Hesabu 34

34 ¹Naye Baba yetu akanena na Musa, akisema,

²"waamuru Waisraeli: mtakapoingia katika nchi ya Kanaani, hii ndiyo nchi itakayowaangukia kuwa urithi—nchi ya Kanaani, ndani ya mipaka yake. ³Upande wenu wa kusini utaanzia jangwa la Sini kandokando ya mpaka wa Edomu; mpaka wenu wa kusini utaanzia mwisho wa Bahari ya Chumvi, upande wa mashariki. ⁴Mpaka wenu utageuka kuelekea kusini mwa Mwinuko wa Akrabimu, uvuke kwenda Sini, ufike kusini mwa Kadesh-barnea, uendelee mpaka Hasar-adari, na kupita hata Asmoni. ⁵Kutoka Asmoni mpaka utageuka kuelekea Kijito cha Misri, na kuishia baharini.

⁶"Mpaka wenu wa magharibi utakuwa Bahari ya Mediterania na pwani yake. ^a a v6 Bahari Kubwa ndiyo Bahari ya Mediterania.

⁷"Huu ndio utakaokuwa mpaka wenu wa kaskazini: kutoka Bahari ya Mediterania mtapiga mstari wenu hata Mlima Hori. ⁸Kutoka Mlima Hori mtapiga mstari hata Lebo-hamathi, na kuishia Sedadi; ⁹kisha mpaka utaenea hata Zifroni na kuishia Hasar-enani. Huu ndio utakaokuwa mpaka wenu wa kaskazini.

¹⁰"Mtachora mpaka wenu wa mashariki kutoka Hasar-enani hata Shefamu. ¹¹Mpaka utateremka kutoka Shefamu hata Ribla, upande wa mashariki wa Aini, kisha utateremka na kufikia mteremko ulio mashariki mwa Bahari ya Kinerethi. ^b b v11 Bahari ya Kinerethi ndilo ziwa lililokuja kuitwa Bahari ya Galilaya. ¹²Mpaka utateremka hata Yordani, na kuishia katika Bahari ya Chumvi. Hii ndiyo itakayokuwa nchi yenu, pamoja na mipaka yake pande zote."

¹³Musa akawaamuru Waisraeli: Hii ndiyo nchi mtakayoirithi kwa kura, ambayo Baba yetu ameamuru kupewa kabila tisa na nusu ya kabila. ¹⁴Kabila la wana wa Reubeni, kwa nyumba za baba zao, na kabila la wana wa Gadi, kwa nyumba za baba zao, wamekwisha kupokea urithi wao; vivyo hivyo na nusu ya kabila la Manase. ¹⁵Kabila mbili na nusu wamepokea urithi wao ng'ambo ya Yordani kutoka Yeriko, upande wa mashariki kuelekea mawio ya jua.

Baba Yetu Anena Tena

¹⁶Naye Baba yetu akanena na Musa, akisema,

¹⁷"haya ndiyo majina ya watu watakaowagawia nchi kuwa urithi: Eleazari kuhani na Yoshua mwana wa Nuni. ¹⁸Nanyi mtatwaa kiongozi mmoja kutoka kila kabila kwa kuigawanya nchi kuwa urithi. ¹⁹Haya ndiyo majina ya watu: kutoka kabila la Yuda, Kalebu mwana wa Yefune; ²⁰kutoka kabila la wana wa Simeoni, Shemueli mwana wa Amihudi; ²¹kutoka kabila la Benyamini, Elidadi mwana wa Kisloni; ²²kutoka kabila la wana wa Dani, kiongozi, Buki mwana wa Yogli; ²³kutoka wana wa Yusufu: kutoka kabila la Manase, kiongozi Hanieli mwana wa Efodi, ²⁴na kutoka kabila la wana wa Efraimu, kiongozi, Kemueli mwana wa Shiftani; ²⁵kutoka kabila la wana wa Zabuloni, kiongozi, Elisafani mwana wa Parnaki; ²⁶kutoka kabila la wana wa Isakari, kiongozi, Paltieli mwana wa Azani; ²⁷kutoka kabila la wana wa Asheri, kiongozi, Ahihudi mwana wa Shelomi; ²⁸na kutoka kabila la wana wa Naftali, kiongozi, Pedaheli mwana wa Amihudi."

²⁹Hawa ndio ambao Baba yetu aliwaamuru kuwagawia urithi wana wa Israeli katika nchi ya Kanaani.