Mishān 34

34 ¹Kala ithumwui Avāna Mosesli hānga,

²"Israelwui mibingli kasolu: Nathumna Canaan ngaleili vāzang tharan, chiwui thari lungli khalei Canaan ngalei hi nathumli shimlui sāda tāra ngaleina. ³Nathumwui azingshong thari chi Zin lamhāngwui eina Edomwui thari pharonda vāra; nathumwui azingshong thari chi Salt Seawui akatang eina haophoklaga, zingshoshongvāk vāra. ⁴Nathumwui thari chi Akrabbimwui kajui kakā azingshong takuikhuida, Zinli vāshoklaga, Kadesh-barnea azingshong vāshunglaga, Hazar-addar vāshoklaga, Azmonli vāk kānra. ⁵Azmonwui eina thari chi Egyptwui Kongrā vākuikhuida, chithāda shamadruli vātanga.

⁶"Nathumwui zingtunshong thari chi Great Seawui eina shamadrupheibing sāra. ^a a v6 Great Sea chiya Mediterranean Ngayina.

⁷"Hi nathumwui atungshong tharina: Great Seawui eina thuilaga Hor Kaphung vāshungda thari singkhuilu. ⁸Hor Kaphungwui eina Hamath vāzang khavaivāk thari singlu, chi Zedadli vātanga; ⁹chiwui thili thari chi Ziphronli vāk kanvālaga Hazar-enon vātanga. Hi nathumwui atungshong tharina.

¹⁰"Nathumwui zingshoshong thari chi Hazar-enon eina Shepham vāshungda singkhuilu. ¹¹Thari chi Shepham eina Ain zingshoshong khalei Riblah vāshungda tāra; chiwui thili tālaga Chinnereth Ngayi zingshoshongwui amaili vāshunga. ^b b v11 Chinnereth Ngayi chiya naolak eina Galilee Ngayi da hokahai shamadruna. ¹²Thari chi Jordanvāk tālaga, Salt Seali vātanga. Hi chiwui thari saikora kuimareida ngasoda nathumwui ngalei sāra."

¹³Mosesna Israelwui mibingli kasoda hānga, Ithumwui Avāna shang chiko kala shang tangkhaili mikhavai kaso kahai, nathumna kalā yanglaga shimlui samphangra ngalei chi hina. ¹⁴Reubenwui naomayarabing shang, athumwui avāva̱ ngarāwui shimlak athishurda, kala Gadwui naomayarabing shang, athumwui avāva̱ ngarāwui shimlak athishurda, athumwui shimlui samphanghaira; Manassehwui shang tangkhaina chithāda sai. ¹⁵Shang khani kala tangkhaina Jericho pheili Jordan kānda zingshoshong zimik kashokvāk athumwui shimlui samphanghaira.

Ithumwui Avāna Hāngluishita

¹⁶Kala ithumwui Avāna Mosesli hānga,

¹⁷"Pāngmon Eleazar kala Nunwui naomayara Joshua anina nathumli shimlui sākhavai ngalei ngayarmira. ¹⁸Kala nathumna ngalei chi shimlui sākhavai ngayarmi khavai shang-shangwui eina kathāna ava̱va̱ khuira. ¹⁹Mibing chiwui amingbing hina: Judah shangwui eina Jephunnehwui naomayara Caleb; ²⁰Simeon shangwui eina Ammihudwui naomayara Shemuel; ²¹Benjamin shangwui eina Chislonwui naomayara Elidad; ²²Dan shangwui eina kathāna Jogliwui naomayara Bukki; ²³Josephwui naongarābing: Manasseh shangwui eina, kathāna Ephodwui naomayara Hanniel, ²⁴kala Ephraim shangwui eina kathāna Shiphtanwui naomayara Kemuel; ²⁵Zebulun shangwui eina kathāna Parnachwui naomayara Elizaphan; ²⁶Issachar shangwui eina kathāna Azzanwui naomayara Paltiel; ²⁷Asher shangwui eina kathāna Shelomiwui naomayara Ahihud; ²⁸kala Naphtali shangwui eina kathāna Ammihudwui naomayara Pedahel."

²⁹Ithumwui Avāna Canaan ngaleili Israel mibingwui shimlui ngayarmi khavai kaso kahai mibing chi hibingna.