民數記 33

33 ¹以下係以色列人喺摩西同亞倫帶領之下,分隊出埃及嘅行程站點。 ²摩西按住我哋嘅父嘅吩咐,將佢哋一站一站嘅起行地方記低;呢啲就係佢哋按起行地方所記嘅行程。 ³正月十五,即係逾越節之後嘅第二日,佢哋由蘭塞起行;以色列人喺所有埃及人眼前,昂然出發, ⁴嗰陣時埃及人正埋葬佢哋嘅長子,就係我哋嘅父喺佢哋中間所擊殺嘅;我哋嘅父又向佢哋嘅神明施行審判。 ⁵以色列人由蘭塞起行,喺疏割紮營。 ⁶佢哋由疏割起行,喺曠野邊緣嘅以倘紮營。 ⁷佢哋離開以倘,折返到比哈希錄,就係巴力洗分東面,喺密奪對面紮營。 ⁸佢哋由哈希錄對面起行,穿過海入到曠野,喺以倘曠野行咗三日,喺瑪拉紮營。 ⁹佢哋離開瑪拉,去到以琳,嗰度有十二股水泉同七十棵棕樹;佢哋就喺嗰度紮營。 ¹⁰ 佢哋由以琳起行,喺蘆葦海邊紮營。 ^a a v10 蘆葦海係希伯來文對一般人稱為紅海嗰片水域嘅叫法。 ¹¹佢哋由蘆葦海起行,喺汛曠野紮營。 ¹²佢哋由汛曠野起行,喺脫加紮營。 ¹³佢哋由脫加起行,喺亞錄紮營。 ¹⁴佢哋離開亞錄,喺利非訂紮營,嗰度冇水俾人飲。 ¹⁵佢哋由利非訂起行,喺西奈曠野紮營。 ¹⁶佢哋由西奈曠野起行,喺基博羅哈他瓦紮營。 ¹⁷佢哋由基博羅哈他瓦起行,喺哈洗錄紮營。 ¹⁸佢哋由哈洗錄起行,喺利提瑪紮營。 ¹⁹佢哋由利提瑪起行,喺臨門帕烈紮營。 ²⁰佢哋由臨門帕烈起行,喺立拿紮營。 ²¹佢哋由立拿起行,喺勒撒紮營。 ²²佢哋由勒撒起行,喺基希拉他紮營。 ²³佢哋由基希拉他起行,喺沙斐山紮營。 ²⁴佢哋由沙斐山起行,喺哈拉大紮營。 ²⁵佢哋由哈拉大起行,喺瑪吉希錄紮營。 ²⁶佢哋由瑪吉希錄起行,喺他哈紮營。 ²⁷佢哋由他哈起行,喺他拉紮營。 ²⁸佢哋由他拉起行,喺密加紮營。 ²⁹佢哋由密加起行,喺哈摩拿紮營。 ³⁰佢哋由哈摩拿起行,喺摩西錄紮營。 ³¹佢哋由摩西錄起行,喺比尼亞干紮營。 ³²佢哋由比尼亞干起行,喺曷哈及甲紮營。 ³³佢哋由曷哈及甲起行,喺約巴他紮營。 ³⁴佢哋由約巴他起行,喺阿博拿紮營。 ³⁵佢哋由阿博拿起行,喺以旬迦別紮營。 ³⁶佢哋由以旬迦別起行,喺尋曠野,即係加低斯紮營。 ³⁷佢哋離開加低斯,喺以東地邊界嘅何珥山紮營。 ³⁸以色列人出埃及地之後第四十年,五月初一,祭司亞倫按住我哋嘅父嘅吩咐上到何珥山,喺嗰度過身。 ³⁹亞倫喺何珥山過身嗰陣,佢一百二十三歲。 ⁴⁰住喺迦南南地嘅迦南人亞拉得王,聽聞以色列人就快到嚟。 ⁴¹佢哋由何珥山起行,喺撒摩拿紮營。 ⁴²佢哋由撒摩拿起行,喺普嫩紮營。 ⁴³佢哋由普嫩起行,喺阿伯紮營。 ⁴⁴佢哋由阿伯起行,喺摩押邊界嘅以耶亞巴琳紮營。 ⁴⁵佢哋由以耶起行,喺底本迦得紮營。 ⁴⁶佢哋由底本迦得起行,喺亞門低比拉太音紮營。 ⁴⁷佢哋由亞門低比拉太音起行,喺尼波附近嘅亞巴琳山嶺紮營。 ⁴⁸佢哋離開亞巴琳山嶺,喺耶利哥對面約旦河邊嘅摩押平原紮營。 ⁴⁹佢哋喺摩押平原,沿住約旦河由伯耶施末一直到亞伯什亭紮營。

⁵⁰喺耶利哥對面約旦河邊嘅摩押平原,我哋嘅父對摩西講:

⁵¹「你要對以色列人講:當你哋過咗約旦河,入到迦南地, ⁵²就要喺你哋面前趕走嗰片地上所有嘅居民,毀滅佢哋一切雕刻嘅偶像同鑄造嘅像,又拆毀佢哋所有嘅邱壇。 ⁵³你哋要佔領嗰片地,住喺嗰度,因為我已經將呢片地賜俾你哋去佔領。 ⁵⁴你哋要按住宗族抽籤分地——人多嘅宗族多分啲地,人少嘅少分啲。籤落喺邊個嗰度,嗰笪地就歸佢。你哋要按住祖先嘅支派承受產業。

⁵⁵「但係如果你哋唔喺面前趕走嗰片地嘅居民,你哋所留低嘅人就會成為你哋眼中嘅刺、肋旁嘅荊棘,喺你哋所住嘅地方攪擾你哋。 ⁵⁶到嗰陣,我就會將我原本打算點對付佢哋嘅事,照樣對付你哋。」