ରିହବୀୟାମଙ୍କ ବିରୁଦ୍ଧରେ ଇସ୍ରାଏଲର ବିଦ୍ରୋହ

ରିହବୀୟାମଙ୍କୁ ତାଙ୍କ ପିତାଙ୍କ ଯୁଆଳି ହାଲୁକା କରିବାକୁ ଅନୁରୋଧ କରାଯାଏ। ସେ ପ୍ରାଚୀନମାନଙ୍କ ପରାମର୍ଶ ଛାଡ଼ି ନିଜ ସାଙ୍ଗମାନଙ୍କ ପରାମର୍ଶ ନିଅନ୍ତି, ଚାବୁକ ବଦଳରେ ବିଛା ପ୍ରତିଜ୍ଞା କରନ୍ତି, ଏବଂ ଦଶ ଗୋଷ୍ଠୀ ଚାଲିଯାଆନ୍ତି। ବର୍ଣ୍ଣନାକାରୀ ଲକ୍ଷ୍ୟ କରନ୍ତି ଯେ ଏହି ମୋଡ଼ ଆମ୍ଭମାନଙ୍କ ପିତାଙ୍କଠାରୁ ଆସିଥିଲା, ଯାରବୀୟାମଙ୍କୁ କୁହାଯାଇଥିବା ବାକ୍ୟ ପୂର୍ଣ୍ଣ କରି।

ଅଧ୍ୟାୟ 10।

ରିହବୀୟାମ ଶିଖିମକୁ ଗଲେ, କାରଣ ତାହାଙ୍କୁ ରାଜା କରିବା ନିମନ୍ତେ ସମଗ୍ର ଇସ୍ରାଏଲ ଶିଖିମକୁ ଆସିଥିଲେ। ନବାଟର ପୁତ୍ର ଯାରବୀୟାମ ଏହା ଶୁଣନ୍ତେ ମିସରରୁ ଫେରିଆସିଲା; ସେ ଶଲୋମନ ରାଜାଙ୍କଠାରୁ ପଳାଇ ମିସରରେ ଥିଲା। ଏଣୁ ସେମାନେ ଲୋକ ପଠାଇ ତାହାକୁ ଡକାଇଲେ, ପୁଣି ଯାରବୀୟାମ ଓ ସମଗ୍ର ଇସ୍ରାଏଲ ଆସି ରିହବୀୟାମଙ୍କୁ କହିଲେ, “ଆପଣଙ୍କ ପିତା ଆମ୍ଭମାନଙ୍କ ଯୁଆଳି ଭାରୀ କରିଥିଲେ। ଏବେ ଆପଣଙ୍କ ପିତାଙ୍କ ସେହି କଠିନ ସେବା ଓ ସେ ଆମ୍ଭମାନଙ୍କ ଉପରେ ଥୋଇଥିବା ଭାରୀ ଯୁଆଳି ଲଘୁ କରନ୍ତୁ, ତେବେ ଆମ୍ଭେମାନେ ଆପଣଙ୍କ ସେବା କରିବୁ।”

ସେଥିରେ ସେ ସେମାନଙ୍କୁ କହିଲେ, “ତିନି ଦିନ ଉତ୍ତାରେ ମୋʼ ନିକଟକୁ ପୁନର୍ବାର ଆସ।” ତହିଁରେ ଲୋକମାନେ ଚାଲିଗଲେ।

ତେବେ ରିହବୀୟାମ ରାଜା ଆପଣା ପିତା ଶଲୋମନଙ୍କ ଜୀବନକାଳରେ ତାହାଙ୍କ ସମ୍ମୁଖରେ ଠିଆ ହୋଇଥିବା ପ୍ରାଚୀନବର୍ଗଙ୍କ ସହିତ ମନ୍ତ୍ରଣା କରି କହିଲେ, “ଏହି ଲୋକମାନଙ୍କୁ ଉତ୍ତର ଦେବା ନିମନ୍ତେ ତୁମ୍ଭେମାନେ ମୋତେ କି ପରାମର୍ଶ ଦେଉଅଛ?”

