Mishān 33

33 ¹Israelnaobingna Moses eina Aaronwui pāng azingli, athumwui shang-shang eina Egypt ngaleiwui eina shokkahai shongzāwui mathang mathang chi hina. ²Ithumwui Avāna kakaso athishurda Mosesna athumwui zatphokpam mathang mathang eina kapikhuiya; kala athumwui zatphokpam athishurda mathang mathang chi hina. ³Athumna kachāng kharewui tharāda kaphangāthang, makānkhami phanitwui thili zimiksho, Rameseswui eina zatphoka; Israelnaobingna Egyptnaobing saikorawui miktāli pinglak eina shoka, ⁴Egyptnaobingna ithumwui Avāna athumwui alungli sāthat kahai naochizai saikora chizana leilakha; kala athumwui varebing saikorawuitungli ithumwui Avāna mashun bichar sai. ⁵Israelwui mibingna Rameseswui eina zatphokta Succothli rāmrah vasāpama. ⁶Athumna Succothwui eina zatphokta lamhāngwui ayarli khalei Ethamli rāmrah vasāpama. ⁷Athumna Ethamwui eina zatphokta Baal-zephon zingshovāk khalei Pi-ha-hirothshong latunga, kala Migdol mangāli rāmrah vasāpama. ⁸Athumna Hahiroth mangāwui eina zatphokta ngayi makānlaga lamhāngshong vai, kala Etham lamhāngli kathumthang zatlaga Marahli rāmrah vasāpama. ⁹Athumna Marahwui eina zatphoklaga, ura̱ tharāda khani eina khaneirong hangshini khalei Elimli vāshungda chili rāmrah vasāpama. ¹⁰Athumna Elimwui eina zatphokta Yam Suph ngalemli rāmrah vasāpama. ^a a v10 Yam Suph hi, mibingna kaphungna Red Sea da hangkahai ngayi chiwui Hebrew mingna. ¹¹Athumna Yam Suphwui eina zatphokta Sin lamhāngli rāmrah vasāpama. ¹²Athumna Sin lamhāngwui eina zatphokta Dophkahli rāmrah vasāpama. ¹³Athumna Dophkahwui eina zatphokta Alushli rāmrah vasāpama. ¹⁴Athumna Alushwui eina zatphokta Rephidimli rāmrah vasāpama, kha chili mibingna mangkhavai tara̱ masamphangthuwa. ¹⁵Athumna Rephidimwui eina zatphokta Sinai lamhāngli rāmrah vasāpama. ¹⁶Athumna Sinai lamhāngwui eina zatphokta Kibroth-hattaavahli rāmrah vasāpama. ¹⁷Athumna Kibroth-hattaavahwui eina zatphokta Hazerothli rāmrah vasāpama. ¹⁸Athumna Hazerothwui eina zatphoklaga Rithmahli rāmrah vasāpama. ¹⁹Athumna Rithmahwui eina zatphoklaga Rimmon-perezli rāmrah vasāpama. ²⁰Athumna Rimmon-perezwui eina zatphoklaga Libnahli rāmrah vasāpama. ²¹Athumna Libnahwui eina zatphoklaga Rissahli rāmrah vasāpama. ²²Athumna Rissahwui eina zatphoklaga Kehelathahli rāmrah vasāpama. ²³Athumna Kehelathahwui eina zatphoklaga Shepher Kaphungli rāmrah vasāpama. ²⁴Athumna Shepher Kaphungwui eina zatphoklaga Haradahli rāmrah vasāpama. ²⁵Athumna Haradahwui eina zatphoklaga Makhelothli rāmrah vasāpama. ²⁶Athumna Makhelothwui eina zatphoklaga Tahathli rāmrah vasāpama. ²⁷Athumna Tahathwui eina zatphoklaga Terahli rāmrah vasāpama. ²⁸Athumna Terahwui eina zatphoklaga Mithkahli rāmrah vasāpama. ²⁹Athumna Mithkahwui eina zatphoklaga Hashmonahli rāmrah vasāpama. ³⁰Athumna Hashmonahwui eina zatphoklaga Moserothli rāmrah vasāpama. ³¹Athumna Moserothwui eina zatphoklaga Bene-jaakanli rāmrah vasāpama. ³²Athumna Bene-jaakanwui eina zatphoklaga Hor-haggidgadli rāmrah vasāpama. ³³Athumna Hor-haggidgadwui eina zatphoklaga Jotbathahli rāmrah vasāpama. ³⁴Athumna Jotbathahwui eina zatphoklaga Abronahli rāmrah vasāpama. ³⁵Athumna Abronahwui eina zatphoklaga Ezion-geberli rāmrah vasāpama. ³⁶Athumna Ezion-geberwui eina zatphoklaga Zinwui lamhāngli, chiya Kadeshli, rāmrah vasāpama. ³⁷Athumna Kadeshwui eina zatphoklaga Edom ngaleiwui tharili khalei Hor Kaphungli rāmrah vasāpama. ³⁸Pāngmon Aaronna ithumwui Avāna kakaso eina Hor Kaphungli kai, kala Israelwui mibing Egypt ngaleiwui eina shokta zingkum hangmati, kachāng kaphangāwui kharethang chili thihaowa. ³⁹Aaronna Hor Kaphungli kathi tharan a zingkum shākha maga̱da kathum kāshunghairasai. ⁴⁰Canaan ngaleiwui Negebli kapam Aradwui Canaan awungana Israelnaobing rārāli kaji shāhaowa. ⁴¹Athumna Hor Kaphungwui eina zatphoklaga Zalmonahli rāmrah vasāpama. ⁴²Athumna Zalmonahwui eina zatphoklaga Punonli rāmrah vasāpama. ⁴³Athumna Punonwui eina zatphoklaga Obothli rāmrah vasāpama. ⁴⁴Athumna Obothwui eina zatphoklaga Moabwui tharili khalei Iyeabarimli rāmrah vasāpama. ⁴⁵Athumna Iyimwui eina zatphoklaga Dibon-gadli rāmrah vasāpama. ⁴⁶Athumna Dibon-gadwui eina zatphoklaga Almon-diblathaimli rāmrah vasāpama. ⁴⁷Athumna Almon-diblathaimwui eina zatphoklaga Nebo ngalemli khalei Abarimwui phungreili rāmrah vasāpama. ⁴⁸Athumna Abarimwui phungreiwui eina zatphoklaga Jerichowui Jordan ngalemli khalei Moab tampākli rāmrah vasāpama. ⁴⁹Athumna Moab tampākli khalei Jordan ngalemli, Beth-jeshimothwui eina Abel-shittim vāshungda rāmrah vasāpama.

