Numeri 34

34 ¹Baba wa sì sọ̀rọ̀ sí Mose pé,

²“Pàṣẹ fún àwọn ọmọ Israẹli pé: nígbà tí ẹ bá wọ ilẹ̀ Kenaani, èyí ni ilẹ̀ tí yóò bọ́ sí yín gẹ́gẹ́ bí ogún—ilẹ̀ Kenaani, nínú àwọn ààlà rẹ̀. ³Ìhà gúúsù yín yóò nà láti aginjù Sini lọ ní ẹ̀gbẹ́ Edomu; ààlà gúúsù yín yóò bẹ̀rẹ̀ láti òpin Òkun Òkú, ní ìhà ìlà oòrùn. ⁴Ààlà yín yóò yà sí gúúsù Òkè Akrabbimu, yóò kọjá sí Sini, yóò dé gúúsù Kadeṣi-barnea, yóò tẹ̀síwájú sí Hasari-addari, yóò sì kọjá sí Asmoni. ⁵Láti Asmoni ni ààlà náà yóò yà sí Odò Kékeré Ejibiti, yóò sì parí ní Òkun.

⁶“Ààlà ìwọ̀ oòrùn yín yóò jẹ́ Òkun Mẹditaréníà àti etíkun rẹ̀. ^a a v6 Òkun Ńlá ni Òkun Mẹditaréníà.

⁷“Èyí ni yóò jẹ́ ààlà àríwá yín: láti Òkun Mẹditaréníà ni kí ẹ fa ìlà yín sí Òkè Hori. ⁸Láti Òkè Hori ni kí ẹ fa ìlà sí Lebo-hamati, tí yóò parí ní Sedadi; ⁹nígbà náà ni ààlà náà yóò nà sí Sifroni, yóò sì parí ní Hasari-enani. Èyí ni yóò jẹ́ ààlà àríwá yín.

¹⁰“Ẹ ó sì fa ààlà ìlà oòrùn yín láti Hasari-enani sí Ṣefamu. ¹¹Ààlà náà yóò sọ̀kalẹ̀ láti Ṣefamu sí Ribla, ní ìhà ìlà oòrùn Aini, yóò sì tún sọ̀kalẹ̀ dé ibi gẹ̀rẹ́gẹ̀rẹ́ ní ìhà ìlà oòrùn Òkun Kinnereti. ^b b v11 Òkun Kinnereti ni adágún tí a wá ń pè ní Òkun Galili lẹ́yìn náà. ¹²Ààlà náà yóò sọ̀kalẹ̀ sí Jordani, yóò sì parí ní Òkun Òkú. Èyí ni yóò jẹ́ ilẹ̀ yín, pẹ̀lú àwọn ààlà rẹ̀ yíká.”

¹³Mose pàṣẹ fún àwọn ọmọ Israẹli pé: Èyí ni ilẹ̀ tí ẹ ó jogún nípasẹ̀ kèké, tí Baba wa pàṣẹ pé kí a fi fún ẹ̀yà mẹ́sàn-án àti ìdajì ẹ̀yà. ¹⁴Ẹ̀yà àwọn ọmọ Reubeni, gẹ́gẹ́ bí ilé àwọn baba wọn, àti ẹ̀yà àwọn ọmọ Gadi, gẹ́gẹ́ bí ilé àwọn baba wọn, ti gba ogún wọn tẹ́lẹ̀; bẹ́ẹ̀ sì ni ìdajì ẹ̀yà Manaṣe. ¹⁵Ẹ̀yà méjì àti ìdajì náà gba ogún wọn ní ìhà kejì Jordani tí ó dojú kọ Jeriko, ní ìhà ìlà oòrùn níbi tí oòrùn ti ń yọ.

Baba Wa Tún Sọ̀rọ̀

¹⁶Baba wa sì sọ̀rọ̀ sí Mose pé,

¹⁷“Orúkọ àwọn ọkùnrin tí yóò pín ilẹ̀ náà fún yín gẹ́gẹ́ bí ogún ni wọ̀nyí: Eleasari àlùfáà àti Joṣua ọmọ Nuni. ¹⁸Ẹ ó sì mú olórí kan láti inú ẹ̀yà kọ̀ọ̀kan láti pín ilẹ̀ náà fún ogún. ¹⁹Wọ̀nyí ni orúkọ àwọn ọkùnrin náà: láti ẹ̀yà Juda, Kalebu ọmọ Jefunne; ²⁰láti ẹ̀yà àwọn ọmọ Simeoni, Ṣemueli ọmọ Ammihudi; ²¹láti ẹ̀yà Benjamini, Elidadi ọmọ Kisloni; ²²láti ẹ̀yà àwọn ọmọ Dani, olórí kan, Bukki ọmọ Jogli; ²³láti inú àwọn ọmọ Josẹfu: láti ẹ̀yà Manaṣe, olórí Hannieli ọmọ Efodi, ²⁴àti láti ẹ̀yà àwọn ọmọ Efraimu, olórí kan, Kemueli ọmọ Ṣiftani; ²⁵láti ẹ̀yà àwọn ọmọ Sebuluni, olórí kan, Elisafani ọmọ Parnaki; ²⁶láti ẹ̀yà àwọn ọmọ Issakari, olórí kan, Paltieli ọmọ Assani; ²⁷láti ẹ̀yà àwọn ọmọ Aṣeri, olórí kan, Ahihudi ọmọ Ṣelomi; ²⁸àti láti ẹ̀yà àwọn ọmọ Naftali, olórí kan, Pedaheli ọmọ Ammihudi.”

²⁹Wọ̀nyí ni àwọn tí Baba wa pàṣẹ fún láti pín ogún náà láàrin àwọn ọmọ Israẹli ní ilẹ̀ Kenaani.