民數記 34

34 ¹我哋嘅父同摩西講，話：

²「你要吩咐以色列人：你哋入到迦南地嘅時候，呢個就係要歸畀你哋做產業嘅地，即係迦南地連佢四圍嘅邊界。 ³你哋南邊由尋曠野起，沿住以東嘅邊界；你哋南面嘅界由死海嘅盡頭向東起。 ⁴你哋嘅界要繞過亞克拉濱坡嘅南邊，過到尋，去到加低斯巴尼亞嘅南邊，再去到哈薩亞達，然後過到押們。 ⁵由押們起，個界轉去埃及小河，喺海嗰度做終點。

⁶ 「你哋西面嘅界就係大海連佢嘅海岸。 ^a a v6 大海就係地中海。

⁷「你哋北面嘅界係咁樣：由大海畫條線去到何珥山。 ⁸由何珥山畫條線去到哈馬口，喺西達做終點； ⁹跟住個界延伸到西斐崙，喺哈薩以難做終點。呢個就係你哋北面嘅界。

¹⁰「你哋要由哈薩以難劃出你哋東面嘅界，去到示番。 ¹¹ 個界要由示番落去利比拉，喺亞延嘅東邊，然後落去到基尼烈海東邊嘅斜坡。 ^b b v11 基尼烈海就係後嚟叫做加利利海嗰個湖。 ¹²個界落去約旦河，喺死海做終點。呢個就係你哋嘅地，連四圍嘅界。」

¹³摩西吩咐以色列人：呢個就係你哋要抽籤承受做產業嘅地，係我哋嘅父吩咐要畀九個支派同半個支派嘅。 ¹⁴呂便子孫嘅支派按住佢哋祖宗嘅家，同埋迦得子孫嘅支派按住佢哋祖宗嘅家，都已經領咗佢哋嘅產業；瑪拿西半個支派都領咗。 ¹⁵呢兩個半支派已經喺約旦河對面、耶利哥對開、向東日出嗰邊，領咗佢哋嘅產業。

我哋嘅父再講嘢

¹⁶我哋嘅父同摩西講，話：

¹⁷「要為你哋分地做產業嘅人，佢哋嘅名係咁：祭司以利亞撒同埋嫩嘅仔約書亞。 ¹⁸你哋又要由每一個支派揀一個領袖，去分呢塊地做產業。 ¹⁹呢啲就係嗰啲人嘅名：猶大支派，有耶孚尼嘅仔迦勒； ²⁰西緬子孫嘅支派，有亞米忽嘅仔示母利； ²¹便雅憫支派，有基斯倫嘅仔以利達; ²²但子孫嘅支派，有一個領袖，約利嘅仔布基; ²³約瑟嘅子孫：瑪拿西支派，有領袖以弗嘅仔漢聶； ²⁴以法蓮子孫嘅支派，有一個領袖，拾弗但嘅仔基母利; ²⁵西布倫子孫嘅支派，有一個領袖，帕納嘅仔以利撒番; ²⁶以薩迦子孫嘅支派，有一個領袖，亞散嘅仔帕鐵; ²⁷亞設子孫嘅支派，有一個領袖，示羅米嘅仔亞希忽; ²⁸拿弗他利子孫嘅支派，有一個領袖，亞米忽嘅仔比大黑。」

²⁹呢啲就係我哋嘅父吩咐去喺迦南地為以色列人分產業嘅人。