Baba vedu Vanotaura
Miganhu yeKenani inotarwa — kumaodzanyemba kubva murenje reZini, kumadokero Gungwa Guru, kuchamhembe kusvika kuHazari-enani, kumabvazuva ichidzika neJorodhani kusvika kuGungwa Rakafa — uye mutungamiri mumwe chete wedzinza rimwe nerimwe anodomwa kuti agove nhaka pamwe chete naEreazari naJoshua.
34 1Baba vedu vakataura kuna Mozisi, vachiti,
2“Rayira vaIsraeri, uti: Pamunopinda munyika yeKenani, iyi ndiyo nyika ichawira kwamuri senhaka—nyika yeKenani, mukati memiganhu yayo. 3Rutivi rwenyu rwokumaodzanyemba ruchatangira kurenje reZini ruchitevedza muganhu weEdhomu; muganhu wenyu wokumaodzanyemba uchatangira pamugumo weGungwa Rakafa, nechokumabvazuva. 4Muganhu wenyu uchatsaukira nechokumaodzanyemba kwoMukwidza weAkirabhimu, uchiyambukira kuZini, uchisvika nechokumaodzanyemba kweKadheshi-bhaneya, uchipfuurira kuHazari-adhari, uchipfuura kuAzimoni. 5Kubva kuAzimoni muganhu uchatsaukira kuHova yeIjipiti, uchiguma paGungwa.
6“Muganhu wenyu wokumavirira uchava Gungwa reMedhitereniyeni nomahombekombe aro. a a v6 Gungwa Guru nderoMedhitereniyeni.
7“Uyu ndiwo uchava muganhu wenyu wokuchamhembe: kubva kuGungwa reMedhitereniyeni muchatara mutaro wenyu kusvika kuGomo reHori. 8Kubva kuGomo reHori muchatara mutaro kusvika kuRebho-hamati, uchiguma kuZedhadhi; 9ipapo muganhu uchaenderera kusvika kuZiferoni ugoguma kuHazari-enani. Uyu ndiwo uchava muganhu wenyu wokuchamhembe.
10“Muchatara muganhu wenyu wokumabvazuva kubva kuHazari-enani kusvika kuShefamu. 11Muganhu uchaburuka kubva kuShefamu kusvika kuRibhura, nechokumabvazuva kweAini, ugoburuka ugosvika pamateru nechokumabvazuva kweGungwa reKinereti. b b v11 Gungwa reKinereti ndiro dziva rakazonzi Gungwa reGarirea. 12Muganhu uchaburuka kusvika kuJorodhani, uchiguma paGungwa Rakafa. Iyi ndiyo ichava nyika yenyu, ine miganhu yayo kumativi ose.”
13Mozisi akarayira vaIsraeri achiti: Iyi ndiyo nyika yamuchagara nhaka nemijenya, iyo Baba vedu vakarayira kuti ipiwe kumarudzi mapfumbamwe norudzi rwehafu. 14Rudzi rwavana vaRubheni, maererano needzimba dzamadzibaba avo, norudzi rwavana vaGadhi, maererano needzimba dzamadzibaba avo, vakatogamuchira nhaka yavo; saizvozvowo hafu yorudzi rwaManase. 15Marudzi maviri nehafu akagamuchira nhaka yawo mhiri kwaJorodhani uchibva kuJeriko, kurutivi rwokumabvazuva kwokubuda kwezuva.
Baba vedu Vanotaurazve
16Baba vedu vakataura kuna Mozisi, vachiti,
17“Mazita avarume vachakugoverai nyika senhaka ndeaya: Ereazari muprista naJoshua mwanakomana waNuni. 18Uye muchatora mutungamiri mumwe kubva kurudzi rumwe norumwe kuti vagove nyika senhaka. 19Aya ndiwo mazita avarume: kubva kurudzi rwaJudha, Karebhu mwanakomana waJefune; 20kubva kurudzi rwavana vaSimeoni, Shemueri mwanakomana waAmihudhi; 21kubva kurudzi rwaBhenjamini, Eridhadhi mwanakomana waKisironi; 22kubva kurudzi rwavana vaDhani, mutungamiri, Bhuki mwanakomana waJogiri; 23kubva kuvana vaJosefa: kubva kurudzi rwaManase, mutungamiri Hanieri mwanakomana waEfodhi, 24uye kubva kurudzi rwavana vaEfuremu, mutungamiri, Kemueri mwanakomana waShifitani; 25kubva kurudzi rwavana vaZebhuruni, mutungamiri, Erizafani mwanakomana waPanaki; 26kubva kurudzi rwavana vaIsakari, mutungamiri, Paritieri mwanakomana waAzani; 27kubva kurudzi rwavana vaAsheri, mutungamiri, Ahihudhi mwanakomana waSheromi; 28uye kubva kurudzi rwavana vaNafutari, mutungamiri, Pedhaheri mwanakomana waAmihudhi.”
29Ava ndivo Baba vedu vakarayira kuti vagove nhaka pakati pavana vaIsraeri munyika yeKenani.