ዘሑልቍ 34 FHB Father's Heart Bible™

34 ¹ኣቦና ድማ ንሙሴ ኸምዙይ ኢሉ ተዛረቦ፦

²“ንደቂ እስራኤል ከምዙይ ኢልካ ኣዝዞም፦ ናብ ምድሪ ከነዓን ምስ ኣተኹም፥ እታ ርስቲ ኾይና እትወድቐኩም ምድሪ፥ ማለት ምድሪ ከነዓን ምስ ወሰና፥ እዚኣ እያ። ³ናይ ደቡብ ወገንኩም ድማ ካብ ምድረ በዳ ፂን ኣብ ጥቓ ወሰን ኤዶም ይኸውን፤ ናይ ደቡብ ወሰንኩም ከዓ ካብ ጫፍ ባሕሪ ጨው ብወገን ምብራቕ ይጅምር። ⁴ወሰንኩም ድማ ናብ ደቡብ ዓቐበት ዓቅራቢም ይዘውር፤ ናብ ፂን ይሓልፍ፤ ናብ ደቡብ ቃዴስ በርኔ ይበፅሕ፤ ናብ ሓፃር ኣዳር ይድይብ፤ ናብ ዓፅሞን ድማ ይሓልፍ። ⁵ካብ ዓፅሞን ድማ እቲ ወሰን ናብ ሩባ ግብፂ ይዘውር፤ ኣብ ባሕሪ ኸዓ ይውዳእ።

⁶“ናይ ምዕራብ ወሰንኩም ድማ ዓብዪ ባሕርን ገምገሙን ይኸውን። ^a a v6 እቲ ዓብዪ ባሕሪ ሜዲተራንያን እዩ።

⁷“ናይ ሰሜን ወሰንኩም ድማ እዙይ ይኸውን፦ ካብ ዓብዪ ባሕሪ ናብ እምባ ሆር ሕንፃፅ ግበሩ። ⁸ካብ እምባ ሆር ድማ ናብ መእተዊ ሓማት ሕንፃፅ ግበሩ፤ ኣብ ፄዳድ ከዓ ይውዳእ፤ ⁹ሽዑ እቲ ወሰን ናብ ዚፍሮን ይዝርጋሕ፤ ኣብ ሓፃር ዔናን ከዓ ይውዳእ። ናይ ሰሜን ወሰንኩም እዙይ ይኸውን።

¹⁰“ናይ ምብራቕ ወሰንኩም ድማ ካብ ሓፃር ዔናን ክሳዕ ሴፋማ ሓንፅፁ። ¹¹እቲ ወሰን ካብ ሴፋማ ናብ ሪብላ፥ ብምብራቕ ዓይን ይወርድ፤ ሽዑ ወሪዱ ናብቲ ብምብራቕ ባሕሪ ኪኔሬት ዘሎ ፀግዒ ይበፅሕ። ^b b v11 ባሕሪ ኪኔሬት፥ ድሓር ባሕሪ ገሊላ ዝተብሃለ ቀላይ እዩ። ¹²እቲ ወሰን ናብ ዮርዳኖስ ይወርድ፤ ኣብ ባሕሪ ጨው ከዓ ይውዳእ። ምድሪኹም ምስ ወሰና ብዙርያኣ እዚኣ ክትከውን እያ።”

¹³ሙሴ ድማ ንደቂ እስራኤል ከምዙይ ኢሉ ኣዘዞም፦ እታ ኣቦና ንትሽዓቲኦም ነገድን ንፍርቂ ነገድን ክትወሃብ ዝኣዘዘ፥ ብዕፃ እትወርስዋ ምድሪ እዚኣ እያ። ¹⁴ነገድ ደቂ ሮቤል በብማይ ቤቶምን ነገድ ደቂ ጋድ በብማይ ቤቶምን ርስቶም ወሲዶም እዮም፤ ፍርቂ ነገድ ምናሴ ድማ ከምኡ ወሲዱ እዩ። ¹⁵እቶም ክልተን ፈረቓን ነገዳት ኣብ ማዕዶ ዮርዳኖስ፥ ኣብ መንፅር ኢያሪኮ፥ ብወገን ምብራቕ ፀሓይ ርስቶም ተቐቢሎም እዮም።

ኣቦና መሊሱ ይዛረብ

¹⁶ኣቦና ድማ ንሙሴ ኸምዙይ ኢሉ ተዛረቦ፦

¹⁷“ነታ ምድሪ ንርስቲ ዝመቓቕሉልኩም ሰባት ስሞም እዚኣቶም እዮም፦ ኣልኣዛር ካህንን ኢያሱ ወዲ ነዌን። ¹⁸ነታ ምድሪ ንርስቲ ኽትመቓቕልዋ ድማ ካብ ነፍሲ ወከፍ ነገድ ሓደ ሹም ውሰዱ። ¹⁹ስማቶም ከዓ እዝ ዝስዕብ እዩ፦ ካብ ነገድ ይሁዳ፥ ካሌብ ወዲ ዮፎኒ፥ ²⁰ካብ ነገድ ደቂ ስምኦን፥ ሸሙኤል ወዲ ዓሚሁድ፥ ²¹ካብ ነገድ ብንያም፥ ኤሊዳድ ወዲ ኪስሎን፥ ²²ካብ ነገድ ደቂ ዳን፥ ሹም ቡቂ ወዲ ዮግሊ፥ ²³ካብ ደቂ ዮሴፍ፦ ካብ ነገድ ምናሴ፥ ሹም ሃኒኤል ወዲ ኤፎድ፥ ²⁴ካብ ነገድ ደቂ ኤፍሬም ድማ፥ ሹም ቀሙኤል ወዲ ሺፍጣን፥ ²⁵ካብ ነገድ ደቂ ዛብሎን፥ ሹም ኤሊሳፋን ወዲ ፓርናክ፥ ²⁶ካብ ነገድ ደቂ ይሳኮር፥ ሹም ጳልጢኤል ወዲ ዓዛን፥ ²⁷ካብ ነገድ ደቂ ኣሴር፥ ሹም ኣኪሁድ ወዲ ሸሎሚ፥ ²⁸ካብ ነገድ ደቂ ንፍታሌም ድማ፥ ሹም ፈዳህኤል ወዲ ዓሚሁድ።”

²⁹እቲ ኣቦና ኣብ ምድሪ ከነዓን ንደቂ እስራኤል ርስቲ ኽመቓቕሉሎም ዝኣዘዞም እዚኣቶም እዮም።