Numeri 33

33 ¹Wọ̀nyí ni àwọn ìdúró ìrìnàjò àwọn ọmọ Israẹli nígbà tí wọ́n jáde kúrò ní Ijipti, ní ìpín ogun wọn lábẹ́ ọwọ́ Mose àti Aaroni. ²Mose sì kọ àwọn ibi tí wọ́n ti bẹ̀rẹ̀ ìrìn sílẹ̀ ní ìbámu pẹ̀lú ìdúró kọ̀ọ̀kan, gẹ́gẹ́ bí àṣẹ Baba wa; wọ̀nyí ni àwọn ìdúró wọn ní ìbámu pẹ̀lú ibi tí wọ́n ti bẹ̀rẹ̀. ³Wọ́n jáde kúrò ní Rameses ní ọjọ́ kẹ́ẹ̀dógún oṣù kìíní, ní ọjọ́ kejì Àjọ̀dún Ìrékọjá—àwọn ọmọ Israẹli jáde pẹ̀lú ìgboyà, ní ojú gbogbo àwọn ará Ijipti, ⁴nígbà tí àwọn ará Ijipti ń sin gbogbo àwọn àkọ́bí wọn, àwọn tí Baba wa ti kọlù pa láàrín wọn, Baba wa sì ṣe ìdájọ́ sí àwọn òrìṣà wọn. ⁵Àwọn ọmọ Israẹli jáde kúrò ní Rameses, wọ́n sì pàgọ́ sí Sukoti. ⁶Wọ́n jáde kúrò ní Sukoti, wọ́n sì pàgọ́ sí Etamu, tí ó wà ní etí aginjù. ⁷Wọ́n kúrò ní Etamu, wọ́n padà sí Pi-hahiroti, ní ìhà ìlà-oòrùn Baali-sefoni, wọ́n sì pàgọ́ níwájú Migdoli. ⁸Wọ́n jáde kúrò níwájú Hahiroti, wọ́n sì la òkun kọjá sínú aginjù, wọ́n rìn ọjọ́ mẹ́ta nínú aginjù Etamu, wọ́n sì pàgọ́ sí Mara. ⁹Wọ́n kúrò ní Mara, wọ́n sì dé Elimu, níbi tí orísun omi méjìlá àti igi ọ̀pẹ àádọ́rin wà; wọ́n sì pàgọ́ síbẹ̀. ¹⁰Wọ́n jáde kúrò ní Elimu, wọ́n sì pàgọ́ létí Yam Sufu. ^a a v10 Yam Sufu ni orúkọ Hébérù fún omi tí a sábà mọ̀ sí Òkun Pupa. ¹¹Wọ́n jáde kúrò ní Yam Sufu, wọ́n sì pàgọ́ sí aginjù Sini. ¹²Wọ́n jáde kúrò ní aginjù Sini, wọ́n sì pàgọ́ sí Dofka. ¹³Wọ́n jáde kúrò ní Dofka, wọ́n sì pàgọ́ sí Aluṣi. ¹⁴Wọ́n kúrò ní Aluṣi, wọ́n sì pàgọ́ sí Refidimu, níbi tí àwọn ènìyàn kò ti ní omi láti mu. ¹⁵Wọ́n jáde kúrò ní Refidimu, wọ́n sì pàgọ́ sí aginjù Sinai. ¹⁶Wọ́n jáde kúrò ní aginjù Sinai, wọ́n sì pàgọ́ sí Kibroti-hattaafa. ¹⁷Wọ́n jáde kúrò ní Kibroti-hattaafa, wọ́n sì pàgọ́ sí Haserotu. ¹⁸Wọ́n jáde kúrò ní Haserotu, wọ́n sì pàgọ́ sí Ritma. ¹⁹Wọ́n jáde kúrò ní Ritma, wọ́n sì pàgọ́ sí Rimoni-peresi. ²⁰Wọ́n jáde kúrò ní Rimoni-peresi, wọ́n sì pàgọ́ sí Libna. ²¹Wọ́n jáde kúrò ní Libna, wọ́n sì pàgọ́ sí Rissa. ²²Wọ́n jáde kúrò ní Rissa, wọ́n sì pàgọ́ sí Kehelata. ²³Wọ́n jáde kúrò ní Kehelata, wọ́n sì pàgọ́ sí Òkè Ṣeferi. ²⁴Wọ́n jáde kúrò ní Òkè Ṣeferi, wọ́n sì pàgọ́ sí Harada. ²⁵Wọ́n jáde kúrò ní Harada, wọ́n sì pàgọ́ sí Makelotu. ²⁶Wọ́n jáde kúrò ní Makelotu, wọ́n sì pàgọ́ sí Tahati. ²⁷Wọ́n jáde kúrò ní Tahati, wọ́n sì pàgọ́ sí Tera. ²⁸Wọ́n jáde kúrò ní Tera, wọ́n sì pàgọ́ sí Mitka. ²⁹Wọ́n jáde kúrò ní Mitka, wọ́n sì pàgọ́ sí Haṣmona. ³⁰Wọ́n jáde kúrò ní Haṣmona, wọ́n sì pàgọ́ sí Moserotu. ³¹Wọ́n jáde kúrò ní Moserotu, wọ́n sì pàgọ́ sí Bene-jaakani. ³²Wọ́n jáde kúrò ní Bene-jaakani, wọ́n sì pàgọ́ sí Hori-haggidgadi. ³³Wọ́n jáde kúrò ní Hori-haggidgadi, wọ́n sì pàgọ́ sí Jotbata. ³⁴Wọ́n jáde kúrò ní Jotbata, wọ́n sì pàgọ́ sí Abrona. ³⁵Wọ́n jáde kúrò ní Abrona, wọ́n sì pàgọ́ sí Esioni-geberi. ³⁶Wọ́n jáde kúrò ní Esioni-geberi, wọ́n sì pàgọ́ sí aginjù Sini, èyí tí í ṣe Kadeṣi. ³⁷Wọ́n kúrò ní Kadeṣi, wọ́n sì pàgọ́ sí Òkè Hori, ní etí ilẹ̀ Edomu. ³⁸Aaroni àlùfáà gun Òkè Hori gẹ́gẹ́ bí àṣẹ Baba wa, ó sì kú síbẹ̀ ní ọdún ogójì lẹ́yìn tí àwọn ọmọ Israẹli jáde kúrò ní ilẹ̀ Ijipti, ní oṣù karùn-ún, ní ọjọ́ kìíní oṣù náà. ³⁹Aaroni jẹ́ ẹni ọgọ́rùn-ún ọdún ó lé mẹ́tàlélógún nígbà tí ó kú ní Òkè Hori. ⁴⁰Ọba Kenaani ti Aradi, tí ó ń gbé ní Negefu ilẹ̀ Kenaani, gbọ́ pé àwọn ọmọ Israẹli ń bọ̀. ⁴¹Wọ́n jáde kúrò ní Òkè Hori, wọ́n sì pàgọ́ sí Salmona. ⁴²Wọ́n jáde kúrò ní Salmona, wọ́n sì pàgọ́ sí Punoni. ⁴³Wọ́n jáde kúrò ní Punoni, wọ́n sì pàgọ́ sí Obotu. ⁴⁴Wọ́n jáde kúrò ní Obotu, wọ́n sì pàgọ́ sí Iye-abarimu, ní agbègbè ààlà Moabu. ⁴⁵Wọ́n jáde kúrò ní Iyimu, wọ́n sì pàgọ́ sí Diboni-gadi. ⁴⁶Wọ́n jáde kúrò ní Diboni-gadi, wọ́n sì pàgọ́ sí Almoni-diblataimu. ⁴⁷Wọ́n jáde kúrò ní Almoni-diblataimu, wọ́n sì pàgọ́ sí àwọn òkè Abarimu, nítòsí Nebo. ⁴⁸Wọ́n kúrò ní àwọn òkè Abarimu, wọ́n sì pàgọ́ ní pẹ̀tẹ́lẹ̀ Moabu, létí Jordani lẹ́gbẹ̀ẹ́ Jeriko. ⁴⁹Wọ́n pàgọ́ létí Jordani, láti Beti-jeṣimotu títí dé Abeli-ṣittimu, ní pẹ̀tẹ́lẹ̀ Moabu.

