INumeri 33

33 ¹Lezi yizigaba zohambo lwabakwa-Israyeli bephuma eGibhithe, ngamaviyo abo ngaphansi kwesandla sikaMose no-Aroni. ²UMose wabhala iziqalo zabo ngezigaba, ngokomyalo kaBaba wethu; lezi yizigaba zabo ngokweziqalo zabo. ³Basuka eRamesesi ngosuku lweshumi nanhlanu lwenyanga yokuqala, ngosuku olulandela iPhasika—abakwa-Israyeli baphuma ngesibindi, phambi kwamehlo awo onke amaGibhithe, ⁴amaGibhithe esamba onke amazibulo awo, uBaba wethu ayewabulele phakathi kwawo, nakubonkulunkulu bawo uBaba wethu wehlisela izahlulelo. ⁵Abantwana bakwa-Israyeli basuka eRamesesi bamisa eSukothi. ⁶Basuka eSukothi bamisa e-Ethamu, elisonqenqemeni lwehlane. ⁷Basuka e-Ethamu, baphendukela ePhi-Hahiroti, empumalanga yeBhali-Zefoni, bamisa phambi kweMigidoli. ⁸Basuka phambi kweHahiroti, bawela ulwandle baya ehlane, bahamba izinsuku ezintathu ehlane lase-Ethamu, bamisa eMara. ⁹Basuka eMara bafika e-Elimi, lapho kwakukhona imithombo yamanzi eyishumi nambili nezihlahla zesundu ezingamashumi ayisikhombisa; bamisa khona lapho. ¹⁰Basuka e-Elimi bamisa ngaseYamu Sufi. ^a a v10 IYamu Sufi yigama lesiHeberu lechibi lamanzi elaziwa kakhulu ngokuthi uLwandle Olubomvu. ¹¹Basuka eYamu Sufi bamisa ehlane laseSini. ¹²Basuka ehlane laseSini bamisa eDofka. ¹³Basuka eDofka bamisa e-Alushi. ¹⁴Basuka e-Alushi bamisa eRefidimu, lapho abantu babengenamanzi okuphuza. ¹⁵Basuka eRefidimu bamisa ehlane laseSinayi. ¹⁶Basuka ehlane laseSinayi bamisa eKibhroti-Hathava. ¹⁷Basuka eKibhroti-Hathava bamisa eHazeroti. ¹⁸Basuka eHazeroti bamisa eRithma. ¹⁹Basuka eRithma bamisa eRimoni-Pheresi. ²⁰Basuka eRimoni-Pheresi bamisa eLibhina. ²¹Basuka eLibhina bamisa eRisa. ²²Basuka eRisa bamisa eKehelatha. ²³Basuka eKehelatha bamisa entabeni iSheferi. ²⁴Basuka entabeni iSheferi bamisa eHarada. ²⁵Basuka eHarada bamisa eMakheloti. ²⁶Basuka eMakheloti bamisa eThahati. ²⁷Basuka eThahati bamisa eThera. ²⁸Basuka eThera bamisa eMithka. ²⁹Basuka eMithka bamisa eHashimona. ³⁰Basuka eHashimona bamisa eMoseroti. ³¹Basuka eMoseroti bamisa eBhene-Jakani. ³²Basuka eBhene-Jakani bamisa eHori-Hagidigadi. ³³Basuka eHori-Hagidigadi bamisa eJothibatha. ³⁴Basuka eJothibatha bamisa e-Abhrona. ³⁵Basuka e-Abhrona bamisa e-Eziyoni-Gebheri. ³⁶Basuka e-Eziyoni-Gebheri bamisa ehlane laseZini, okungukuthi iKadeshi. ³⁷Basuka eKadeshi bamisa entabeni iHori, onqenqemeni lwezwe lase-Edomi. ³⁸U-Aroni umpristi wakhuphukela entabeni iHori ngokomyalo kaBaba wethu wafela khona ngonyaka wamashumi amane emva kokuphuma kwabantwana bakwa-Israyeli ezweni laseGibhithe, ngenyanga yesihlanu, ngosuku lwayo lokuqala. ³⁹U-Aroni wayeneminyaka eyikhulu namashumi amabili nantathu ubudala mhla efa entabeni iHori. ⁴⁰Inkosi yamaKhanani yase-Aradi, eyayihlala eNegevi laseKhanani, yezwa ukuthi abakwa-Israyeli bayeza. ⁴¹Basuka entabeni iHori bamisa eZalimona. ⁴²Basuka eZalimona bamisa ePhunoni. ⁴³Basuka ePhunoni bamisa e-Obhoti. ⁴⁴Basuka e-Obhoti bamisa e-Iye-Abharimi, emngceleni wakwaMowabi. ⁴⁵Basuka e-Iyimi bamisa eDibhoni-Gadi. ⁴⁶Basuka eDibhoni-Gadi bamisa e-Alimoni-Dibhilathayimi. ⁴⁷Basuka e-Alimoni-Dibhilathayimi bamisa ezintabeni zase-Abharimi, eduze neNebo. ⁴⁸Basuka ezintabeni zase-Abharimi bamisa emathafeni akwaMowabi, ngaseJordani maqondana neJeriko. ⁴⁹Bamisa ngaseJordani, kusukela eBheti-Jeshimoti kuze kufike e-Abeli-Shithimi, emathafeni akwaMowabi.

⁵⁰UBaba wethu wakhuluma kuMose emathafeni akwaMowabi ngaseJordani maqondana neJeriko, wathi:

⁵¹“Khuluma kubakwa-Israyeli uthi kubo: Lapho seniwela iJordani ningena ezweni laseKhanani. ⁵²Xoshani bonke abahlala kulelo zwe phambi kwenu; nibhubhise yonke imifanekiso yabo ebaziweyo nezithombe zensimbi, nidilize zonke izindawo zabo eziphakeme. ⁵³Dlani ifa lezwe nihlale kulo, ngokuba ngininike izwe ukuba nibe nefa lalo. ⁵⁴Nizahlulelane izwe ngenkatho ngokwemindeni yenu—umhlaba omningi emndenini omkhulu, omncane komncane. Lapho inkatho iwela khona kumuntu, lokho kuba ngokwakhe. Niyakudla ifa ngokwezizwe zokhokho benu.

⁵⁵“Kodwa uma ningabaxoshi abahlali bezwe phambi kwenu, labo enibashiyayo bayakuba yizinhlungu emehlweni enu nameva ezinhlangothini zenu, benihluphe ezweni enihlala kulo. ⁵⁶Khona-ke ngiyakwenza kini lokho engangihlose ukukwenza kubo.”