Kongelelji Israel Rehoboam
Ki kisoom Rehoboam kowisisiit chogitap kwandanyi. Ki nam ng'aleegap neranik kosiir ng'aleegap poisyek, ak koyan melmelwek kobatee kipcharitisyek, ak komwei kiwotosyek taman. Ki mwa siriindet kole ki punu Kwandanyo weekutyoni, kot koit ng'olyoot ne ki kimwachi Jeroboam.
10 1Ki wendi Rehoboam Shekem, amu kibwa Israel tugul Shekem koeet koek laitoryat ineendet. 2Kingo kas Jeroboam weeriitap Nebat ng'olyoni—kimenyei Misiri, ole kiga mwei kobun Laitoryat Solomon—koweek Jeroboam kobun Misiri. 3Ki kiyookto anyun koguure ineendet, ak konyo Jeroboam ak Israel tugul koleenji Rehoboam, 4“Konyigiisit kwandang'ung' choginnyo. Ara anyun, iwisisiit poisyet ne koroom ne po kwandang'ung', ak chogit ne nyigiis ne kaindeech, si keotin.”
5Koleenji icheek, “Oweekyigei konyo eng' peetuusyek somok.” Ki pa anyun pichooto.
6Ki ng'alaal Laitoryat Rehoboam ak poisyek che ki boisyechi Solomon kwandanyi ye kita kosabei, koleenji, “Nee ng'olyoot ne omwaiwo ne awoljini pichu?”
7Ki wolji icheek koleenji, “Ngot iyae ne myee pichu, ak ichame icheek, ak ing'alaalji icheek eng' kaalyeet, koegu icheek otwogiguk koigeny.”
8Ago ki meto ng'aleegap poisyek, ak kong'alaal ak neranik che kinerchindos ak ineendet ak che ki boisyechi ineendet. 9Ki teebe icheek, koleenji, “Nee ng'olyoot ne omwae okweek? Kewolji ano pichu che soomei keleenji, Iwisisiit chogit ne kaindeech kwandang'ung'?”
10Ki wolji neranik che kinerchindos ak ineendet, koleenji, “Imwachini pichu che ki leenjin, ‘Ki yai kwandang'ung' choginnyo konyigiisit; yaiywech kowisisiit’—ileenjini, ‘Nyigiisit mornennyu ne ming'in kosiir chogetap abba. 11Ki koonok abba choging'wong' ne nyigiis, ago atesyini anee. Kigitigonok abba eng' kipcharitisyek, ago abirok anee eng' melmelwek.’ ” a a v11 Melmelwek: kipcharit ne tinyei kortaiyoik anan koik che kiim eng' sueet, ne yae nyalilet ne oo miising' kosiir kipcharit ne iyaiyin.
12Ki nyo anyun Jeroboam ak piik tugul ole mi Rehoboam eng' peetuut ne po somok, ko uu ye ki mwa laitoryat, koleenji, “Oweekyigei konyo eng' peetuut ne po somok.” 13Ki wolji laitoryat icheek eng' koroomnateet. Ki meto Laitoryat Rehoboam ng'aleegap poisyek, 14ak kong'alaalji icheek ko uu ye ki mwachi neranik, koleenji, “Ki yai abba choging'wong' konyigiisit, ago atese choging'wong'. Ki itigonenok abba kipcharitisyek, ago atigoonenok melmelwek.”
15Ma kas anyun laitoryat piik, amu ki kiit ne ki punu Kwandanyo, si kobiit kosulda ng'olyoot, ne ki mwa Kwandanyo eng' Ahija Silonindet, komwachi Jeroboam weeriitap Nebat.
16Kingo keer Israel tugul kole ma kas laitoryat icheek, kowolji piik ineendet, koleenji, “Nee kebeberta ne kiitech eng' Daudi? Ma mi kiy ne kinyooru eng' weeriitap Jesse! Oweekyigei emaisyekwok, ee Israel! Keer koong'ung' inyegei, ee Daudi!” Ki pa anyun Israel tugul emaisyekwak. b b v16 “Oweekyigei emaisyekwok” ko ki ng'olyoot ne po keny ne kigure piik kotui, ne karameetnyi ko, “Oweek kaa ak oiste genyunet ne po laitoryat.”
17Ago Rehoboam ko kita kolaitorane piigap Israel che menyei nganasoogap Judah. 18Ki kiyookto anyun Laitoryat Rehoboam Hadoram, ne ki boi aisuruut, ago ki lage piigap Israel ineendet koik agoi kome. Ki torombei Laitoryat Rehoboam ineegei chepkichutitap paraisiit ak komwei Jerusalem. 19Kongelelji anyun Israel kootap Daudi agoi ra.