Numbers 34 FHB Father's Heart Bible™

34 ¹Aru amar Pitri pora Moses ke koise,

²“Israel laga manuh khan ke hukum dibi: jitia tumikhan Canaan desh te ghusibo, eitu tumikhan laga adhikar hobole thaka desh ase—Canaan desh, tar simana khan bhitor te. ³Tumikhan laga dakshin phale Zin jongol pora Edom laga kinar loge loge jabo; tumikhan laga dakshin simana Mora Samundar laga sesh pora purab phale shuru hobo. ⁴Tumikhan laga simana Akrabbim laga uthani laga dakshin phale ghuri kene, Zin phale paar hoi kene, Kadesh-barnea laga dakshin te punchi kene, Hazar-addar phale jai kene, Azmon phale punchibo. ⁵Azmon pora simana tu Egypt laga nala phale ghuribo, aru Samundar te giri kene khotom hobo.

⁶“Tumikhan laga paschim simana tu Mediterranean Samundar aru tar kinar hobo. ^a a v6 Dangor Samundar tu Mediterranean ase.

⁷“Eitu tumikhan laga uttor simana hobo: Mediterranean Samundar pora Hor Pahar tak tumikhan laga rekha tani bi. ⁸Hor Pahar pora Lebo-hamath tak ekta rekha tani bi, aru Zedad te khotom hobo; ⁹Titia simana tu Ziphron tak bistar hobo aru Hazar-enan te khotom hobo. Eitu tumikhan laga uttor simana hobo.

¹⁰“Tumikhan laga purab simana tu Hazar-enan pora Shepham tak chihna kori lobi. ¹¹Simana tu Shepham pora Riblah tak, Ain laga purab phale, nami jabo, titia aru nami kene Chinnereth Samundar laga purab phale thaka dhalu te punchibo. ^b b v11 Chinnereth Samundar tu pichete Galilee Samundar koi kene mata hoise. ¹²Simana tu Jordan Nodi tak nami jabo, aru Mora Samundar te khotom hobo. Eitu, tar simana khan sob phale loi kene, tumikhan laga desh hobo.”

¹³Moses pora Israel laga manuh khan ke hukum di koise: Eitu tumikhan chithi phela kene adhikar pabole thaka desh ase, juntu amar Pitri pora nou-ta jati aru adha jati ke dibole hukum korise. ¹⁴Reuben laga bacha khan laga jati, tarkhan laga baba khan laga ghor hisab te, aru Gad laga bacha khan laga jati, tarkhan laga baba khan laga ghor hisab te, tarkhan laga adhikar age pora loi loise; Manasseh laga adha jati bhi eneka loise. ¹⁵Hei dui aru adha jati khan pora tarkhan laga adhikar Jordan Nodi laga paar phale, Jericho usor pora purab phale, suryo uthibole phale, paise.

Amar Pitri Aru Koi Ase

¹⁶Aru amar Pitri pora Moses ke koise,

¹⁷“Tumikhan karne desh tu adhikar hisab te bhag kori dibole thaka manuh khan laga nam eitu ase: Eleazar purohit aru Nun laga chokra Joshua. ¹⁸Aru desh tu adhikar karne bhag kori dibole, tumikhan pora ekta-ekta jati pora ekjon-ekjon cholawta loi lobi. ¹⁹Hei manuh khan laga nam eitu ase: Judah laga jati pora, Jephunneh laga chokra Caleb; ²⁰Simeon laga bacha khan laga jati pora, Ammihud laga chokra Shemuel; ²¹Benjamin laga jati pora, Chislon laga chokra Elidad; ²²Dan laga bacha khan laga jati pora, ekjon cholawta, Jogli laga chokra Bukki; ²³Joseph laga bacha khan pora: Manasseh laga jati pora, cholawta Hanniel, Ephod laga chokra, ²⁴aru Ephraim laga bacha khan laga jati pora, ekjon cholawta, Shiphtan laga chokra Kemuel; ²⁵Zebulun laga bacha khan laga jati pora, ekjon cholawta, Parnach laga chokra Elizaphan; ²⁶Issachar laga bacha khan laga jati pora, ekjon cholawta, Azzan laga chokra Paltiel; ²⁷Asher laga bacha khan laga jati pora, ekjon cholawta, Shelomi laga chokra Ahihud; ²⁸aru Naphtali laga bacha khan laga jati pora, ekjon cholawta, Ammihud laga chokra Pedahel.”

²⁹Canaan desh te Israel laga bacha khan majat te adhikar bhag kori dibole amar Pitri pora hukum diya manuh khan eitu ase.