2 Thotrinchān 10

10 ¹Rehoboamna Shechem ramli vai, kaja Israel saikorana awunga ali sākhavai Shechemli rāsai. ²Awunga Solomonwui eina yāmngayin kahaida Egyptli khalei Nebatwui naomayara Jeroboamna chi kashā eina, Egyptwui eina latunga. ³Chieina athumna ali ahokhui; kala Jeroboam kala Israel saikorana vaida Rehoboamli hānga, ⁴"Navāna ithumli kharit ot chiphuna; ara chiwui vangli navāwui kashai kala kharita otphun chi ngaveng ngasakakha, nali ithumna otram ngatha̱mipapamra."

⁵Ana athumli hānga, "Kakathumathang iwuili rāluinaolu." Chieina mibingna ungserhaowa.

⁶Chiwui thili Awunga Rehoboamna avāva̱ Solomon ringlakha leikasā khararnaobingli ngasana: "Mibing hili ngahānkā khavai nathumna ili khi hāngchitheira?"

⁷Athumna hānga, "Nana mibing hili kaphā sāda, athumli ningyāng ung ngasakta, kala khamathā tui eina hāngakha, athumna atam kachida nawui rao sāchingra."

⁸Kha ana khararnaobingwui rakkachithei chi horhaida, ali rarkākharum kala ali otram ngatha̱ ngasotnaobingli ngasanlui. ⁹Ana athumli hānga, "Nathumna ili khi hāngchitheira? 'Nashāvāwui kharita otphun chi ithumli khangaveng ngasakmilu' da ili rākahāngbing chi, nathumna ili ngahānkā khavai khi hāngrakhala?"

¹⁰Awui rarkākharuma ngasotnaobingna ali ngahānkai, "'Ithumli navāna ot kharita chiphuna, kha ara ithumwui vang nana khangaveng ngasakmilu' da nali kahāng mibing chili hithāda hānglu, 'Iwui ngangpairi ishāvāwui kashānli reimei!'" ¹¹Ishāvāna nathumli ot kharita chiphuna, ina ritmeida ara chiphunra. Ishāvāna lijei eina nathumli ngaphita, kha ina seithat eina hāngmachinra.'" ^a a v11 Seithat: akhaler kai jika thir eina sākhami lijei akha ayur, lijei khamāngkha akhawui eina kasha̱ khareimei.

¹²Chieina, 'Kakathumathang iwuili rāluinaolu' da awungana hāngkahai athishurda, Jeroboam kala mi saikora kakathumathang Rehoboamwuili vai." ¹³Awungana athumli thurda ngahānkā. Awunga Rehoboamna khararnaobingwui rakkachithei chi makhuisangla, ¹⁴kala ngasotnaobingna hāngchithei kahai athishurda athumli hānga, "Ishāvāna nathumli ot kharita chiphuna, kha ina ritmeida chiphunra. Ishāvāna lijei eina nathumli ngaphita, kha ina seithat eina hāngmachinra."

¹⁵Chithāda awungana mibingli manganāsangmithuwa; kaja hi shokkahai chi ithumwui Avāwui eina rākashokna, ithumwui Avāna Nebatwui nao Jeroboamli Shilohnao Ahijahwui khamor eina hāngmi kahai tui chi ungshung khavaina.

¹⁶Israel saikorana awungana athumli manganāsangkhami theilaga, mibingna awungali ngahānkai, "Ithumna Davidshiwuili khi yar leikhala? Jessewui naomayarawuili shimlui ithumna maleimana! Kachichāshiwui kachonshimli ungulu, O Israel! David, nawui shim nala naningsasakulu!" Chieina Israel saikorana kachichā kachonshimli ungserhaowa. ^b b v16 'Kachichāshiwui kachonshimli ungulu' hi arema atamwui khaokahong tui akhana, 'shimli ungda awungali otram matha̱luimara' da kakhalatna.

¹⁷Kha Judah keinungbingli pamda leikasā Israelnaobingwuitungli Rehoboamna mungchinga. ¹⁸Chiwui thili thoukai ot kasāli kashina Hadoramli Awunga Rehoboamna chihokhavā eina ali Israelnaobingna lunggui eina horthathaowa. Kala Awunga Rehoboam khalattana siguigarili ngakarthui tonglaga Jerusalemli yāmunghaowa. ¹⁹Chiwui vang aja eina tangda David shimkhurli Israelna ngakaikashina.