ସେମାନେ ଉତ୍ତର ଦେଲେ, “ଯଦି ଆପଣ ଏହି ଲୋକମାନଙ୍କ ପ୍ରତି ଦୟାଳୁ ହୁଅନ୍ତି, ସେମାନଙ୍କୁ ସନ୍ତୁଷ୍ଟ କରନ୍ତି ଓ ସେମାନଙ୍କୁ ମଧୁର ବାକ୍ୟ କହନ୍ତି, ତେବେ ସେମାନେ ସର୍ବଦା ଆପଣଙ୍କ ଦାସ ହୋଇ ରହିବେ।”

ମାତ୍ର ସେ ପ୍ରାଚୀନବର୍ଗଙ୍କ ଦତ୍ତ ପରାମର୍ଶ ଅଗ୍ରାହ୍ୟ କରି ଆପଣା ସଙ୍ଗରେ ବଢ଼ି ଆପଣା ସମ୍ମୁଖରେ ଠିଆ ହୋଇଥିବା ଯୁବକମାନଙ୍କ ସହିତ ମନ୍ତ୍ରଣା କଲେ। ସେ ସେମାନଙ୍କୁ ପଚାରିଲେ, “ତୁମ୍ଭେମାନେ କି ପରାମର୍ଶ ଦେଉଅଛ? ‘ଆପଣଙ୍କ ପିତା ଆମ୍ଭମାନଙ୍କ ଉପରେ ଥୋଇଥିବା ଯୁଆଳି ଲଘୁ କରନ୍ତୁ’ ବୋଲି ଯେଉଁ ଲୋକମାନେ ମୋତେ କହୁଅଛନ୍ତି, ସେମାନଙ୍କୁ ଆମ୍ଭେମାନେ କି ଉତ୍ତର ଦେବା?”

ତାହାଙ୍କ ସଙ୍ଗରେ ବଢ଼ିଥିବା ଯୁବକମାନେ ତାହାଙ୍କୁ ଉତ୍ତର ଦେଲେ, “‘ଆପଣଙ୍କ ପିତା ଆମ୍ଭମାନଙ୍କ ଯୁଆଳି ଭାରୀ କରିଥିଲେ, ମାତ୍ର ଆପଣ ତାହା ଆମ୍ଭମାନଙ୍କ ପାଇଁ ଲଘୁ କରନ୍ତୁ’ ବୋଲି ଯେଉଁ ଲୋକମାନେ ଆପଣଙ୍କୁ କହିଲେ, ସେମାନଙ୍କୁ ଏହିପରି କୁହନ୍ତୁ, ‘ମୋହର କନିଷ୍ଠ ଅଙ୍ଗୁଳି ମୋʼ ପିତାଙ୍କ କଟିଠାରୁ ମୋଟା। ମୋʼ ପିତା ତୁମ୍ଭମାନଙ୍କ ଉପରେ ଭାରୀ ଯୁଆଳି ଥୋଇଥିଲେ, ମୁଁ ତୁମ୍ଭମାନଙ୍କ ଯୁଆଳିରେ ଆହୁରି ବୃଦ୍ଧି କରିବି। ମୋʼ ପିତା ତୁମ୍ଭମାନଙ୍କୁ କୋରଡ଼ାରେ ଶାସ୍ତି ଦେଲେ, ମାତ୍ର ମୁଁ ତୁମ୍ଭମାନଙ୍କୁ ବିଛା ଦ୍ଵାରା ଶାସ୍ତି ଦେବି।’” ^a

