Me basika na mukanda
Dibuku

Tata ke tuba

Ba ke teza bandilu ya yinsi ya Kaana — na sude katuka na yinsi ya kuyuma ya Sine, na wesete mubu ya Meditelane, na node tii na Asale-Enane, na esete kulumuka na Yolodani tii na Mubu ya Kufwa — mpe ba ke pona mfumu mosi na konso dikanda samu na kukabula mvwilu kumosi na Eleyazale mpe Yeswa.

Tata ya beto ke zonza na bavese 2–12, 17–28

Kapu 34.

Tata ya beto tubaka na Moyize mutindu yayi:

«Pesa ntumunu na bana ya Isayeli: Kana beno kota na yinsi ya Kaana, yina ni yinsi yina ke kwiza kuvwanda mvwilu ya beno, yinsi ya Kaana na bandilu ya yawu. Lweka ya beno ya sude ke katuka na yinsi ya kuyuma ya Sine, na kulanda ndilu ya Edome. Na lweka ya esete, ndilu ya beno ya sude ke yantika na nsuka ya Mubu ya Mungwa. Ndilu ya beno ke baluka na lweka ya sude ya mongo ya Bankala-Nseke, yawu ke luta na Sine, yawu ke kuma na sude ya Kadese-Baleneya, yawu ke kwenda na Asale-Adale, mpe yawu ke luta na Asemone. Katuka na Asemone, ndilu ke baluka na muzumba ya Ngipiti, mpe yawu ke suka na mubu.

«Ndilu ya beno ya wesete ke vwanda mubu ya Meditelane mpe lweka ya yawu. a a v6 Mubu ya Nene kele mubu ya Meditelane.

«Yayi ni ke vwanda ndilu ya beno ya node: katuka na mubu ya Meditelane, beno fungula singa ya beno tii na Mongo ya Ole. Katuka na Mongo ya Ole, beno fungula singa tii na Lebo-Amate, mpe yawu ke suka na Sedade; Na manima, ndilu ke kwenda tii na Zifelone mpe yawu ke suka na Asale-Enane. Yayi ni ke vwanda ndilu ya beno ya node.

«Beno ke teza ndilu ya beno ya esete katuka na Asale-Enane tii na Sefame. Ndilu yango ke kulumuka, yawu ke katuka na Sefame tii na Libela yina kele na esete ya Eyine. Na manima, yawu ke kwenda na nsi tii na mbanzi na lweka ya esete ya dyanga ya Ngenezaleti. b b v11 Dyanga ya Ngenezaleti kele dyanga yina na nima ba bokilaka Dyanga ya Ngalileya. Ndilu ke kulumuka tii na nzadi ya Yolodani, mpe yawu ke suka na Mubu ya Mungwa. Yayi ni ke vwanda yinsi ya beno, na bandilu ya yawu na balweka nyonso.»

Moyize pesaka ntumunu na bana ya Isayeli: Yayi ni yinsi yina beno ke zwa mutindu mvwilu na nzila ya kikunku, yina Tata ya beto pesaka ntumunu na kupesa yawu na bifumba yivwa mpe na ndambu mosi ya kifumba. Kifumba ya bana ya Lubene, mutindu kele mabuta ya batata ya bawu, mpe kifumba ya bana ya Ngade, mutindu kele mabuta ya batata ya bawu, bawu me baka mvwilu ya bawu; ndambu ya kifumba ya Manase mpe me baka mvwilu ya bawu. Bifumba zole na ndambu bakaka mvwilu ya bawu na ndambu ya nkaka ya nzadi ya Yolodani, na ntadisi ya Yeliko, na lweka ya esete, na lweka yina ke basikilaka ntangu.

Tata ke tuba dyaka

Tata ya beto tubaka na Moyize mutindu yayi:

«Bankumbu ya babakala yina ke kabula yinsi samu na beno mutindu mvwilu ni yayi: Eleyazale nganga-Nzambi mpe Yeswa, mwana ya Nune. Beno ke baka na konso kifumba mfumu mosi samu na kukabula yinsi mutindu mvwilu. Yayi ni bankumbu ya babakala: Samu na kifumba ya Yuda: ni Kalebe, mwana ya Yefune. Samu na kifumba ya bana ya Simewone: Semuele, mwana ya Amiwude. Samu na kifumba ya Bezame: Elidade, mwana ya Kiselone. Samu na kifumba ya bana ya Dane: mfumu Buki, mwana ya Yongeli. Samu na bana ya Yosefi: samu na kifumba ya Manase, mfumu Aniele, mwana ya Efode, Samu mpe na kifumba ya bana ya Efalayime: mfumu Kemwele, mwana ya Sifetane. Samu na kifumba ya bana ya Zabulone: mfumu Elisafane, mwana ya Palenake. Samu na kifumba ya bana ya Isakale: mfumu Paletyele, mwana ya Azane. Samu na kifumba ya bana ya Asele: mfumu Ayiwude, mwana ya Selomi. mpe samu na kifumba ya bana ya Nafetali: mfumu Pedayele, mwana ya Amiwude.»

Yayi ni bantu yina Tata ya beto pesaka ntumunu na kukabula mvwilu na kati ya bana ya Isayeli, na yinsi ya Kaana.