⁵⁰Baba wa sọ̀rọ̀ sí Mose ní pẹ̀tẹ́lẹ̀ Moabu, létí Jordani lẹ́gbẹ̀ẹ́ Jeriko pé:

⁵¹“Sọ fún àwọn ọmọ Israẹli pé: Nígbà tí ẹ bá la Jordani kọjá sínú ilẹ̀ Kenaani, ⁵²ẹ lé gbogbo àwọn tí ń gbé ní ilẹ̀ náà jáde níwájú yín; ẹ sì run gbogbo àwọn ère gbígbẹ́ wọn àti àwọn ère dídà, kí ẹ sì wó gbogbo àwọn ibi gíga wọn palẹ̀. ⁵³Ẹ gba ilẹ̀ náà, kí ẹ sì máa gbé inú rẹ̀, nítorí mo ti fi ilẹ̀ náà fún yín láti gbà á. ⁵⁴Ẹ fi kèké pín ilẹ̀ náà láàrín àwọn ìdílé yín—ẹ fún àwọn ìdílé ńlá ní ilẹ̀ púpọ̀, kí ẹ sì fún àwọn tí ó kéré ní díẹ̀. Ibikíbi tí kèké bá ti bọ́ sí ẹnìkan, òun ni yóò jẹ́ tirẹ̀. Ẹ ó jogún ní ìbámu pẹ̀lú àwọn ẹ̀yà baba ńlá yín.

⁵⁵“Ṣùgbọ́n bí ẹ kò bá lé àwọn olùgbé ilẹ̀ náà jáde níwájú yín, àwọn tí ẹ bá fi sílẹ̀ yóò di ọfà ní ojú yín àti ẹ̀gún ní ìhà yín, wọn yóò sì máa yọ yín lẹ́nu ní ilẹ̀ tí ẹ ń gbé. ⁵⁶Nígbà náà ni èmi yóò ṣe sí yín ohun tí mo ti pèrò láti ṣe sí wọn.”