ ነፍሲ ምስ ረኸቦ ይቀትሎ።

²²“ብዘይ ፅልኢ ብድንገት እንተ ደፍኦ፥ ወይ ከዓ ከይተሓብአ ዝኾነ ነገር እንተ ደርበየሉ፥ ²³ወይ ከይረኣዮ ዝቐትል እምኒ ኣብ ልዕሊኡ እንተ ደርበየሉ እሞ እንተ ሞተ፥ ፀላኢኡ ዘይኮነ፥ ክፉእ ዘይደለየ፥ ²⁴ሽዑ እቲ መጋባእያ ከም እዞም ሕግጋት እዚኣቶም ኣብ መንጎ እቲ ቐታሊ ሰብን ኣብ መንጎ እቲ ፈዳዪ ደምን ይፍረድ። ²⁵እቲ መጋባእያ ነቲ ቐታሊ ኻብ ኢድ ፈዳዪ ደም የድሕኖ፤ ናብታ ናብኣ ዝሃደመ መዕቘቢ ኸተማ ድማ ይመልሶ፤ ክሳዕ እቲ ብቅዱስ ዘይቲ ዝተቐብአ ሊቀ ካህናት ዝመውት ኣብኣ ይንበር። ^a a v25 እቲ ዝተሰደ ሰብ፥ እቲ ሊቀ ካህናት ምስ ዝመውት ጥራሕ እዩ ነፃ ዝወፅእ፤ እዚ ሞት እዙይ ነቲ በዳሊ ነፃ የውፅእ። ኢየሱስ፥ እቲ ዓብዪ ሊቀ ካህናትና፥ ብናይ ባዕሉ ሞት ናፅነትና የረጋግፅ።

²⁶እቲ ቐታሊ ግና ካብ ዶብ እታ ናብኣ ዝሃደመ መዕቘቢ ኸተማኡ ወፂኡ እንተ ወፀ፥ ²⁷እቲ ፈዳዪ ደም ኣብ ወፃኢ ዶብ መዕቘቢ ኸተማኡ እንተ ረኸቦ እሞ ነቲ ቐታሊ እንተ ቐተሎ፥ ዕዳ ደም የብሉን። ²⁸እቲ ቐታሊ ኽሳዕ እቲ ሊቀ ካህናት ዝመውት ኣብ መዕቘቢ ኸተማኡ ይንበር፤ ድሕሪ ሞት እቲ ሊቀ ካህናት ጥራሕ ናብ ምድሩ ይመለስ። ²⁹እዚኣቶም ኣብ ኵሉ እትነብሩሉ ቦታ፥ ንውሉድ ወለዶኹም ዝነብር ናይ ፍርዲ ስርዓት ይኹኑኹም።

³⁰“ሰብ ዝቐተለ ዅሉ፥ ብምስክርነት መሰኻኽር ከም ቐታሊ ነፍሲ ይቀተል፤ ሓደ ምስክር ጥራሕ ግና ሰብ ንኽመውት ክምስክር ኣይክእልን እዩ።

³¹“ንሞት ዝግብኦ ቐታሊ ነፍሲ ብዛዕባ ህይወቱ ጋር ነፍሲ ኣይትቀበሉ፤ ፈፂሙ ይቀተል። ³²ናብ መዕቘቢ ኸተማኡ ንዝሃደመ ሰብ፥ ቅድሚ ሞት እቲ ካህን ናብ ምድሩ ተመሊሱ ንኽነብር፥ ጋር ነፍሲ ኣይትቀበሉ።

³³“እትነብርዋ ምድሪ ኣይተርክሱ፤ ደም ንምድሪ የርክሳ እዩ እሞ፤ ነታ ምድሪ ድማ፥ ብዘይ ደም እቲ ዘፍሰሶ ሰብ፥ ምእንቲ እቲ ኣብ ልዕሊኣ ዝፈሰሰ ደም ስርየት የብላን። ³⁴ነታ እትነብርዋ ምድሪ ኣይተርክስዋ፤ ኣነ ኣብ ማእኸልኩም እነብር ኣለኹ እሞ፤ ኣነ ኣቦኻትኩም፥ ኣብ ማእኸል ደቂ እስራኤል እነብር ኣለኹ።”