Wout yo te mache a

Moyiz ekri chak etap vwayaj la soti Ramsès rive nan plenn Moab yo, kan apre kan, ansanm ak kote Arawon te mouri. Apre sa vini kòmandman an: travèse Jouden an, chase moun ki rete la yo, detwi zidòl yo ak wo plas yo, epi separe peyi a pa tiraj osò.

Chapit 33.

Men etap vwayaj moun pèp Izrayèl yo te fè lè yo soti nan peyi Lejip, dapre lame yo, anba kòmandman Moyiz ak Aron. Dapre lòd Papa nou, Moyiz te ekri kote yo te pati chak etap; men etap yo dapre kote yo te pati. Yo pati soti Ramsès sou kenzyèm jou premye mwa a, nan denmen fèt Delivrans lan—moun pèp Izrayèl yo soti tèt dwat, devan je tout moun peyi Lejip yo, pandan moun peyi Lejip yo t'ap antere tout premye pitit gason yo, sa yo Papa nou te frape touye nan mitan yo; epi Papa nou te pini bondye yo tou. Moun pèp Izrayèl yo pati soti Ramsès, yo moute kan yo Soukòt. Yo pati soti Soukòt, yo moute kan yo Etam, ki sou lizyè dezè a. Yo kite Etam, yo tounen vè Pi-ayiròt, sou bò solèy leve Baal-Sefon, epi yo moute kan yo devan Migdòl. Yo pati soti devan Ayiròt, yo travèse lanmè a pou antre nan dezè a, yo mache twa jou nan dezè Etam, epi yo moute kan yo Mara. Yo kite Mara, yo rive Elim, kote ki te gen douz sous dlo ak swasanndis pye palmis; se la yo moute kan yo. Yo pati soti Elim, yo moute kan yo bò Yam Souf. ^a Yo pati soti Yam Souf, yo moute kan yo nan dezè Sin. Yo pati soti nan dezè Sin, yo moute kan yo Dofka. Yo pati soti Dofka, yo moute kan yo Aloush. Yo kite Aloush, yo moute kan yo Refidim, kote pèp la pa t' jwenn dlo pou yo bwè. Yo pati soti Refidim, yo moute kan yo nan dezè Sinayi. Yo pati soti nan dezè Sinayi, yo moute kan yo Kibwòt-Atava. Yo pati soti Kibwòt-Atava, yo moute kan yo Azewòt. Yo pati soti Azewòt, yo moute kan yo Ritma. Yo pati soti Ritma, yo moute kan yo Rimon-Perèz. Yo pati soti Rimon-Perèz, yo moute kan yo Libna. Yo pati soti Libna, yo moute kan yo Risa. Yo pati soti Risa, yo moute kan yo Keyelata. Yo pati soti Keyelata, yo moute kan yo nan mòn Chefè. Yo pati soti nan mòn Chefè, yo moute kan yo Arada. Yo pati soti Arada, yo moute kan yo Makelòt. Yo pati soti Makelòt, yo moute kan yo Tayat. Yo pati soti Tayat, yo moute kan yo Tera. Yo pati soti Tera, yo moute kan yo Mitka. Yo pati soti Mitka, yo moute kan yo Achmona. Yo pati soti Achmona, yo moute kan yo Mosewòt. Yo pati soti Mosewòt, yo moute kan yo Bene-Jakan. Yo pati soti Bene-Jakan, yo moute kan yo Or-Agidgad. Yo pati soti Or-Agidgad, yo moute kan yo Jotbata. Yo pati soti Jotbata, yo moute kan yo Abwona. Yo pati soti Abwona, yo moute kan yo Ezyon-Gebè. Yo pati soti Ezyon-Gebè, yo moute kan yo nan dezè Zin, sa vle di Kadès. Yo kite Kadès, yo moute kan yo nan mòn Or, sou lizyè peyi Edon. Aron, prèt la, moute sou mòn Or dapre lòd Papa nou, epi li mouri la nan karantyèm lanne apre moun pèp Izrayèl yo te soti nan peyi Lejip, nan senkyèm mwa a, premye jou mwa a. Aron te gen santvenntwazan lè li mouri sou mòn Or. Wa Arad la, yon moun Kanaran ki t'ap viv nan rejyon Negèv nan peyi Kanaran, tande moun pèp Izrayèl yo t'ap vini. Yo pati soti nan mòn Or, yo moute kan yo Salmona. Yo pati soti Salmona, yo moute kan yo Pounon. Yo pati soti Pounon, yo moute kan yo Obòt. Yo pati soti Obòt, yo moute kan yo Iye-Abarim, sou fwontyè peyi Moab. Yo pati soti Iyim, yo moute kan yo Dibon-Gad. Yo pati soti Dibon-Gad, yo moute kan yo Almon-Diblatayim. Yo pati soti Almon-Diblatayim, yo moute kan yo nan mòn Abarim yo, toupre Nebo. Yo kite mòn Abarim yo, yo moute kan yo nan plenn Moab yo, bò larivyè Jouden, anfas Jeriko. Yo moute kan yo bò larivyè Jouden, depi Bèt-Jechimòt jouk Abèl-Chitim, nan plenn Moab yo.

Papa nou pale ak Moyiz nan plenn Moab yo, bò larivyè Jouden, anfas Jeriko. Li di l':

“Pale ak moun pèp Izrayèl yo, di yo: Lè n'a travèse larivyè Jouden an pou n' antre nan peyi Kanaran, chase devan nou tout moun k'ap viv nan peyi a; kraze tout zidòl yo te taye ak tout estati yo te fonn an metal, epi demoli tout kote yo konn fè sèvis sou mòn yo. Pran peyi a pou nou, rete ladan l', paske se mwen menm ki ba nou peyi a pou l' tounen pou nou. N'a separe peyi a pa tiraj osò pami fanmi nou yo—yon gwo fanmi va resevwa yon gwo pòsyon, yon ti fanmi va resevwa yon ti pòsyon. Kote osò a tonbe pou yon moun, se la k'ap pou li. N'a resevwa eritaj nou dapre branch fanmi zansèt nou yo.

“Men si nou pa chase moun k'ap viv nan peyi a devan nou, moun nou kite yo va tounen tankou pay nan je nou ak pikan nan kòt nou, y'a ban nou tèt chaje nan peyi kote n'ap viv la. Lè sa a, m'a fè nou sa m' te fè plan pou m' te fè yo a.”