Israelbü Rehoboam Khulimbo Tuokbü
Rehoboam to haobouei künkubü on kümetla sukei. Haoei jaishou shuongeibü songsido lato heshou shuongeibü songsido lekei, semjin lato sinkip yoa tetenlabü dogo laukei, hoba chemdang saoan hao ka weian haukei. Ho weibü kho seneibü Bou thüka longbü, Jeroboam to laubü ngüh loushedbü ki dogo lenbou lauda.
10 1Rehoboam Shekhem to haukei, aishanga Israelbü pendouei hao Choba yeitila shanga Shekhem to louankei. 2Ladang Nebateibü shou Jeroboamei hibü ngüh ditkei (hao Solomon Choba ka satetlangan Ijepa kikei), kheijinei Jeroboam Ijep ka longeikei. 3Kheijinei haoenei hao ngala hautikei, hoba Jeroboam hoba Israelbü pendou louan Rehoboam to laukei, 4“Kabouei kün on atshaitikei. Hibü tou kabouei amaibü kümsilei hoba haoei kün la künkubü on atshaibü kho songoktham yeitishi, hoba künei no khangenlabü.”
5Haoei haoen to laukei, “Chalou sem phaia kü jungto longeiashi.” Hibü mütshuong haukei.
6Hobaje Rehoboam Chobaei jaishou shuong, aoyou haobou Solomon langkeijinei khangenbü shuong kikei, haoen to hai phekei, “Ngei habü mütshuong to jongaila kanei kü la ai songsido kula?”
7Haoenei hao to jongaikei, “No habü mütshuong to maia kila, haoen olinko, hoba onoubü ngüha laushi, kheijinei haoen ponpen no khangenbou kilabü.”
8Lausikei haoei jaishou shuongeibü songsido kubü to asunglet kukei, hoba hao yoa chingenkei hoba hao to khangenkei heshou shuong aoyou ka songsido lekei. 9Hobaje haoei haoen to phekei, “Senei ai songsido kudala? ‘Kübouei künkubü on sotishi,’ dogo kü to laubü hibü mütshuong to senei aitegü jongaidala?”
10Heshou shuong aoyou hao yoa chingenkei haoenei hao to jongaikei, “Ka to ‘Kabouei kün on atshaitikei, kün la songoktishi,’ dogo laubü mütshuong to hai lenshi, ‘Ngeibü ikjishou hanbou ho küboueibü shenjang tokei shangtüngbou. 11Kübouei kan on atshaitikei kukei, lausikei ngei khüto aei jinyoku kulabü. Kübouei semjinei kan to ngümkei, lausikei ngeije sinkipei kan to shieikoelabü.’” a a v11 Sinkip: ho semjin aotham che ki — chinamei metbü — jembü semjin tokei aei hat yongbü.
12Hibü sembounyet Jeroboam hoba mütshuong pendou Rehoboam jungto ngaikei, aishanga Chobaei laukei, “Sembounyet kü jungto longeiashi.” 13Chobaei haoen to kaangko jongaikei. Rehoboam Chobaei jaishou shuongei songsido kubü kho asunglet, 14hoba heshou shuongei songsido kubü tegütham haoei haoen to laukei, “Kübouei kan on atshaitikei kukei, ngeije kho khüto aei atshai kulabü. Kübouei semjinei kan to ngümkei, lausikei ngeije sinkipei kan to shieikoelabü.”
15Hibü Chobaei mütshuong to ngüha ale, aishanga seneibü Bouei Shilobü Ahija danko Nebateibü shou Jeroboam to joyobü ngüh loushedla shanga ho kho seneibü Bou ka loukei.
16Hobaje ladang Israelbü pendouei Chobaei haoen to ngüha alelabü dogo chühkei, mütshuongei hao to jongaikei, “Dawid yoa kün ai phejan ki? Jesse shousi to kün onat aki! O Israel, kan neichem to ngaiashi! O Dawid, no jembü chem lamjung ngaiashi!” Kheijinei Israelbü pendou lulueibü neichem to ngaikei. b b v16 “Kan neichem to” dogobü kho shangiednyu laibü aukhün che kikei, haoeibü teklabü kho, chem to ngaian Choba to khangenbü kho inletla, dogo ki.
17Lausikei Rehoboamei Jihuda sangnyu shuonga kibü Israel shousi shuong thüka shangaje songdakkei. 18Kheijinei Rehoboam Chobaei Hadoram, ao kümaleia leiyeibou kikei, hao hautikei, lausikei Israelbü pendouei hao to laangei tetkei hoba hao haikei. Hobaje Rehoboam Choba hao lolo haoeibü koli kailonga pükan Jerusalem to satkei. 19Kheijinei sühko dei tegü Israelei Dawidbü chem to khulimbo loda.
