Mi eng' bukuit

Kaitosyek 33 FHB Father's Heart Bible™

Kiistoi 15% eng' kiy ne iale korook →
Bukuit

Ooreet ne Ki Pa

Ki sir Musa panwek tugul che po panweet kong'eetee Rameses agoi osnoosyegap Moab, nganaseet ak nganaseet, kobooto ole ki me Aron. Yeityo ng'atutyet: olanda Jordan, oilaanda che menyei emet, obel imagenikwak ak komoswekwak che tororeen, ak opcheune emet eng' kalewenet.

Ng'alaali Kwandanyo eng' mustarisyek 51–56

Sura 33.

Chu panwegap piigap Israel che kingo mong' eng' emetap Misiri, ko uu lugosyekwak, eng' eutap Musa ak Aron. Ki sir Musa ole kong'eetyee eng' panwekwak, ko uu ng'atutiikap Kwandanyo; ak chu panwekwak ko uu ole kong'eetyee. Ki pa eng' Rameses eng' peetuutap taman ak muut ne po arawetap tai, peetuut ne kingo pata Paska—ki mondoi piigap Israel eng' kimnateet ne oo, ye keerei Misiriik tugul, Ye kita kotupchi Misiriik lagokwak che kiptai tugul, che ki par Kwandanyo kwenunnywa, ak kap kanamonikwak koyai Kwandanyo kiruogik. Ki pa lagogap Israel eng' Rameses ak komuung'e Sukoth. Ki pa eng' Sukoth ak komuung'e Etam, ne mi ole poochin surkwen. Ki pa eng' Etam, koweek koba Pi-hairot, komostap kong'asiis ne po Baal-sepon, ak komuung'e taitap Migdol. Ki pa eng' taitap Hairot, kolanda nyanjet koba surkwen, ak ki pa peetuusyek somok eng' surkwen ne po Etam, ak komuung'e Marah. Ki pa eng' Marah agoi koit Elim, ole ki mi kong'igap peek tamanu ak aeng' ak tiironigap sosik tamanwogik tisap; ak ki komuung'e olooto. Ki pa eng' Elim ak komuung'e ole neegitee Yam Suph. a a v10 Yam Suph ko kainetap Ebraniik ne po peek che kigure Araraita ne Piriir. Ki pa eng' Yam Suph ak komuung'e surkwen ne po Sin. Ki pa eng' surkwen ne po Sin ak komuung'e Dobka. Ki pa eng' Dobka ak komuung'e Alus. Ki pa eng' Alus ak komuung'e Rephidim, ole ki ma komi peek che ee piik. Ki pa eng' Rephidim ak komuung'e surkwen ne po Sinai. Kong'eetyee piik eng' surkwen ne po Sinai, komuung'e Kibrot-hataaba. Ki pa eng' Kibrot-hataaba ak komuung'e Haserot. Ki pa eng' Haserot ak komuung'e Ritma. Ki pa eng' Ritma ak komuung'e Rimon-peres. Ki pa eng' Rimon-peres ak komuung'e Libna. Ki pa eng' Libna ak komuung'e Risa. Ki pa eng' Risa ak komuung'e Kehelata. Ki pa eng' Kehelata ak komuung'e tulweetap Shefer. Ki pa eng' tulweetap Shefer ak komuung'e Harada. Ki pa eng' Harada ak komuung'e Makelot. Ki pa eng' Makelot ak komuung'e Tahat. Ki pa eng' Tahat ak komuung'e Tera. Ki pa eng' Tera ak komuung'e Mitka. Ki pa eng' Mitka ak komuung'e Hasmona. Ki pa eng' Hasmona ak komuung'e Moserot. Ki pa eng' Moserot ak komuung'e Bene-jaakan. Ki pa eng' Bene-jaakan ak komuung'e Hor-hagidgad. Ki pa eng' Hor-hagidgad ak komuung'e Jotbata. Ki pa eng' Jotbata ak komuung'e Abrona. Ki pa eng' Abrona ak komuung'e Esion-geber. Ki pa eng' Esion-geber ak komuung'e surkwen ne po Sin, ne nooto Kadesh. Ki pa eng' Kadesh ak komuung'e tulweetap Hor, eng' kiwotetap emetap Edom. Ki togosta Aron tisiindet tulweetap Hor ko uu ng'atutiikap Kwandanyo, ak kome olooto eng' kenyiitap artam kobooch ye kingo mong' lagogap Israel eng' emetap Misiri, eng' arawetap muut, eng' peetuutap tai. Ki meng'iis Aron kenyiisyek pogol ak tiptem ak somok ye kingo me eng' tulweetap Hor. Ki kas kanaanindet, laitoryatap Arad ne ki tebi Murot Tai ne po Kanaan, kole pwoonei lagogap Israel. Ki pa eng' tulweetap Hor agoi komuung'e Salmona. Ki pa eng' Salmona agoi komuung'e Punon. Ki pa eng' Punon agoi komuung'e Obot. Kong'eetyee eng' Obot agoi komuung'e Iye-abarim, eng' kiwotetap Moab. Ki pa eng' Iyim agoi komuung'e Dibon-gad. Ki pa eng' Dibon-gad agoi komuung'e Almon-diblataim. Ki pa eng' Almon-diblataim agoi komuung'e tulwootinwegap Abarim, ne neegitee Nebo. Ki pa eng' tulwootinwegap Abarim agoi komuung'e warengetap Moab, ole neegitee Jordan eng' Jeriko. Ki komuung'so neegitee Jordan, kong'etee Beth-Jesimoth agoi Abel-shitim, eng' warengetap Moab.

Ki mwachi Kwandanyo Musa eng' atebweetap Moab, eng' ole neegitee Jordan koriikyin Jeriko, koleenji,

“Mwachi piigap Israel leenjin, Ye olandoe Jordan oit emetap Kanaan. Oone piik tugul che menyei emet eng' taing'wong'; opeel kanamonikwak tugul che ki kiwai ak itoonwek che kitaanyi, ak operekta oloisyechuwak tugul che toorotin. Oip emet omenye kwenyi, amu kaagoochinok emet si oip. Opchei emet eng' seret kwenutap ortinwekwok—ocheeng'chi che chaang' poroteet ne oo, ak che ng'ering' poroteet ne ming'in. Ole tar seret eng' chii age tugul, egu nenyi. Oip poroteng'wong' ko uu pororyosyegap kwanisyekwok.

“Ago ngot ma oone piik che menyei emet eng' taing'wong', koek che obakta katook eng' konyeng'wong' ak ng'wonik eng' terteroosyekwok, konyalilok eng' emet ne omenye. Ak anyun ayachini okweek ko uu ye ki abwaati ayachi icheek.”