Seneibü Bouei Lauda
Kanan kaodakeibü leilang shuong phokukei—yungthang kho Zin yamlamang ka, chanep kho Yungnyu Yaangbü, yungkük kho Hazar Enan sühko, chaangbou kho Jordan danko Jemdei Yungnyu sühko—hoba chung weko ka leiyeibü müt che che, Eleazar si Joshua yoa phet janla shanga nyenkukei.
34 1Hobaje seneibü Bouei Mosa to laukei,
2“Israel shousi la sakkushi, Ladang kanei Kanan kaodak to atlaje, kan la phet shanga penbü kaodak kho, khoeibü leilang jenyua kibü Kanan kaodak kilabü. 3Kaneibü yungthang aephei kho Zin yamlamang ka Edom leilang peiko angan kilabü; hoba kaneibü yungthang leilang kho Jemdei Yungnyu thonbü ka, chaangbou aenei kilabü. 4Kaneibü leilang kho Akrabbim Danshang yungthang aephei to sepeilabü, hoba Zin danjung haulabü, hoba Kadesh Barnea yungthang aephei to haulabü, hoba Hazar Addar sühko hauan Azmon danjung haulabü. 5Azmon ka leilang kho Ijep shumang to sepeilabü, hoba yungnyua thonan kilabü.
6“Kaneibü chanep leilang kho Yungnyu Yaangbü hoba kho kommang kilabü. a a v6 Yungnyu Yaangbü kho Mediterranean yungnyu ki.
7“Ho kho kaneibü yungkük angbou leilang kilabü; Hor shongh sühko Yungnyu Yaangbü ka kaneibü leilang haulabü. 8Hor shongh ka kaneibü leilang Lebo Hamat sühko haulabü, hoba Zedada thonan kilabü; 9Kheijinei leilang kho Ziphron sühko longlabü, hoba Hazar Enana thonan kilabü. Ho kho kaneibü yungkük leilang kilabü.
10“Kaneibü chaangbou leilang kho Hazar Enan ka Shepham sühko haulabü. 11Leilang kho Shepham ka Ribla sühko yanlabü, kho Ain chaangbou aephei ki; hoba leilang yanan Khineret Yungnyu chaangbou aephei sühlabü. b b v11 Khineret Yungnyu kho phaia Galil Yungnyu dogo nyenbü yungnyu ki. 12Leilang kho Jordan sühko yanlabü, hoba Jemdei Yungnyua thonan kilabü. Ho kho kaneibü kaodak, kho kaijembo leilang yoa kilabü.”
13Hobaje Mosaei Israel shousi la sakkuko laukei, Ho kho kanei phaang pakan phet phanlabü kaodak ki; kho seneibü Bouei phang gü hoba phang jamde la kula sakkua. 14Reubeneibü shousi phang chempen chempen pakbü thüng, hoba Gadeibü shousi phang chempen chempen pakbü thüng, haoeneibü phet lean kiteikei; hoba Manasse phang jamdeei tokei lekei. 15Phang penyi thoeibüei Jordan danan Jerikho chaangbou ae, chaangbou chanyu angbou aenei haoeneibü phet hapbei.
Seneibü Bouei Nyibou Lauda
16Kheijinei seneibü Bouei Mosa to laukei,
17“Kan la phet shanga kaodak janlabü mütshuong nyen habü ho ki: Eleazar ungshedbou hoba Naneibü shou Joshua. 18Kaonyek kho phetphanla shanga kanei phang weko ka leiyeibou che che pienlabü. 19Mütshuong nyen habü ho ki: Jihuda phang ka Jefuneeibü shou Kaleb; 20Simeoneibü shousi chung ka Amihudeibü shou Shemuel; 21Benjamin phang ka Kisloneibü shou Elidad; 22Daneibü shousi chung ka leiyeibou che, Joglieibü shou Bukki; 23Josefeibü shousi shuong ka: Manasse phang ka leiyeibou Efodeibü shou Haniel, 24hoba Efraimeibü shousi chung ka leiyeibou che, Shipaneibü shou Kemuel; 25Zebuluneibü shousi chung ka leiyeibou che, Parnakeibü shou Elizafan; 26Issakareibü shousi chung ka leiyeibou che, Azaneibü shou Paltiel; 27Ashereibü shousi chung ka leiyeibou che, Shelomieibü shou Ahihud; 28hoba Naftalieibü shousi chung ka leiyeibou che, Amihudeibü shou Pedahel.”
29Habü ho Kanan kaodaka Israel shousi shuong la phetphanla shanga Bouei sakkubü mütshuong ki.
