ዘኍልቍ 34

34 ¹አባታችንም ሙሴን እንዲህ ሲል ተናገረው፤

²“ለእስራኤላውያን እንዲህ ብለህ እዘዛቸው፦ ወደ ከነዓን ምድር በምትገቡ ጊዜ፣ እንደ ርስት የሚደርሳችሁ ምድር ይህ ነው፤ ይኸውም በዳር ድንበሩ ውስጥ ያለው የከነዓን ምድር ነው። ³የደቡብ ወገናችሁ ከጺን ምድረ በዳ ተነሥቶ በኤዶም ዳር ያልፋል፤ የደቡብ ድንበራችሁም ከሙት ባሕር ጫፍ ጀምሮ ወደ ምሥራቅ ይሄዳል። ⁴ድንበራችሁም ወደ ዐቅራቢም ዐቀበት ደቡብ ዘወር ብሎ ወደ ጺን ያልፋል፤ ከቃዴስ በርኔዓ ደቡብም ደርሶ ወደ ሐጸር አዳር ይቀጥላል፤ ወደ ዓጽሞንም ያልፋል። ⁵ድንበሩም ከዓጽሞን ወደ ግብፅ ወንዝ ዘወር ብሎ በባሕሩ ዘንድ ያበቃል።

⁶“የምዕራብ ድንበራችሁ ሜዲትራኒያን ባሕርና ዳርቻው ይሆናል። ^a a v6 ታላቁ ባሕር የተባለው ሜዲትራኒያን ባሕር ነው።

⁷“የሰሜን ድንበራችሁ ይህ ይሆናል፦ ከሜዲትራኒያን ባሕር ጀምሮ እስከ ሆር ተራራ ድረስ መስመር ሰምሩ። ⁸ከሆር ተራራ ጀምሮ እስከ ሌቦ ሐማት ድረስ መስመር ምሩ፤ ፍጻሜውም ጼዳድ ይሁን፤ ⁹ከዚያም ድንበሩ እስከ ዚፍሮን ድረስ ተዘርግቶ በሐጸር ዔናን ያበቃል፤ የሰሜን ድንበራችሁም ይህ ይሆናል።

¹⁰“የምሥራቅ ድንበራችሁን ከሐጸር ዔናን ጀምሮ እስከ ሴፋም ድረስ ምሩ። ¹¹ድንበሩም ከሴፋም ወደ ራብላ፣ ከዓይን ምሥራቅ ይወርዳል፤ ከዚያም ወርዶ ከኪኔሬት ባሕር ምሥራቅ ያለውን ተዳፋት ይደርሳል። ^b b v11 የኪኔሬት ባሕር ኋላ የገሊላ ባሕር የተባለው ሐይቅ ነው። ¹²ድንበሩም ወደ ዮርዳኖስ ወርዶ በሙት ባሕር ያበቃል። ይህ፣ በዙሪያው ካሉት ድንበሮቹ ጋር፣ ምድራችሁ ይሆናል።”

¹³ሙሴም እስራኤላውያንን እንዲህ ብሎ አዘዛቸው፦ በዕጣ የምትወርሷት ምድር ይህች ናት፤ አባታችንም ለዘጠኙ ነገዶችና ለግማሹ ነገድ እንድትሰጥ አዘዘ። ¹⁴የሮቤል ልጆች ነገድ እንደ አባቶቻቸው ቤት፣ የጋድ ልጆች ነገድም እንደ አባቶቻቸው ቤት፣ የምናሴም ግማሽ ነገድ ርስታቸውን አስቀድመው ተቀብለዋል። ¹⁵ሁለቱና ግማሹ ነገዶች ርስታቸውን በዮርዳኖስ ማዶ፣ በኢያሪኮ አንጻር፣ ወደ ምሥራቅ ወደ ፀሐይ መውጫ ተቀበሉ።

አባታችን እንደ ገና ይናገራል

¹⁶አባታችንም ሙሴን እንዲህ ሲል ተናገረው፤

¹⁷“ምድሪቱን እንደ ርስት የሚያካፍሏችሁ ሰዎች ስም ይህ ነው፦ ካህኑ አልዓዛርና የነዌ ልጅ ኢያሱ ናቸው። ¹⁸ምድሪቱን ለርስት ለማካፈልም ከእያንዳንዱ ነገድ አንድ አለቃ ውሰዱ። ¹⁹የሰዎቹም ስም ይህ ነው፤ ከይሁዳ ነገድ የየፎኔ ልጅ ካሌብ፤ ²⁰ከስምዖን ልጆች ነገድ የዓሚሁድ ልጅ ሳሙኤል፤ ²¹ከብንያም ነገድ የኪስሎን ልጅ ኤሊዳድ፤ ²²ከዳን ልጆች ነገድ አለቃ የዮግሊ ልጅ ቡኪ፤ ²³ከዮሴፍ ልጆች ማለት ከምናሴ ነገድ አለቃ የኤፎድ ልጅ ሐኒኤል፤ ²⁴ከኤፍሬም ልጆች ነገድም አለቃ የሺፍታን ልጅ ቀሙኤል፤ ²⁵ከዛብሎን ልጆች ነገድ አለቃ የፋርናክ ልጅ ኤሊሳፋን፤ ²⁶ከይሳኮር ልጆች ነገድ አለቃ የዓዛን ልጅ ጳልቲኤል፤ ²⁷ከአሴር ልጆች ነገድ አለቃ የሴሎሚ ልጅ አሒሁድ፤ ²⁸ከንፍታሌም ልጆች ነገድም አለቃ የዓሚሁድ ልጅ ጴዳሄል ናቸው።”

²⁹አባታችን በከነዓን ምድር ለእስራኤል ልጆች ርስትን እንዲያካፍሉ ያዘዛቸው እነዚህ ናቸው።