ଅନନ୍ତର ରାଜା “ତୃତୀୟ ଦିନ ମୋʼ ନିକଟକୁ ପୁନର୍ବାର ଆସ” ବୋଲି ଯେପରି କହିଥିଲେ, ତଦନୁସାରେ ଯାରବୀୟାମ ଓ ସମସ୍ତ ଲୋକ ତୃତୀୟ ଦିନ ରିହବୀୟାମଙ୍କ ନିକଟକୁ ଆସିଲେ। ରାଜା ସେମାନଙ୍କୁ କଠୋର ଭାବରେ ଉତ୍ତର ଦେଲେ; ରିହବୀୟାମ ରାଜା ପ୍ରାଚୀନବର୍ଗଙ୍କ ଦତ୍ତ ପରାମର୍ଶ ଅଗ୍ରାହ୍ୟ କଲେ, ପୁଣି ଯୁବକମାନଙ୍କ ପରାମର୍ଶାନୁସାରେ ସେମାନଙ୍କୁ କହିଲେ, “ମୋʼ ପିତା ତୁମ୍ଭମାନଙ୍କ ଯୁଆଳି ଭାରୀ କଲେ, ମୁଁ ତାହା ଆହୁରି ଭାରୀ କରିବି। ମୋʼ ପିତା ତୁମ୍ଭମାନଙ୍କୁ କୋରଡ଼ାରେ ଶାସ୍ତି ଦେଲେ, ମାତ୍ର ମୁଁ ତୁମ୍ଭମାନଙ୍କୁ ବିଛା ଦ୍ଵାରା ଶାସ୍ତି ଦେବି।”

ଏହିରୂପେ ରାଜା ଲୋକମାନଙ୍କ କଥା ଶୁଣିଲେ ନାହିଁ; କାରଣ ଆମ୍ଭମାନଙ୍କ ପିତା ଶୀଲୋନୀୟ ଅହୀୟଙ୍କ ଦ୍ଵାରା ନବାଟର ପୁତ୍ର ଯାରବୀୟାମକୁ ଯେଉଁ ବାକ୍ୟ କହିଥିଲେ, ତାହା ସଫଳ କରିବା ନିମନ୍ତେ ଏହି ଘଟଣା ଆମ୍ଭମାନଙ୍କ ପିତାଙ୍କଠାରୁ ହୋଇଥିଲା।

ରାଜା ସେମାନଙ୍କ କଥା ଶୁଣିବେ ନାହିଁ ବୋଲି ସମଗ୍ର ଇସ୍ରାଏଲ ଦେଖନ୍ତେ, ଲୋକମାନେ ତାହାଙ୍କୁ ଉତ୍ତର ଦେଲେ, “ଦାଉଦଙ୍କଠାରେ ଆମ୍ଭମାନଙ୍କ କି ଅଂଶ ଅଛି? ଯିଶୀର ପୁତ୍ରଠାରେ ଆମ୍ଭମାନଙ୍କ କିଛି ଅଧିକାର ନାହିଁ! ହେ ଇସ୍ରାଏଲ, ଆପଣା ଆପଣା ତମ୍ବୁକୁ ଯାଅ! ହେ ଦାଉଦ, ଏବେ ଆପଣା ଗୃହ ବୁଝ!” ତହିଁରେ ସମଗ୍ର ଇସ୍ରାଏଲ ଆପଣା ଆପଣା ତମ୍ବୁକୁ ଚାଲିଗଲେ। ^b

ମାତ୍ର ଯିହୂଦାର ନଗରସମୂହରେ ବାସ କରୁଥିବା ଇସ୍ରାଏଲ-ସନ୍ତାନଗଣ ଉପରେ ରିହବୀୟାମ ତଥାପି ରାଜତ୍ଵ କଲେ। ଅନନ୍ତର ରିହବୀୟାମ ରାଜା ବେଠିବଗାର କାର୍ଯ୍ୟର ଅଧ୍ୟକ୍ଷ ହଦୋରାମକୁ ପଠାଇଲେ, ମାତ୍ର ଇସ୍ରାଏଲ-ସନ୍ତାନଗଣ ତାହାକୁ ପଥର ଫିଙ୍ଗି ବଧ କଲେ। ତହିଁରେ ରିହବୀୟାମ ରାଜା ଆପେ ଶୀଘ୍ର ଆପଣା ରଥରେ ଚଢ଼ି ଯିରୂଶାଲମକୁ ପଳାଇଲେ। ଏହିରୂପେ ଇସ୍ରାଏଲ ଆଜି ପର୍ଯ୍ୟନ୍ତ ଦାଉଦଙ୍କ ବଂଶ ବିରୁଦ୍ଧରେ ବିଦ୍ରୋହୀ ହୋଇ ରହିଅଛି।