⁵⁰Jerichowui Jordan ngalemli khalei Moab tampākli ithumwui Avāna Mosesli hānga,

⁵¹"Israel mibingli hānglu, nathumna Jordan kānlaga Canaan ngaleili kazang chitharan, ⁵²Ngalei chili leikasābing saikorali nathumwui mangāli kashamshokhaolu; athumwui rukkakhui meoma̱ saikora kala heikakhui meoma̱ saikora sākazamhailaga, athumwui kajujuipam saikora shaokhaimihaolu. ⁵³Ngalei chi samphanglaga chili sompamlu, kaja ina nathumli shimlui sākhavai ngalei chi mihaira. ⁵⁴Nathumwui shimkhurbingwui alungli kalā yangda ngalei chi ngayarlu; hakkhamei shimkhurli hakkhamei ngalei milu, kala teokhamei shimkhurli teomeida milu. Kachikathā akhawui vang kalā tāhaora pam chi awuina ngasāra. Nathumwui avāva̱ ngarā shangbingwui athishurda nathumna samphangra.

⁵⁵"Kha nathumna ngalei chili leikasābing chi nathumwui mangāli makashamshok tharan, nathumna taikahaibing chi nathumwui mikli ka̱reng ngasāhaida nathumwui kashanli ka̱shāt ngasāra, kala nathumna pamda khalei ngalei chili nathumli sheikhaura. ⁵⁶Kala chiwui thili athumli sākhavai ina phaningsai chi nathumli ina sāra."